Read Imbabura Highland Quichua Psalms 76 Bible Online

Psalms 76 - Imbabura Highland Quichua bible

Psalms 76

¹Cuerdacunahuan tocanacunata tocashpa, candajcunata mandaj candachijuchun, Asaf shuti runa rurashca candana Salmomi. Taita Diosca, Judá llactapica rijsishcami. Israel llactapipash, paipaj shutica jatumbachami.

²Paipaj jatun carpaca, Salem pueblopimi. Pai causajuj huasica, Sion pueblopimi.

³Chaipimi, paita fiñajcunapaj arcota, flechacunata, jarcarina escudota, espadata, ima macanacunacunatapash faquirca. Selah

⁴Canga, punchapambagumi cangui. Animalcunata japina urcucunatapash, ashtahuan yali ushaitami charingui.

⁵Shinlli shungucunaca, quichui tucushpami, rijcharitapash na rijcharishpa puñunajurca. Chai shinlli shungu runa puramandaca, shujllapash na maquita alsarcachu.

⁶Jacobopaj Taita Dioslla, can jarcashpa rimajpimi, carretacunata aisaj caballocunapash, na cuyuri ushanajurca.

⁷Canga, manllana Diosmi capangui. Nina japirinshna can fiñarishca cajpica, ¿pita cambaj ñaupajpica shayari ushangayari?

⁸Jahua pachamandapachami llaquichinataca villarcangui. Shina villajpica, cai pachapi causajcunaca, ninanda manllarishpami casilla quedanajurca.

⁹Taita Dioslla, llaquichingapaj can jatarishpaca, cai pachapi causaj, ali shunguta tucui charijcunata quishpichingapajmi jatarircangui. Selah

¹⁰Runacuna fiñarishca cashpapash, candaca alicachijungapachami. Fiñarijcuna puchushcacunataca, canga llaquichinguimi.

¹¹Imatapash carashapachami nishpaca, chaitaca cangunata Mandaj Taita Diosman cunapachami canguichi. Paipaj muyundipi tucui causajcunaca, manllana Diosman caranacunata apamuichiyari.

¹²Paimi, mandajcunapaj samaitaca tucuchinga. Cai pachata jatun mandajcunapajpash, manllana Diosmi.