Read Imbabura Highland Quichua Psalms 71 Bible Online

Psalms 71 - Imbabura Highland Quichua bible

Psalms 71

¹Mandaj Dioslla, cambimi ñucaca pacajushcani. Ñuca pingai tucuchunga, ima horapash ama saquihuaichu.

²Imatapash cashcatapacha rurashpa, llaquimanda ayudashpa cacharichihuayari. Aliguta uyashpa quishpichihuayari.

³Ñuca pacajuna, jatun Rumishna capairi. Chaimanmi, ñucaca rijushalla. Canmi, mandashcataca ñucata quishpichingapaj cushcangui. Canmi, ñucapaca jatun Rumishna, ñucapaj shinlli torreshna capangui.

⁴Ñuca Taita Dioslla, canda na manllaj runapaj maquimanda, jatun nalita rurajpaj maquimanda, na llaquishpa huañuchijpaj maquimanda cacharichihuayari.

⁵Mandaj Jatun Dioslla, canmi ñuca shuyana capangui. Ñucataca, chairalla viñai cashcamandapachami, aliguta cuidajuhuangui.

⁶Ñucataca, mamapaj vijsapi cajpillatami, cambaj maquipi charihuashcangui. Ñuca mamapaj vijsamandaca, canmi llujchihuarcangui. Chaimandami, candalla tucui causaipi alicachijusha.

⁷Ñucaca taucacunapajmi, jatun manllarina carcani. Canga, ñucapaca shinllipacha pacajmi capangui.

⁸Ñuca shimica, canda alicachinahuan, canda cushichinahuan, punllandi junda cachun.

⁹Ña rucuyajpipash, ama shitahuanguichu. Ñuca ushai illaj tucujpipash, ama jichushpa saquihuanguichu.

¹⁰Ñucata fiñajcunaca, ñucatami nalicachinajun. Ñucata huañuchingapaj pacalla chapajcunaca, paicunapura tandanajushpami parlanajun.

¹¹Paicunaca cashnami ninajun: “Taita Diosca jichushpami saquishca. Paitaca, pipash na cacharichingachu. Catishpa japichilla” ninajunmi.

¹²Taita Dioslla, ñucamandaca ama caruyapaichu. Ñuca Taita Dioslla, ñucata ayudangapaj ucha shamupairi.

¹³Ñuca causaita tucuchingapaj munajcunaca, pingaichi tucushca, chingachi tucushca cachun. Ñucata llaquichingapaj muyujujcunaca, pingai tucunahuambash, musparinahuambash, quilpai tucushcashna cachun.

¹⁴Ashtahuangarin ñucaca, tucui causaipimi candalla shuyajusha. Ashtahuan ashtahuanmi, candaca alicachijusha.

¹⁵Ñuca shimica, imatapash cashcatapacha can rurashcatami villajunga. Alicunata rurashpa can quishpichishcataca, na cuentai ushanalla cajpipash, punllandi parlajushallami.

¹⁶Mandaj Jatun Dios ninan ushaihuan rurashcacunata ricungapajmi shamusha. Imatapash cashcatapacha can rurashcatami yarijusha, alita can rurashcatallami yarijusha.

¹⁷Taita Dioslla, ñucataca chairalla viñai cashcamandapachami yachachihuarcangui. Cunangamanmi, juyaillacunata can rurashcataca villajuni.

¹⁸Taita Dioslla, rucuyashpa yuraj ajcha tucujpipash, ama jichuhuanguichu. Cambaj ninan ushaita, jipa punllacunapi villangacaman, cambaj tucui ushaita, tucui jipa miraicunaman villangacaman, ama jichuhuanguichu.

¹⁹Taita Dioslla, jahua pachaman chayajtami, imatapash cashcatapacha rurajungui. Canmi, jatun ruranacunata rurashcangui. Taita Dioslla, canshnaca pipash na tianllu.

²⁰Canga, ninan ashtaca llaquicunata, nalicunatami ricuchihuarcangui. Shina cashpapash, cutin causaita carahuanguilla. Cutin cai pacha manllanayai ucu ucu yacucunamanda jatarichihuanguilla.

²¹Ñucataca ashtahuan jatunyachi tucunapi churashpami, cutinllata cushichihuangui.

²²Ñuca Taita Dioslla. Chashnallatami ñucapash, candaca salterio tocanacunahuan alicachisha. Israelcunapaj Jucha Illaj Dioslla. Can na llullaj cajtaca, arpata tocashpami candasha.

²³Ñuca shimica, canman candashpami cushijunga. Can quishpichishca ñuca almapashmi cushijunga.

²⁴Ñuca jalluca, can imatapash cashcatapacha rurashcatami, punllandi villajunga. Ñucata nalita rurangapaj munajcuna pingai tucushpa, musparinajushcamandami, chashna villajusha.