Read Imbabura Highland Quichua Psalms 65 Bible Online

Psalms 65 - Imbabura Highland Quichua bible

Psalms 65

¹Candajcunata mandaj candachijuchun, David rurashca candana Salmomi. Taita Dioslla, candallami Sion pueblopica alicachina. Imata carasha nishcatapash, canmanmi carana.

²Mañanajujtaca, canmi uyajungui. Cambajmanmi, tucui gentecuna shamunga.

³Nalita rurashcacunami, ñucataca jarcashpa mishajun. Ashtahuangarin ñucanchi canda na cazushcacunataca, canmi cungapangui.

⁴Can agllashpa cambajman apamui tucujcunaca, ninandami cushijun. Cambaj huasi patiocunapi causachunmi agllarcangui. Cambaj huasipi ima alicuna tiashcata micushpami cushijushun. Cambajlla huasipi tiashcacunatami micushun.

⁵Canga, jatun manllarinata rurashpami, imatapash cashcatapacha rurashpa ñucanchiman tigrachingui. Ñucanchita quishpichij Taita Dioslla. Tucui cai pacha tucuri manñacunapi causajcunapash, mama cucha tucuri caru llactacunapi causajcunapash, candallami shuyanajun.

⁶Canmi, urcucunataca cambaj ushaihuan shinllitapacha shayachingui. Alipacha chumbilirishcatashnami, shinllitapacha shayachingui.

⁷Canmi, mama cucha huacajujtapash, chai cucha jatarishpa ninanda huacajtapash, llactacunapi causajcuna caparinajujtapash upallayachingui.

⁸Shinamandami, cai pacha tucuri manñacunapi causajcunaca, manllarinacunata can rurashcacunata ricushpa manllan. Canmi tutamandatapash, chishitapash cushichingui.

⁹Cai pachata ricuj shamushpami tamiachipangui. Shina rurashpami, ninandapacha fucuchingui. Can chashna rurangapaj munashpaca, can Taita Diospaj jatun yacu jundashcahuanmi, alpapi granocunataca aliguta fucuchingui.

¹⁰Huachucunapash quilparijtami tamiachingui. Larcayashcacunapash, urai rijtami tamiachingui. Tamiachishpa amujyachishpami, chaipi viñashca yuracunatapash bendiciangui.

¹¹Canmi huatataca, coronata churachinshna tucui alicunahuan cushichingui. Cambaj fuyucunapash, vira yacuyanshnami talirimujun.

¹²Jichushca pambapi tiaj jihuacunapimi talirimujun, lomacunapash chumbilinshnami cushijun.

¹³Jatun pambacunapash, animalcuna jundashcami. Pugru pambacunapash, granohuan quilpashcami. Ninanda cushijushpa caparishpami candanajun.