Read Imbabura Highland Quichua Psalms 81 Bible Online

Psalms 81 - Imbabura Highland Quichua bible

Psalms 81

¹Gitit nishca tonopi, candajcunata mandaj candachijuchun, Asaf shuti runa rurashca Salmomi. Ñucanchipaj shinlli torreshna Taita Diostaca, cushijuihuan candaichi. Jacobopaj Taita Diostaca, ninan cushijuihuan caparishpami alicachina canguichi.

²Tonochishpa candashpa, panderocunata huactaichi. Uyanayaita huacaj arpatapash, salteriotapash tocaichi.

³Luna llullu punllapipash, tocachunllata mandashca punllacunapipash, ñucanchipaj jatun fiesta punllapipashmi, trompetata huacachina canguichi.

⁴Pactachinajuchun cushca cai shimicunaca, israelcunapajmi. Jacobopaj Taita Dios mandashcami.

⁵Egipto llactamanda llujshimujpimi, imashna causanataca Josepaj miraicunahuan callarichishca. Ñuca na yachashca rimaipimi, cashna nij uyarirca:

⁶“Ñucami, paicunapaj rigra jahuamanda llasha aparishcataca anchuchircani. Paicunapaj maquipi llasha canastacunata apanajushcatapashmi saquichirca.

⁷Jatun llaquipi cashpa, ñucata caparishpa mañajpimi, ñucapash candaca cacharichircani. Pipash na yachai ushanalla, culun nijuj ucumandami rimarcani. Meriba shuti yacu manñacunapimi, canguna imashna cajtaca yacharcani. Selah

⁸Ñuca agllashcacunalla, ñucata uyajpica, shinllita tacurishami. Israelcunalla, ñucata uyajpica,

⁹shuj diosca na cangunapaj chaupipi tiangachu. Na rijsishca diostaca, ama cungurishpa causanguichu.

¹⁰Ñucami, cangunata Mandaj Taita Dios cani. Ñucami cangunataca, Egipto llactamanda vichai pushamurcani. Canga shimita pascashpa, ñucata mañanguilla carashallami.

¹¹Ashtahuangarin ñuca agllashcacunaca, ñuca rimashcataca na uyarcachu. Israelcunaca, ñucataca na juyahuarcachu.

¹²Chaimandami, paicunapaj shinlli shungu munashcata ruranajuchun saquircani. Paicunapaj yarishcatallami rurashpa causanajurca.

¹³¡Ñuca agllashca israelcuna, ñuca rimashcata uyashpa, ñuca ñangunapi purijpica,

¹⁴paicunata fiñajcunataca, ñapashmi llaquichiman carcani! Paicunata na ricunayachijcunataca, ñuca maquihuanmi tucuchiman carcani” nijujmi uyarirca.

¹⁵Mandaj Diosta na ricunayachijcuna paita cazushca cajpica, paicuna causana huatacunaca, causaita causanmanmi canman carca.

¹⁶Taita Diosca, ashtahuan ali trigohuanmi charinman carca. Jaca rumimanda balun mishquitami, na munangacaman caranman carca.