Read Imbabura Highland Quichua Psalms 85 Bible Online

Psalms 85 - Imbabura Highland Quichua bible

Psalms 85

¹Candajcunata mandaj candachijuchun, Coré shuti runapaj miraicunaman rurashca Salmomi. Mandaj Dioslla, cambaj llactapi causajcunahuanga alimi carcangui. Jacobopaj miraicuna prezu apai tucushcataca tigrachimurcanguimi.

²Can agllashcacuna nalita rurashcataca cungaparcanguimi. Paicunapaj tucui juchacunataca, quilpanshnami anchuchircangui. Selah

³Tucui can fiñarishcatami saquircangui. Nina japirinshna can ninanda fiñarishcataca, anchuchircanguimi.

⁴Ñucanchita quishpichij Taita Dioslla, ñucanchitaca punda ali causashcashnalla tigrachihuayari. Can fiñashpa ñucanchita llaquichijushcataca, chaillapi jarcapairi.

⁵¿Causaita causaicaman ñucanchitaca, fiñashcallachu cagringui? ¿Mirai miraicamanllu, canga fiñashpa catigringui?

⁶¿Nachu can agllashcacuna canhuan cushijuchunga, causaita cutin caragripangui?

⁷Mandaj Dioslla, can llaquij cajtaca ñucanchiman ricuchihuayari. Quishpirinatapash, ñucanchiman carahuayari.

⁸Mandaj Taita Dios rimanataca uyapashami. Casilla ali causaita, paipajlla cachun agllashca gentecunaman caranatami villanga. Lococunashna ama maitapash ruranajuchunmi, chashna villanga.

⁹Paita manllajcunapaca, quishpirinaca ladollapachami. Paipaj punchapambaguca, ñucanchi llactapi causachunmi, chashna shuyajun.

¹⁰Llaquij canahuan, na llullaj canahuanga tuparircami. Imatapash cashcatapacha ruranahuan, casilla ali causanahuanga ugllarircami.

¹¹Na llullaj shimica, alpamandami llujshijunga. Imatapash cashcatapacha ruranaca, jahua pachamandapachami ricujunga.

¹²Mandaj Diosllatami, ima alicunatapash caranga. Ñucanchi alpacunapash, ali granotami fucunga.

¹³Imatapash cashcatapacha ruranami, paitaca ñaupashpa rijunga. Pai sarushpa rishcami, ñucanchipaj ñan canga.