Read Imbabura Highland Quichua Psalms 88 Bible Online

Psalms 88 - Imbabura Highland Quichua bible

Psalms 88

¹Coré shuti runapaj miraicuna candanajuchun rurashca candana Salmomi. Llaquilla tonopi, candajcunata mandaj candachijuchun, yachachingapaj ezraíta nishca Hemán rurashca Salmomi. Ñucata quishpichij Mandaj Taita Dioslla, punllapash tutapashmi cambaj ñaupajpi caparishpa mañajupani.

²Ñuca mañajushca shimicunaca, cambaj ñaupajman chayapachun. Ñuca caparishpa mañajujtaca, aliguta uyapairi.

³Ñuca almaca, imapash nalicunataca amishcamari. Ñuca causaipash, Seolman rinallamari.

⁴Ñucaca, pambana utujuman urai rijcunahuan, cuentai tucushcami cani. Ushai illaj runashnamari cani.

⁵Huañushca puracunapi jichui tucushcashnamari cani. Espadahuan huañuchi tucushcacuna, utujupi pambai tucushca sirinajunshnami cani. Canga, paicunataca na ashtahuan yaringuichu. Paicunaca, cambaj maquimandami anchuchi tucushca.

⁶Ucu ucu jatun utujupimi shitahuarcangui. Yana yana tutapi, ucu ucu pushtucunapimi churahuarcangui.

⁷Can fiñarishcapash, ñuca jahuapimi tiajun. Yacu jatarijunshna, tucui llaquicunahuanmi llaquichihuarcangui. Selah

⁸Ñuca rijsishcacunatapash, ñucamanda anchuchircanguimi. Paicunapaj ñavipica, millanayachi tucunatami rurahuarcangui. Vichai tucushcami cani, na llujshi ushanica.

⁹Ninan llaquihuan cashpa huacajujpillatami, ñuca ñavipash huaglirca. Mandaj Dioslla, candaca tucui punllacunami cayajuparcani. Maquita vichai churashpami mañajuparcani.

¹⁰Juyaillacunata can rurashcataca, ¿huañushcacunamanllu ricuchigringui? Huañushcacunaca, ¿canda alicachingapaj jataringachu? Selah

¹¹¿Can llaquij cajtaca, pambana utujupi tiajcunachu parlanajunga? Na cashpaca, ¿cambaj na llullaj shimitapash, Abadón nishcapi tiajcunachu parlanajunga?

¹²Juyaillacunata can rurashcataca, ¿yana yana tutapi tiajcunachu yarinajunga? ¿Tucuita cungana pachapi tiajcunachu, imatapash cashcatapacha can rurajtaca yarinajunga?

¹³Mandaj Dioslla, ashtahuangarin ñucaca candami caparishpa mañajuparcani. Tutamandapash ucha jatarishpami, cambaj ñaupajpi mañangapaj ricurisha.

¹⁴Mandaj Dioslla, ¿imamandata ñuca almataca jichungui? ¿Imamandata ñucamanda, cambaj ñavita pacangui?

¹⁵Ñucaca, ninan llaqui, imagupash illajmi cani. Ñucaca, chairalla viñaimandapachami can cachamushca llaquicunata apashpa, manllaihuan causajuni.

¹⁶Can ninanda fiñashcapash, ñuca jahuatami yalijun. Can cachamushca manllaicunapash, ninanda llaquichishpami charihuan.

¹⁷Ñucataca, jatun yacucunashnami na saquishpa muyundi quilpahuashca. Tucuilla tandanajushpami, chaupipi churahuashca.

¹⁸Ñuca ali rijsijtapash, cumbatapashmi ñucamanda caruyachishcangui. Ñuca rijsishcacunatapash, yana yana tutapimi churashcangui.