Read Imbabura Highland Quichua Psalms 64 Bible Online

Psalms 64 - Imbabura Highland Quichua bible

Psalms 64

¹Candajcunata mandaj candachijuchun, David rurashca Salmomi. Taita Dioslla, aij nishpa ñuca mañajujtaca uyahuayari. Ñucata fiñajta manllanamandaca, ñuca causaita cuidahuayari.

²Pacalla yarinajuj nalita rurajcunamandaca pacahuayari. Ñucata llujchingapaj pacalla parlarishpa, jatarij nalita rurajcunamanda pacahuayari.

³Paicunapaj jallutaca espadatashna filoyachishpami, flechata shitanshna jayaj shimita cacharin.

⁴Ima nalitapash na ruraj runata, flechata pacalla cacharingapajmi chashna ruran. Cungashcapi flechahuan ñapash shitashpapash, na manllanajunllu.

⁵Nalita rurangapajlla yarinajushpami, lazucunata pacalla churangapaj munashpa: “¿Pita caicunataca ricungayari?” ninajun.

⁶Jatun nalita ruranataca, caishujta chaishujta tapushpami alipacha yachan. Tucui paicunapaj shungutaca, pipash na yachai ushanallatami yarinajun. Paicunapaj shungu ucupi ninanda yarinajunshnallatami, paicunapaj yuyaipipash tucuicunallata ninanda yarinajun.

⁷Ashtahuangarin Taita Diosmi paicunataca, flechahuan chugrichinga. Cungashcapimi, paicunataca llaquicuna japinga.

⁸Paicunapaj jallullatami, llaquipi urmachinga. Chaita tucui ricujcunami manllarinajunga.

⁹Shinamandami tucui gentecuna manllashpa, imatalla Taita Dios rurashcata villanajunga. Shina villanajujpimi, pai rurashcataca yachanajunga.

¹⁰Imatapash cashcatapacha ruraj runaca, Mandaj Dioshuan cushijushpami, paita yariashpa causajunga. Ali shungu tucui runacunami cushijunajunga.