Read Imbabura Highland Quichua Psalms 73 Bible Online

Psalms 73 - Imbabura Highland Quichua bible

Psalms 73

¹Asaf shuti runa rurashca Salmomi. Taita Diosca, israelcunahuanga aligupachami. Shungupi mapa illajcunahuambash aligupachami.

²Ñucamanda rimashpaca, ñuca chaquipash ashamandami na llucharca. Ñuca purijushpaca, ashamandallami na llucharcani.

³Ninan jariyashcacunata ricushpami, paicunashnallata cangapaj ninanda munarcani.

⁴Paicunaca, huañui japihuangami yashpallapash na llaquirinllu. Ashtahuangarin ninan shinllicunarami.

⁵Caishuj huañuj gentecunashnaca, na ima llaquitapash apanajunllu. Shuj runacunashnaca, na asti tucunajunllu.

⁶Shinamandami, paicuna jariyashpa causanaca, coronata churachinshna charin. Ninandapacha llaquichishcahuanmi, churajunahuanshna quilparinajun.

⁷Yapa viracuna cashpami, ñavipash llujshinalla ricunajun. Paicunapaj shungupi munashcata pactachishpapash, ashtahuan yalishpami ruranajun.

⁸Ninanda nalicachishpa rimashpami, ninanda llaquichinatalla parlanajun. Ninanda jariyashpami parlanajun.

⁹Paicunapaj shimihuambash, jahua pachata fiñashpami rimanajun. Paicunapaj jalluhuanga ninanda rimashpami, cai pachapi purinajun.

¹⁰Chaimandami Taita Diosca, pai agllashcacunataca caiman tigrachimunga. Paicunamanmi, yacutapash ashtacatapacha llujchinga.

¹¹Nalicunaca cashnami ninajun: “¿Taita Diosca, imashnata yachanyari? Jahua pachapi causajuj Diosca, ¿imatapash yachanllu?” ninajunmi.

¹²Ricui, Diosta na manllaj caicunaca, cai pachapi ima llaquitapash na japishpallatami, ninanda charijyanajun.

¹³Ñucaca, yangapachami mapa illaj shungu tucushcani. Ñuca ali cashpa, maquita na mapayachishcapash yangallatami.

¹⁴Ashtahuangarin punllandimi asti tucuni. Tucui tutamandacunami macai tucuni.

¹⁵“Ricui, ñucapash paicunashnallata rimashallami” nijushpaca, can Diospaj huahuacunapaj miraicunatami umachiman.

¹⁶Caita yachangapaj ñuca yarijujpica, ñucapaca ninan shinlli ruranapachami carca.

¹⁷Taita Diospaj huasiman ña yaicushpami, paicuna imashna tucurinataca yacharcani.

¹⁸Paicunataca, lluchanallapipachami churashcangui. Shina churashpaca, llaquinayaita tucuchishpami urmachingui.

¹⁹¡Llaquinayaitamari, cungashcapi tucuchi tucunajushca! Ninan llaquita apashpa, manllarishpami tucurinajushca.

²⁰Muscujushpa rijcharij runashnami, can Jatun Diosca jatarishpa, paicuna imashna cajtaca, yangapi churapangui.

²¹Ñuca almaca, ninandapachami llaquirirca. Ñuca shungutapash, tujsinshnami nanahuarca.

²²Ñucaca, yapa juizu illaj cashpami, imatapash na yachai usharcani. Cambaj ñaupajpica, animalshnami carcani.

²³Chashna cashpapash ñucaca, ñuca tucui causaipimi canhuan carcani. Canga ñucataca, ali lado maquimandami charihuarcangui.

²⁴Ali yuyaita can cushcashnallatami pushahuashcangui. Chai jipaca, punchapamba llactapimi chasquihuangui.

²⁵Ñucaca, jahua pachapica pitapash na charinichu, candallami charini. Cai pachapipash, canhuan cashcamandaca, imatapash na charingapaj munanichu.

²⁶Ñuca aichapash, ñuca shungupash ña huañunallami tucujun. Ashtahuangarin jatun Rumishna Diosca, ñuca shungupi ushaita carajmi. Taita Diosca, tucui causaipimi imagutapash carahuan.

²⁷Ricui, canmanda anchurijcunaca chingangami. Canmanda anchurijcunataca, tucuillatami canga tucuchipangui.

²⁸Ashtahuangarin ñucamanda rimashpaca, Taita Diospajman quimirinaca aligupachami. Mandaj Jatun Diostami, shuyashpa causajuni. Can tucui rurashcacunata villangapajmi, chashna causajuni.