Read Imbabura Highland Quichua Psalms 80 Bible Online

Psalms 80 - Imbabura Highland Quichua bible

Psalms 80

¹Lirio sisacuna nishpa candana tonopi, candajcunata mandaj candachijuchun, Diosman villashpa Asaf shuti runa rurashca Salmomi. Israelcunata Michij Dioslla, uyahuayari. Canmi Josepaj miraicunataca, llamacunatashna michijupangui. Querubín nishcacunapaj chaupipi causajuj Dioslla, punchayachimupairi.

²Cambaj ninan ushaitaca Efraín aillupaj, Benjamín aillupaj, Manasés aillupaj ñaupajpi ricuchishpa, ñucanchita quishpichingapaj shamupairi.

³Taita Dioslla, ñucanchitaca punda ali causashcashnallata cutin tigrachihuayari. Cambaj ñavihuan punchapamba ricuhuayari. Shina ricujpica, quishpirishcami cashun.

⁴Tucuita Mandaj Taita Dioslla, ¿ima punllacamanda can agllashcacuna mañanajujta na uyangapaj munashpa, can fiñarishcata ricuchigringui?

⁵Viquita jichanatami, micunatashna cararcangui. Viquita jichanatallatami yacutashna, ashtacatapacha ufiachircangui.

⁶Ñucanchitaca, ñucanchi ladolla llactacunapi causajcuna na cazushpa asinajuchunmi saquircangui. Ñucanchita fiñajcunaca, paicuna purami ñucanchita ricushpa asinajun.

⁷Tucuita mandaj Taita Dioslla, ñucanchitaca punda ali causashcashnallata cutin tigrachihuayari. Cambaj ñavihuan punchapamba ricuhuayari. Shina ricujpica, quishpirishcami cashun.

⁸Cai llacta runacunata llujchishpa cachashpami, Egiptomanda can llujchimushca uvas yuracunata tarpunshna churarcangui.

⁹Chai alpataca, paicunapaj ñaupajpi mapa illajta saquijpimi, sapicunapash shinllita sapiyashpa alpapi viñashpa jundarca.

¹⁰Urcucunaca, chai yuracunapaj llandunahuan quilpashcami carca. Taita Diospaj cedro quirucunataca, paicunapaj malquicunahuanmi quilpajurca.

¹¹Paicunapaj malquicunaca, mama cuchacamanmi viñarca. Paicunapaj retoñacunapash, jatun yacucamanmi viñarca.

¹²¿Imamandata chai uvas chagra muyundi jarcashcacunataca faquircangui? Ñanda tucui yalijcunami, uvasta pallashpa yalinajun.

¹³Urcu cuchicunami tucuchijun, sacha animalcunami micujun.

¹⁴Tucuita mandaj Taita Dioslla, cunanda tigramupairi. Cai uvas chagrataca, imashna cajta jahua pachamanda aliguta ricushpa llaquipairi.

¹⁵Cambaj ali lado maquihuan tarpushca yurataca llaquipairi. Cambaj cachun shinllita viñachishca retoñotapash llaquipairi.

¹⁶Cunanga, rupashpami llaquinayaita tucurishca. Shina rurajcunaca, can fiñarishpa shinllita rimajpi tucurichun.

¹⁷Cambaj maquitaca, cambaj ali ladoman tiajuj runapaj jahuapi churapairi. Cambajlla cachun can shinllitapacha churashca, huañuna aichayu runapaj jahuapi churapairi.

¹⁸Shina rurajpimi, canmandaca napacha anchuripashun. Ñucanchimanmi causaita carangui. Shina carajpimi, cambaj shutipi mañapashun.

¹⁹¡Tucuita Mandaj Taita Dioslla, ñucanchitaca punda ali causashcashnallata cutin tigrachihuayari! Cambaj ñavihuan punchapamba ricuhuayari. Shina ricujpica, quishpirishcami cashun.