Read Imbabura Highland Quichua Psalms 92 Bible Online

Psalms 92 - Imbabura Highland Quichua bible

Psalms 92

¹Samana punllapi candana Salmomi. Mandaj Dioslla, canda alicachinaca juyaillagumari. Jahua pachapi causajuj Dioslla, cambaj shutiguta Salmocunahuan candanapash juyaillagumari.

²Can llaquijujta tutamandata villanapash, tucuita can pactachijujta, tutandi villanapash juyaillagumari.

³Chunga cuerdayu tocanata, salteriota tocashpami candajuni. Arpatapash juyailla tonoguta tocashpami candajuni.

⁴Mandaj Dioslla, can tucuita rurashpa ñucata cushichishcamandami, cambaj maquihuan rurashcata ricushpa ninanda cushijuni.

⁵¡Mandaj Dioslla, can rurashcacunaca ninan jatun alicunamari! Cambaj yuyaicunaca, pipash na yachai ushanallacunamari.

⁶Shinlli shungu runaca, na yachanllu. Juizu illaj runapash, chaitaca na yuyaipi japinllu.

⁷Diosta na manllajcunaca, jihuagushna viñashca cashpapash, nalita tucui rurajcunaca sisajunshna cashpapash, causaita causaicaman chingachi tucungapajllami shina tucunajun.

⁸Ashtahuangarin Mandaj Dioslla, canga causaita causaicaman jahua pachapi causajuj Diosmi capangui.

⁹Mandaj Dioslla, canda fiñajcunataca ricupailla. Ricui, canda fiñajcunaca tucuringapachami. Nalita rurajcunaca, tucuicunami caiman chaiman cachai tucunga.

¹⁰Ashtahuangarin canga, búfalo nishca huagratashnami ashtahuan shinllitapacha rurahuangui. Mushuj aceiteta talishpami javi tucusha.

¹¹Ñucata fiñajcunataca, ñuca ñavihuanmi ricujusha. Nalita rurajcuna ñucata fiñashpa jatarijtaca, ñuca rinrihuanmi uyasha.

¹²Imatapash cashcatapacha ruraj runaca, palmera quirushnami sisajunga. Líbano urcupi tiaj cedro quirushnami viñanga.

¹³Paicunaca, Mandaj Diospaj huasipi tarpushcashnami canga. Ñucanchi Taita Diospaj huasi patiocunapi sisanshnami canga.

¹⁴Ña rucugu cashpapash, fucujlla yuracunashnami canga. Paicunaca shinllicunapacha, verdella yuracunashnami canga.

¹⁵Chashna cashpami paicunaca, cashna nishpa villanajunga: “Ñucanchi shinlli torreshna Mandaj Diosca, aligutalla rurajmi. Paipica, ima juchachinapash na tianllu” ninajungami.