Read Imbabura Highland Quichua Psalms 83 Bible Online

Psalms 83 - Imbabura Highland Quichua bible

Psalms 83

¹Asaf shuti runa rurashca candana Salmomi. Taita Dioslla, ama upalla saquipaichu. Taita Dioslla, ama chulunlla, casilla saquipaichu.

²Ricui, canda fiñajcunaca, león huacanshnami caparinajun. Canda na ricunayachijcunaca, umata alsashcami jariyashca purinajun.

³Can agllashcacunata fiñashpami, umachingapaj alipacha yarishpa pacalla tapurinajushca. Can cuidajpi causajcunata llaquichingapajmi, huashalla yarinajushca.

⁴Paicunaca cashnami ninajushca: “Ama llacta tucuchun, tucuchingapaj shamuichi. Israelcunapaj shutita ama yarinajuchun tucuchishunchi” ninajushcami.

⁵Shujllashnalla tucui shungu tandanajushpami, canda llaquichingapaj ari ninajushca.

⁶Carpacunapi causanajuj edomitacuna, ismaelitacuna, moabitacuna, agarenocunapashmi tandanajushca.

⁷Shinallata Gebal llactapi causajcuna, amonitacuna, amalecitacuna, filisteocuna, Tiro shuti pueblopi causajcunapashmi tandanajushca.

⁸Shinallata asiriocunapashmi, paicunahuan tandanajushca. Paicunami Lot runapaj miraicunataca, rigrashna ayudanajushca. Selah

⁹Paicunataca madianitacunatashna, Sísara runatashna rurapairi. Cisón shuti jatun larca yacu ladopi, Jabín shuti runata huañuchishcashnallata huañuchipairi.

¹⁰Paicunaca, Endor pueblopimi huañurca. Paicunaca, pambapi shitashca huanushnami tucurca.

¹¹Paicunapaj soldadocunata mandajcunataca, Oreb shuti, Zeeb shuti runacunatashna huañuchipairi. Zeba shuti, Zalmuna shuti runacunatashna, paicunata mandajcunataca, tucuillata tucuchipairi.

¹²Paicunaca: “Taita Dios causajuj pushtucunataca, ñucanchipaj cachun japishunchi” ninajushcami carca.

¹³Ñuca Taita Dioslla, paicunataca jatun acapanatashna cachapairi. Huaira pundapi rijuj fangacunatashna cachapairi.

¹⁴Paicunataca, sachata rupachij ninashna, bosqueta ninanda rupajuj ninashna tucuchipairi.

¹⁵Cambaj ninan huaira tamiahuan catiriashpa, chashna llaquichipairi. Cambaj jatun acapanahuan manllachipairi.

¹⁶Mandaj Dioslla, can Diosta mascanajuchun paicunapaj ñavitaca, pingaihuan quilpanshna saquipairi.

¹⁷Causaita causaicaman pingaichi tucushpa, musparishpa pandanajuchun. Alicachi tucushcata huaglichi tucushpa tucurinajuchun.

¹⁸Cambaj shutica, Mandaj Dios shuti cajta, jahua pachapi causajuj can Dioslla, tucui cai pachata mandajujta yachanajuchun, chashna rurapangui.