Read Imbabura Highland Quichua Psalms 77 Bible Online

Psalms 77 - Imbabura Highland Quichua bible

Psalms 77

¹Candajcunata mandaj Jedutún shuti runa candachijuchun, Asaf shuti runa rurashca Salmomi. Taita Diostaca, ninanda caparishpami mañajurcani. Taita Diostami caparijurcani, paica uyahuangami.

²Ninan llaquita apajui punllapica, Jatun Diostami mascarcani. Tutapash maquita vichai churashpami, na samashpa paita mañajurcanilla. Ñuca almaca, cushijuita na chari usharcachu.

³Taita Diosta yarishpami, ninanda llaquirircani. Aij nijujpillatami, ñuca espiritupash shaijurca. Selah

⁴Taita Dioslla, ñuca ñavi vicharichunllapash na saquihuarcanguichu. Ninan llaquihuan cashpami, rimaitapash na usharcani.

⁵Callarimandapachami, punllacunataca yarijurcani. Huatacunatapash, callari huatacunamandapachami yarijurcani.

⁶Ñuca candashcacunata tuta yarijushpami, ñuca shungupica aligutapacha yarijurcani. Ñuca espiritupash, cashnami tapujurca:

⁷“¿Jatun Diosca, causaita causaicamanllu shitanga? ¿Nacha cutin ñucanchitaca ayudanga?

⁸¿Pai llaquinaca, causaita causaicamanllu tucurishca? Pai imata rurasha nishcapash, ¿tucui causaipajchu tucurishca?

⁹Taita Diosca, ¿llaquinataca cungashcachu? ¿Pai ninanda fiñashcahuanllu, llaquishpa ayudanacunataca vichashca?” nishpami tapujurcani. Selah

¹⁰Cashnami yajurcani: “Caica ñuca nanaimi. Shina cashcamandami, jahua pachapi causajuj Diospaj ali lado maquihuan alicunata rurashca huatacunata yarijusha” yajurcanimi.

¹¹Mandaj Dios rurashcacunatami yarijusha. Ari, ñaupa huatacuna juyaillacunata can rurashcatami yariajusha.

¹²Tucui can rurashcacunatami, aligutapacha yarijusha. Can rurashcacunataca villajushallami.

¹³Taita Dioslla, cambaj ñanga jucha illaj ñangumi. Ñucanchi Taita Dioshuan chimbapurangapaca, ¿maijan diospash jatun tianllu?

¹⁴Can Taita Diosmi, juyaillacunata ruraj cangui. Gente puracunapimi, cambaj ushaitaca ricuchircangui.

¹⁵Cambaj rigrahuanmi, can agllashcacunataca quishpichimurcangui. Paicunaca Jacobopaj, Josepaj miraicunami. Selah

¹⁶Taita Dioslla, yacucunaca candami ricunajurca. Yacucuna canda ricushpaca, manllarinajurcami. Manllanayai ucu ucu yacucunapashmi chujchunajurca.

¹⁷Fuyupash, yacu jundajtami tamiachimurca. Jahua pachapi culun nishpami, cambaj rayocunapash caiman chaiman punchayachirca.

¹⁸Can culun nichishcapash, jatun acapana huairapimi uyarirca. Cambaj punchapamba shitamushcapash, tucui cai pachatami punchayachirca. Alpapash chujchushpami, ninanda cuyurirca.

¹⁹Mama cuchatami, cambaj ñan carca. Ashtaca yacu chaupitami, cambaj chaqui ñan carca. Cambaj chaqui sarushcatapash, pipash na rijsircachu.

²⁰Cambaj agllashcacunataca llamagucunatashnami, Moiseshuan, Aaronhuan pushamurcangui.