Read Imbabura Highland Quichua Psalms 78 Bible Online

Psalms 78 - Imbabura Highland Quichua bible

Psalms 78

¹Asaf shuti runa rurashca Salmomi. Ñuca agllashcacuna, ñuca mandashcata uyaichiyari. Ñuca rimashca shimicunataca, rinrita mañachishpa uyaichiyari.

²Ñuca shimita pascashpami, yarichij shimicunata rimagrini. Ñaupa huatacunamandapacha pacalla tiashcacunatami villagrini.

³Chaicunataca, ñucanchi ñaupa taitacuna parlajpi uyashpami yacharcanchi.

⁴Chaicunataca, paicunapaj huahuacunamambash, na pacashunllu. Jipa miraicunamanmi, Mandaj Diosta alicachinata parlashun. Shinallata ninan ushaita pai charijtapash, ima juyaillacunata rurashcatapashmi parlashun.

⁵Paimi, Jacobopaj mirai israelcunaman imashna causanata yachachishpa, mandashca shimicunatapash churarca. Ñucanchi ñaupa taitacunamanmi, chaicunataca paicunapaj huahuacunaman villachun mandarca.

⁶Jipa miraicunapash, jipaman huacharina huahuacunapash yachachunmi curca. Paicuna jatunyashpa, paicunapaj huahuacunaman villachunmi curca.

⁷Taita Diosta yariashpa causachunmi curca. Taita Dios imata rurashcacunatapash, ama cungachunmi curca. Pai mandashcacunatapash cazuchunmi curca.

⁸Cangunapaj ñaupa taitacunashnaca, na canachu canguichi. Paicunaca shinlli shungupacha tucushca, na cazuj miraicunami carca. Chai miraicunaca, paicunapaj shungutapash na alichirishcachu carca. Paicunapaj espiritupashmi, Taita Diosmanda anchurirca.

⁹Efrainbaj miraicunaca arcocunata, flechacunata charishpapash, macanajui punllapica tigrashpami calpaca.

¹⁰Taita Dioshuan ari nishcataca, na pactachircachu. Pai mandashca shimicunapi nijunshna puringapajpash na munarcachu.

¹¹Ashtahuangarin pai imatalla rurashcatapash, jatun juyaillanacunata ricuchishcatapashmi cunganajurca.

¹²Paicunapaj ñaupa taitacuna ricujtami, juyaillanacunata rurarca. Chaicunataca, Egipto llactapi tiaj Zoán shuti pambapimi rurarca.

¹³Mama cuchata chaupishpami, paicunataca chimbachirca. Yacucunataca, shujlla mundundashna rurashpami jarcarca.

¹⁴Punllapica, fuyuhuanmi pushajurca. Tucui tutapica, ninahuan punchayachishpami pushajurca.

¹⁵Jichushca pambapipash, jaca rumicunata chaupishpami, manllanayai ucu ucu jatun yacucunamandashna yacuta ufiachirca.

¹⁶Jaca rumimandaca, ninanda rijuj yacucunata llujchishpami, jatun yacutashna urai calpachirca.

¹⁷Ashtahuangarin paita fiñashpami, juchata ashtahuan ruranajurca. Jahua pachapi causajuj Diosta, jichushca pambapi fiñashpami, chashna ruranajurca.

¹⁸Chashnami paicunapaj shungupica, paicuna munashca micunata cuchun, Taita Diosta mañashpa fiñachinajurca.

¹⁹Taita Diosta fiñashpami, cashna rimanajurca: “¿Diosca, jichushca pambapica, mezata mandai ushangachu?

²⁰Ricuichi, jatun rumita faquijpimi, yacucunaca llujshirca. Ninanda rijuj yacucunaca, pambacunapipashmi jundarca. ¿Tandatapash carai ushangachu imashi? Pai agllashcacunaman carangapaca, ¿aichatapash charingachu imashi?” ninajurcami.

²¹Chashna ninajujta Mandaj Dios uyashpami, ninandapacha fiñarirca. Jacobopaj mirai israelcunahuanga, nina japirinshnami ñapash fiñarirca.

²²Taita Diostapash na crinajushcamanda, pai quishpichinatapash na yariashpa causanajushcamandami, chashna fiñarirca.

²³Shina cashpapash jahuamandami, fuyuta cachamurca. Jahua pacha pungucunatapashmi pascarca.

