Read Imbabura Highland Quichua Psalms 79 Bible Online

Psalms 79 - Imbabura Highland Quichua bible

Psalms 79

¹Asaf shuti runa rurashca Salmomi. Taita Dioslla, shuj llactapi causajcunami, cambaj llactata japingapaj shamunajurca. Cambajlla huasitapash yangapi churashpami, Jerusalendapash urmachishpa, rumi mundungunatalla saquirca.

²Canda servijcuna huañushcataca, jahuata rij alasyu animalcuna micuchunmi saquirca. Cambajlla causajcuna huañushcataca, cai pachapi tiaj millai animalcuna micuchunmi saquirca.

³Paicunapaj yahuartaca, Jerusalén muyundipimi yacutashna jichanajurca. Paicunata pambangapajpash, pipash na tiarcachu.

⁴Ñucanchica, ladollapi causajcuna rimashpa pingaichijpimi causanajunchi. Ñucanchi muyundi llactacunapi causajcuna na cazushpa, asishpa ricujpimi causanajunchi.

⁵Mandaj Dioslla, ¿ima punllacamanda fiñarishcalla cagripangui? ¿Causaita causaicamanllu fiñarishcalla cagripangui? ¿Nina rupajunshnachu, cambajlla cachun munashpa fiñarishca cagripangui?

⁶Can ninanda fiñarishcataca, canda na rijsij shuj llactacunapaj jahuapi talinshna cacharipairi. Shinallata cambaj shutipi na mañanajuj, shuj llactacunata mandajcunapaj jahuapi cacharipairi.

⁷Jacobopaj miraicunataca, paicunami huañuchinajurca. Paicuna causana huasicunatapash, llaquinayaitami tucuchinajurca.

⁸Ñucanchi ñaupa taitacunapaj nalita rurashcata yarishpaca, ama ñucanchitara llaquichihuaichu. Ashtahuangarin llaquishpa, ñucanchita tuparingapaj ucha shamupairi. Ñavita urai cumuchi tucushcamari causanajunchi.

⁹Ñucanchita quishpichij Taita Dioslla, cambaj juyailla shutimanda ayudahuayari. Cambaj shutita juyaimanda, ñucanchi juchacunata cungashpa, cai llaquimanda cacharichihuayari.

¹⁰Gentecunaca: “¿Paicunapaj Taita Diosca maipitayari?” ninajungami. Canda servijcunata huañuchishpa yahuarta jichashcamandaca, shuj gentecuna yachachun, paicunatapash ñucanchi ricujta chashnallata huañuchipairi.

¹¹Prezucuna aij nishpa huacanajushcapash, cambaj ñaupajman uyaripachun. Huañuchi tucunapacha nishcacunataca, cambaj rigrapi jatun ushaita charinshnallata cuidapairi.

¹²Mandaj Dioslla, ñucanchi ladolla llactacunapi causajcuna canda ninanda nalicachishpa, can alicachi tucushcata huaglichishcamandaca, paicunatapash canchiscaman llaquichipairi.

¹³Shina rurajpica can agllashca ñucanchica, michina pambacunapi micuj llamagushna, causaita causaicaman canda alicachishun. Mirai miraicamanmi, candaca alicachishpa candanajushun.