Read Imbabura Highland Quichua Psalms 74 Bible Online

Psalms 74 - Imbabura Highland Quichua bible

Psalms 74

¹Yachachingapaj Asaf shuti runa rurashca Salmomi. Taita Dioslla, ¿imamandata ñucanchitaca, causaita causaicaman na yaringapaj shitangui? ¿Imamandata cambaj jihua pambapi purinajuj cambaj llamacunataca, nina japirinshna ñapash fiñarcangui?

²Punda huatacunamanda can agllashca tandanajushca gentecunataca yaripairi. Cambaj aillu cachunmi, llaquimanda quichpichircangui. Can causashca cai Sion shuti urcutapash yaripairi.

³Napacha cutinga alichi ushanalla, llaquinayaita tucuchi tucushcata ricuj shamupairi. Chai fiñajcuna cambaj huasipi tucui nalita rurashcata ricuj shamupairi.

⁴Canda fiñajcunaca, canhuan tandanajushca chaupicunapimi caparinajun. Paicunapaj cajta ricuchingapaca, banderacunatami churarca.

⁵Paicunaca, quiru junda bosque chaupipi jachahuan quiruta cuchunajunshnami.

⁶Cunangarin, labrashca cambaj caspicunataca, jachacunahuan, martillocunahuanmi tucuillata faquirca.

⁷Cambajlla huasitaca, ninahuanmi rupachirca. Cambaj shuti causajun cambaj jatun carpatapash, alpaman shitashpami, yangapi churanajurca.

⁸Paicunapaj shungupica: “Tucuillata tucuchishun” yashpami purinajurca. Taita Diosta yaringapaj tandanajuna huasicunataca, tucuillatamari llactapica rupachirca.

⁹Can ñucanchihuan cajta ricuchijcunataca, na ricushpami causanchi. Can ima nishcata villajcunapash illanmari. Ima punllacunacaman cashna canata yachajpash, ñucanchi purapica na tiapanllu.

¹⁰Taita Dioslla, ¿ima punllacunacamanda ñucanchita llaquichijca, rimashpa pingaichigrin? Canda fiñajcunaca, ¿paicunapaj tucui causaicamanllu cambaj shutitaca nali shimicunahuan rimanga?

¹¹¿Imamandata cambaj maquita pacangui? ¿Imamandata cambaj ali lado maquitaca, quinllulipi pacangui?

¹²Ashtahuangarin Taita Diosca, punda huatacunamandapachami ñucata jatun mandaj cangui. Canmi cai pachapica, jatun macanajuicunata mishashpa quishpichij cangui.

¹³Cambaj ushaihuanmi, mama cuchatapash chaupircangui. Yacucunapi tiaj manllanayai animalcunapaj umacunatacapashmi faquircangui.

¹⁴Leviatán nishca manllanayai animalpaj umacunatapash llapishpami, jichushca pambacunapi causajcunaman micuchun cararcangui.

¹⁵Canmi pugyucunatapash, jatun yacucunatapash llujchircangui. Ninandapacha rijuj jatun yacucunatapash chaquichircanguillami.

¹⁶Punllapash cambajmi, tutapash cambajllatami. Canmi inditapash, lunatapash churarcangui.

¹⁷Canmi, tucui cai pacha maicamanlla canataca churarcangui. Rupai punllacunatapash, tamia punllacunatapash canmi churarcangui.

¹⁸Caita yaripairi: Canda fiñajcunaca, Mandaj Dios candami rimanajurca. Juizu illaj gentecunaca, cambaj shutitami nali shimicunahuan rimanajurca.

¹⁹Cambaj urpigupaj causaitaca, ama millai animalcunaman cupaichu. Llaquita apaj cambajlla tandanajushcacunataca, ama causaita causaicaman cungapaichu.

²⁰Ñucanchihuan ari ninajushcata yaripairi. Llactapi yana yana pushtucunapica, ninandapacha llaquichinacunahaun jundami causanajun.

²¹Ñavita urai cumuchi tucushpa causajtaca, ama cutin pingaichipaichu. Ninan llaquita apaj, imagupash illajcunami, cambaj shutitaca alicachinajunga.

²²Taita Dioslla, jatarishpa canllata jarcaripairi. Punllandi imashna canda nalicachishpa, juizu illaj runa rimajtaca yaripairi.

²³Canda fiñajcuna ninanda caparinajujtaca, ama cungapaichu. Canda fiñashpa jatarijcunami, ashtahuan ashtahuan caparinajun.