²⁴Shina rurashpami, paicuna micunajuchunga, maná shuti micunata tamiachirca. Trigotapash, jahua pachamandami caramurca.

²⁵Runacunaca, alicachi tucushcacunapaj tandatami micunajurca. Micunataca, na ushangacaman micungacamanmi cachamujurca.

²⁶Urai lado huairata, jahua pachapi cuyuchishpami, urai lado huairataca, paipaj ninan ushaihuan cachamurca.

²⁷Chashna rurashpami aichataca, ñutu alpatashna paicunapaj jahuapi tamiachimurca. Jahuata rij alasyu animalcunataca, mama cucha t'iyutashnami tamiachimurca.

²⁸Chai animalcunataca, paicuna causanajuj carpa muyundi chaupicunapimi urmachimurca.

²⁹Chaicunataca, na munajtami micunajurca. Paicuna munashcatami, Diosca pactachirca.

³⁰Paicuna munashcataca, nara chingachishcachu carca. Micunapash shimipirami carca.

³¹Taita Dios ñapash fiñarishpaca, maijan ashtahuan shinlli runacunatami huañuchirca. Agllashca israelcunatami urmachirca.

³²Tucui chaita rurajpipash, juchata ashtahuan ruranajurcarami. Juyaillagucunata pai rurashcatapash, na crinajurcachu.

³³Shinamandami, paicuna causana punllacunataca yangata chingachirca. Paicuna causanajushca huatacunatapash, jatun llaquimanmi tigrachirca.

³⁴Paicunata huañuchijpica, chai horasmi Taita Diosta mascanajurca. Shina rurajpimi, na samashpa ninanda paitaca mascanajurca.

³⁵Paicunaca, Taita Dios paicunata pacaj cajta, jahua pachapi causajuj Taita Dios paicunata quishpichij cajtapashmi yarinajurca.

³⁶Ashtahuangarin, paicunapaj shimihuanga uyanayaita llullashpa parlashpami, paicunapaj jalluhuanga llullanajurca.

³⁷Paicunapaj shunguca, napacha Dioshuan alichu carca. Paihuan ari nishcatapash, napacha ali pactachinajurcachu.

³⁸Ashtahuangarin paica llaquij cashpami, paicuna nalita rurashcatapash cungashpa, paicunataca na tucuchishpa saquirca. Pai ninanda fiñarishca cashpapash, na llaquichishpami cutin cutin saquirca. Yapata fiñarishpa llaquichinatapash jarcarircami.

³⁹Paicunataca, huañuna aichayu runacuna cajtami yarirca. Fucujpi samai llujshishpaca, cutinga na tigramunshna cajtami yarirca.

⁴⁰¡Cutin cutinmari jichushca pambapica, paita na cazunajurca! Imapash na tiaj pambapimari fiñachinajurca.

⁴¹Cutin, cutinmi Taita Diostaca, paicuna munashcata rurachun mañanajurca. Shina rurashpami, israelcunapaj jucha illaj Diostaca fiñachinajurca.

⁴²Llaquinayaita causanajujpi, shuj punlla paipaj maquihuan llujchishcataca, na yarinajurcachu.

⁴³Egiptopica, imatapash rurashpami ricuchijurca. Zoán shuti pambapica, juyaillacunatami rurarca.

⁴⁴Chaipica, pipash ama ufiai ushachunmi, paicunapaj jatun yacucunatapash, ninanda rijuj yacucunatapash yahuarman tigrachirca.

⁴⁵Paicuna puramanllatami, ashtaca millai chuspicunata, sapocunata cacharca. Chaicunami, ima tiashcatapash micushpa tucuchinajurca.

⁴⁶Paicunapaj granocuna fucushcatapash, oruga nishca jurucunamanmi curca. Paicuna tarpushca chagracunatapash, langosta jurucunamanmi curca.

⁴⁷Paicunapaj uvas chagracunataca, runduhuanmi tucuchirca. Jigos yuracunatapash, casahuanmi tucuchirca.

⁴⁸Paicunapaj tucui animalcunatapash, huagracunatapash racu runduhuan, rayohuanmi huañuchirca.

⁴⁹Egiptopi causajcunapaj jahuapimi, nina japirinshna fiñarishcata cacharca. Fiñarishcatapash, ninan llaquitapash, nanaitapashmi cacharca. Tucuchij ashtacata angelcunatami cacharca.

