Read Imbabura Highland Quichua Psalms 68 Bible Online

Psalms 68 - Imbabura Highland Quichua bible

Psalms 68

¹Candajcunata mandaj candachijuchun, David rurashca candana Salmomi. Taita Dioslla, jataripairi. Can jatarishpaca, canda fiñajcunataca, caiman chaiman cachapailla. Paita millanayachijcunaca, paipaj ñaupajmandaca pacajushpa calpachun.

²Paicunataca, cushnitashnami maitapash cachangui. Diosta na manllajcunaca, ninapi vira yacuyanshnami, Taita Diospaj ñaupajpica chinganga.

³Ashtahuangarin imatapash cashcatapacha rurajcunaca, Taita Diospaj ñaupajpica ninandami cushijunga. Cushijuimandami fahuanajunga.

⁴Taita Diosta candaichiyari. Paipaj shutita, Salmocunahuan candaichiyari. Caballopi tiarinshna, jahua pachapi tiajujtaca, ninanda alicachinguichiyari. Paipaj shutica, Mandaj Diosmi. Paipaj ñaupajpi cushijuichi.

⁵Paica, taita mama illajcunapaj Taitami. Sapalla mamagucunatapash cuidashpa jarcajmi. Pai causana paipajlla huasipipash Taita Diosmi.

⁶Jichushpa saquishcacunataca, Taita Diosmi familiapi causachun churan. Prezu causajcunataca llujchishpami, aliguta causachun churashpa cushichin. Ashtahuangarin paita na cazujcunaca, chaquishca alpacunapimi causan.

⁷Taita Dioslla, can agllashcacunapaj ñaupajpi llujshishpa, jichushca pambata can purijujpica, Selah

⁸alpapashmi chujchurca. Taita Diospaj ñaupajmandami, jahua pachamanda tamiapash urmamurca. Chai Sinaí shuti urcumi, Taita Diospaj ñaupajpi chujchurca. Israelcunapaj Taita Diospaj ñaupajpimi chujchurca.

⁹Taita Dioslla, ashtaca tamiatami tsirapachimurcangui. Can carashca chaquishca alpataca, cutinmi mushujyachircangui.

¹⁰Cambaj corralmanda llamacunami, chaipica causashca. Taita Dioslla, juyaimandami imagutapash na charijcunaman carashcangui.

¹¹Imata cashpapash, Jatun Diosllatami villachijurca. Ali villaitaca, ashtaca huarmicunami cashna villanajurca:

¹²“Jatun mandajcunami, paicunapaj soldadocunahuan pacajushpa calpanajun” nishpami villanajurca. Huasipi quedajcunaca, macanajuipi quichumushcacunatami chaupirinajurca.

¹³Alitapashchari callana faquicunahuan, shitai tucurcanguichi. Palomapaj alasta culquihuan quilpashcashnami tucunguichi. Plumacunapash, quillu orohuan quilpashcashnami tucunguichi.

¹⁴Tucuita Rurai Ushaj Dios, caita chaita cachajpica jatun mandajcunaca, Salmón shuti urcupi rasushcashnami chaipi carca.

¹⁵Basán shuti urcuca, Taita Diospaj urcumi. Chai Basán urcuca, jatumbacha urcumi.

¹⁶Jatun urcucunalla, ¿imashpata Dios causangapaj munashca urcutaca ricunajunguichi? Chaipica, Mandaj Diospachami causaita causajunga.

¹⁷Taita Diospaj carretacunaca, ashtaca huaranga huarangacunami. Jatun Diosca, Sinaí urcumandami, paipajlla huasiman shamujun.

¹⁸Prezu tiajcunata apashpami, jahuaman rircangui. Gentecunaman carangapajmi, alicunata japircangui. Na cazujcunamambash, paicunahuan causangapajmi, Mandaj Taita Diosca japircangui.

¹⁹Jatun Diosca, alicachi tucushca cachun. Paica, punllandimi ashtaca alicunata caramujun. Paica, ñucanchita quishpichij Taita Diosmi. Selah

²⁰Taita Diosca, ñucanchi Taita Diosmi. Paimi, ñucanchitaca quishpichinga. Mandaj Jatun Diosmi, huañunamandapash cacharichinga.

²¹Taita Diosca, paita fiñajcunataca, umapi chugrichingapachami. Juchapi purijcunataca, frente ajcha ladopipashmi chugrichinga.

²²Mandaj Diosca, cashnami nirca: “Basán shuti llactamandami, candaca tigrachimusha. Candaca, mama cucha yacu ucucunamandami tigrachimusha.

²³Cambaj chaquica, canda fiñajcunapaj yahuarpimi pucapamba tucunga. Chai yahuartaca, cambaj alcucunami lambinajunga” nircami.

²⁴Taita Dioslla, cambaj ñangunatami ricunajurca. Ñuca Taita Diospaj ñangunataca, ñucata Jatun Mandajpaj ñangunatami, cambajlla huasipica ricunajurca.

²⁵Candajcunaca ñaupashpa, tocajcunaca catishpami rinajurca. Chaupipica, jarihuan nara tacarishca cuitsacunami, panderocunahuan rinajurca.

²⁶Jatun tandanajuicunapica, Taita Diostaca alimari cangui nichiyari. Callarimandapacha causaj israelcuna, Jatun Diosta chashna nichiyari.

²⁷Paicunata mandaj, chairalla viñai Benjaminga chaipimi carca. Judá ailluta mandajcunaca, paicunapaj jatun tandanajuipimi carca. Zabulón ailluta, Neftalí ailluta mandajcunapash chaipimi carca.

²⁸Cambaj Taita Diosca mandashpami, canman ushaita cushca. Taita Dioslla, ñucanchiman imata can rurashcatapash, shinllitapacha cutin villapailla.

²⁹Jerusalenbi cambajlla huasita yarishpami, jatun mandajcunaca, caranacunata canman caranajunga.

³⁰Macanajungapaj tandanajuj gentecunata llaquichipairi. Huagracunashna ashtaca gentecunata, shicucunashna gentecunatapash llaquichipairi. Paicunapaj culquicunandi, cambajman tucuilla yaicumungacaman llaquichipailla. Macanajushpa cushijuj gentecunataca, caita chaita cachapailla.

³¹Egipto llactata mandajcunami shamunajunga. Etiopía llactapi causajcunaca, ñapashmi paicunapaj maquita Taita Diospajman chutanajunga.

³²Cai pachapi tiaj llactacunata mandajcunaca, Taita Diosman candaichiyari. Jatun Diosman candaichiyari. Selah

³³Jahua pachamanda ashtahuan jahua pachapica, caballopi tiarinshna punda huatamandapacha tiajujman candaichiyari. Ricuichi, paimi rimamunga. Ninan ushaihuanmi rimamunga.

³⁴Taita Dios ninan ushaita charijtaca yarichiyari. Pai juyaillapacha cajtaca, israelcunapimi ricuchijun. Paipaj jatun ushaica, jahua pachapimi.

³⁵Cambajlla huasipi tiajushpaca, canga manllarina Taita Diosmi cangui. Israelcunapaj Taita Diosca, paimi pai agllashcacuna ninan shinlli cachunga, ushaita cujun. Taita Diosca, alimari cangui ni tucushca cachun.