Read Imbabura Highland Quichua Psalms 72 Bible Online

Psalms 72 - Imbabura Highland Quichua bible

Psalms 72

¹Salomonman rurashca Salmomi. Taita Dioslla, jatun mandajmambash, aliguta ricushpa mandana yuyaita cupairi. Jatun mandajpaj churimambash, imatapash cashcatapacha rurashpa mandanata carapairi.

²Paimari, can agllashcacunataca, imatapash cashcatapacha rurashpa mandanga. Can agllashcacuna llaquilla causanajujpipash, aliguta ricushpami mandanga.

³Urcucunapash, gentecunapaj casilla ali causaita, lomacunapash imatapash cashcatapacha ruranatami apamunga.

⁴Gente puracunapi llaquilla causajcunataca, aliguta ricushpami mandanga. Imagupash illajcunapaj miraicunataca quishpichingami. Llaquichijcunataca sarungami.

⁵Indipash, lunapash tiashcacamanga, mirai miraicunapashmi candaca manllanajunga.

⁶Jatun mandajca, jihua cuchushca pambapi tamianshnami uriajumunga. Jamzi paramu urmashpa, alpata mutiyachinshnami canga.

⁷Pai mandajui punllacunapica, imatapash cashcatapacha ruranaca, sisanshnami canga. Luna tucuringacamanmi, casilla ali causaica ashtacapacha tianga.

⁸Paica, shuj lado mama cuchamandaca, caishuj lado mama cuchacamanmi mandajunga. Jatun yacumanda callarishpaca, cai pacha tucuri manñacunacamanmi mandajunga.

⁹Paipaj ñaupajpimi, jichushca pambapi causajcunaca cungurinajunga. Paita fiñajcunapash, ñutu alpatami lambinajunga.

¹⁰Tarsis pueblota jatun mandajcuna, yacu manñapi tiaj llactacunata jatun mandajcunami, caranacunata paiman apamunajunga. Sabá shuti, Seba shuti llactacunata jatun mandajcunapashmi, imacunatapash caranajunga.

¹¹Tucui jatun mandajcunami, paipaj ñaupajpi cunguringa. Tucui shuj llactacunapi causajcunami, paitaca servinajunga.

¹²Imagupash illajcuna caparishpa mañajpica, paimi cacharichinga. Pi ayudajta na charishpa llaquilla causajcunatapashmi ayudanga.

¹³Imagupash illajtapash, imagutapash na charitapash llaquingami. Imagutapash na charicunapaj causaitaca quishpichingami.

¹⁴Paicunapaj almataca, umachi tucunamandapash, ninandapacha llaquichi tucujujmandapash llujchingami. Paipaj ñaupajpica, paicunapaj yahuarca ninan valishcami canga.

¹⁵Jatun mandajca causajungallami. Sabá shuti llactamanda orotami caranajunga. Paimandaca Diosta mañanajungallami, punllandimi paitaca bendicianajunga.

¹⁶Pambapipash, jahua urcu umacunapipash, granocuna tiachunmi, maqui jundata shitanajunga. Chai muyumi, Líbano urcu quirucunashna tsal nijuj chagracuna fucunga. Pueblopi causajcunapash, pambapi jihua sisanshnami canga.

¹⁷Jatun mandajpaj shutica, causaita causaicamanmi canga. Indi tiashcacamanga, paipaj shutica tucui causaicamambash chashnallatami canga. Paimandami, tucui shuj llactacunapi causajcunaca bendiciai tucunajunga. Paicunaca, ninandami cushijun ninajungami.

¹⁸Mandaj Taita Diosca, alicachi tucushca cachun. Paica, israelcunapaj Taita Diosmi. Paillami, imapash juyaillacunata ruran.

¹⁹Paipaj juyailla shutica, causaita causaicaman alicachi tucujuchun. Pai punchapamba cashcapash, tucui cai pachapi junda cachun. Shina cachun. Shina cachun.

²⁰Isaí shuti runapaj churi David mañashca shimicunaca, caipimi tucurin.