⁵⁰Pai ninanda fiñarishpa huañuchingapaj yarishpami, paicunapaj causai huañunataca na cuidarca. Ashtahuangarin paicunapaj causaitaca, huañuimanmi curca.

⁵¹Egipto llactapica, punda huacharishcacunataca, tucuillatami huañuchirca. Cam shuti runapaj miraicunapaj carpacunapica, shinlli runa cashpa charishca punda churicunatami huañuchirca.

⁵²Pai agllashcacunataca, llamacunata llujchinshnami, Egiptomandaca llujchimurca. Jichushca pambatapash, ashtaca llamacunatashnami pushamurca.

⁵³Imatapash ama manllachunmi, alipacha cuidashpa pushamurca. Paicunata fiñajcunataca, mama cuchami quilparca.

⁵⁴Chai jipaca, Diospajlla llactapaj linderocunamanmi chayachimurca. Paipaj ali lado maquihuan mishashca cai urcumanmi pushamurca.

⁵⁵Israelcunapaj ñaupajpimi, llactacunapi causajcunataca llujchishpa cacharca. Chai jipaca, cabiacunahuan medishpami, alpacunataca chaupishpa cararca. Shina rurashpami, chai runacuna causanajushca huasicunapica, Israel aillucuna causanajuchun churarca.

⁵⁶Shina rurajpipash paicunaca, jahua pachapi causajuj Taita Dios imatalla rurashcata ricungapaj munashpami fiñachinajurca. Imashna causanata pai yachachishca shimicunatapash, na cazunajurcachu.

⁵⁷Ashtahuangarin paicunapaj ñaupa taitacunashnallatami, paita jariyashpa huashaman tigranajurca. Flechata na aliguta shitaj, umachij arcoshnami tucunajurca.

⁵⁸Paicunapaj lomacunapi, altarcunahuanmi fiñachinajurca. Imamambash rijchaj labrashca paicunapaj dioscunahuanmi, ninandapacha fiñachinajurca.

⁵⁹Shina ruranajujta Taita Dios uyashpami, israelcunata fiñashpa ninandapacha na ricunayachirca.

⁶⁰Chaimandami, Silo shuti pueblopi tiajuj paipaj carpataca jichurca. Gentecunapaj chaupipi causajushca carpatami, chashna jichurca.

⁶¹Paipaj ushaita ricuchijujtapash, prezu apachunmi saquirca. Pai punchapamba cajtapash, paita fiñajpaj maquipimi saquirca.

⁶²Pai agllashcacunataca, espadahuan huañuchinajuchunmi curca. Paipaj cachun agllashcacunahuanga, ninandapachami fiñarirca.

⁶³Paicunapaj chairalla viñaicunataca, ninami tucuchirca. Jarihuan nara tacarishca cuitsapajpash, cazaraipi alicachishpa candanaca na tiarcachu.

⁶⁴Paicunapaj curacunaca, espadahuanmi huañuchi tucunajurca. Paicuna huañujpi sapalla tucushca huarmigucunapash, na huacai ushanajurcachu.

⁶⁵Chai jipami Jatun Diosca, puñujushpa rijcharinshna jatarirca. Shuj shinlli runa vinota ufiashpa, machashpa caparijunshnami carca.

⁶⁶Shina jatarishpami paita fiñajcunataca, huashamanda japishpa chugrichirca. Tucui causaicaman rimai tucushpa, pingai tucuchunmi saquirca.

⁶⁷Diosca, Josepaj miraicunapaj carpa huasitaca jichushpami, Efraín aillutaca na agllarca.

⁶⁸Ashtahuangarin Judá aillutami agllarca. Pai juyashca Sion urcutami agllarca.

⁶⁹Chaipimi paipaj huasitaca, cai pachata, causaita causaicaman shinlli shayajuchun churashcashna juyaillagutapacha shayachirca.

⁷⁰Paita servij Davidtami agllarca. Paitaca, llama corralta cuidajtami agllarca.

⁷¹Chairalla huacharishca llamacunata cuidajujtami pushamurca. Diosca, Jacobopaj mirai paipajlla israelcunata michijuchunmi pushamurca.

⁷²Davidca, israelcunataca ali shunguta charishcashnallatami michijurca. Ali yachajushca paipaj maquihuambachami cuidashpa michijurca.