Read Imbabura Highland Quichua Psalms 86 Bible Online

Psalms 86 - Imbabura Highland Quichua bible

Psalms 86

¹Diosta David mañashcami. Mandaj Dioslla, aliguta uyahuayari. Ninan llaquihuan, imagupash illajmari cani.

²Canda yariashpa causashcamandaca, ñuca almaguta huacaichihuayari. Ñuca Taita Dioslla, canda yariashpa causaj canda servijtaca quishpichihuayari.

³Mandaj Dioslla, ñucataca llaquihuayari. Candami, tucui punlla caparishpa mañajupani.

⁴Jatun Dioslla, tucui almahuan canda mañashcamandaca, canda servijpaj almaguta cushichihuayari.

⁵Can Jatun Diosca, aligupachami capangui, nalita rurashcatapash cungajmi capangui. Tucui canda mañajcunataca, ninandapacha llaquijmi capangui.

⁶Mandaj Dioslla, ñuca mañajujtaca uyahuayari. Ninandapacha ñuca mañajushca shimicunataca, aliguta uyahuayari.

⁷Canga, ñuca mañashcata tigrachij cajpimi, ninan llaqui punllapica, canda cayapasha.

⁸Jatun Dioslla, dioscuna purapica, canshnalla Diosca pipash na tianllu. Can rurashcacunashnaca, ima rurashcacunapash na tianllu.

⁹Can rurashca tucui llactacunami, can Jatun Diospaj ñaupajman shamushpa, ninanda alicachinajunga. Cambaj shutitaca, punchapambami ninajungami.

¹⁰Canga, jatumbachami capangui. Canllami, imapash juyaillacunata rurangui, canllami Taita Dios cangui.

¹¹Mandaj Dioslla, cambaj ñanguta rijsichihuayari. Cambaj na llullaj ñambimi, ñucaca purijusha. Can Diosta manllashpa causajuchunga, ñuca shunguta shinllichihuayari.

¹²Ñucata Mandaj Taita Dioslla, ñuca tucui shunguhuanmi, candaca alicachijusha. Tucui causaipimi, cambaj shutigutaca, punchapambami nijusha.

¹³Can llaquinaca, ñucapaca jatumbachami. Seol ucucunamandami, ñuca almataca cacharichircangui.

¹⁴Taita Dioslla, jariyashpa jatun tucujcunaca ñucata llaquichingapajmi jatarinajurca. Llaquichijcuna pacalla tandanajushpami, ñucata huañuchingapaj mascanajushca. Paicunaca, candaca na yarinajushcachu.

¹⁵Ashtahuangarin can Jatun Diosca, ninanda llaquij Taita Diosmi capangui. Na ñapash fiñarij, ninanda llaquij, na llullajpashmi capangui.

¹⁶Ñucata ricushpa llaquihuayari. Canda servij cashcamanda, cambaj ushaita carahuayari. Canda servij huarmipaj churitaca huacaichihuayari.

¹⁷Ñucapaj ali cachunga, imagutapash rurashpa ricuchihuayari. Ñucata millanayachijcuna ricushpa pingai tucunajuchun, chashna ricuchihuayari. Ñucataca, can Mandaj Diosmi, ayudashpa cushichihuarcangui.