Read Imbabura Highland Quichua Psalms 7 Bible Online

Psalms 7 - Imbabura Highland Quichua bible

Psalms 7

¹Benjaminbaj churi Cus runa nalicachishcamanda, Sigaión nishca tonopi, Mandaj Diosman David candashca Salmomi. Ñucata Mandaj Taita Dioslla, candallami yariashpa causajurcani. Ñucata catiriashpa tucui llaquichijcunamanda quishpichishpa cacharichihuayari.

²Ñucataca leonshna japishpa, asha asha fitijujpi cacharichijca, pipash na tiajpira ñutushpa tucuchinman.

³Ñucata Mandaj Taita Dioslla, ¿ñucachu caita rurashcani? Ñuca maquihuanga, ima nalitapash na rurashcanichu.

⁴Ñucahuan casilla aliguta causajcunatapash, na llaquichircanichu. (Ashtahuangarin ñucata yangamanda fiñajtapash llaquichi tucunamanda cacharichircanimi).

⁵Ñuca nali cajpica fiñaj runaca, ñucata catiriashpa japichunlla. Ñuca causaitaca, alpapi sarunshna tucuchijuchunlla. Ñuca alicachi tucushcatapash, ñutu alpapi shitachunlla. Selah

⁶Ñucata Mandaj Dioslla, can ninanda fiñarishpa jataripairi. Ñucata ninanda fiñashpa llaquichijcunapaj ñaupajpi, cambash fiñarishpa shayaripairi. Imatapash cashcatapacha ruranata mandashcataca, ñucapaj randi shayarishpa yarichipairi.

⁷Gentecunaca tandanajushpami, cambaj muyundipi shayaringa. Paicunataca, jahua pachapi tiarishpa cutin mandapairi.

⁸Mandaj Diosmi, gentecuna imatalla rurashcataca ricuchinga. Mandaj Dioslla, imatapash cashcatapacha ñuca rurashcashnallata, ima pandatapash ñuca na rurashcashnallata, ñucatapash ricuhuayari.

⁹Nalita ruraj runacuna nalita rurashcacunaca, cunanllata tucurichunlla. Ashtahuangarin imatapash cashcatapacha rurajtaca, shinllitapacha charipairi. Imatapash cashcatapacha ruraj Taita Diosmi, gentecunapaj shungutapash, yuyaitapash imashna cajta ricujun.

¹⁰Taita Diosmi, ñuca jarcarina escudoshna. Alitalla shungupi charijcunataca, paimi quishpichin.

¹¹Taita Diosmi, imatapash cashcatapacha ruraj juez. Taita Diosca, paita na manllaj runataca, tucui punllapash fiñajunllami.

¹²Juchata rurashcamanda na llaquirijpica, paipaj espadataca filo filotami ruranga. Arcotapash, alichishcalla ña shitanatallami charijun.

¹³Shinallata huañuchinacunatapash, ñami alichishcalla charijun. Rupachij flechacunatapash, aliguta rurashcallami charijun.

¹⁴Ricuichi, Diosta na manllaj runaca, jatun nalitalla vijsayu tucunshnami, nalita ruranahuanlla junda tucushpa, umachinatalla ungunshna causan.

¹⁵Yacuta llujchingapaj jatun utujuta allashcatashnami saquishca. Chai allashca utujupillatami urmanga.

¹⁶Paicuna nalita rurashcacunaca, paicunapaj uma jahuapillatami urmanga. Paicuna llaquichinata yarinajushcacunapash, paicunapaj umapillatami urmanga.

¹⁷Mandaj Diostaca, pai imatapash cashcatapacha rurashcashnallatami alicachisha. Jahua pachapi causajuj Mandaj Diospaj shutitami candasha.