Read Imbabura Highland Quichua Psalms 95 Bible Online

Psalms 95 - Imbabura Highland Quichua bible

Psalms 95

¹Mandaj Diostaca, cushijuihuan caparishpa candaj shamuichi. Ñucanchi quishpirina jatun Rumishna Diostaca, ninan cushijuihuan candashunchi.

²Paipaj ñaupajman chayashpa alicachishunchi. Juyailla candanacunahuan caparishpa candashunchi.

³Mandaj Taita Diosca jatun Diosmi, tucui dioscunatapash yali Jatun Mandajmi.

⁴Alpa ucucunapash, paipaj maquipimi. Jatun urcucunapash paipajmi.

⁵Mama cuchapash, pai rurashcamandaca paipajmi. Chaquishca alpatapash, paipaj maquihuanmi rurarca.

⁶Shamuichi, paipaj ñaupajpi urai cumurishpa, ninanda alicachishunchi. Ñucanchita ruraj, Mandaj Diospaj ñaupajpi cungurishunchi.

⁷Paimi, ñucanchi Taita Dios. Ñucanchica, pai michina pambacunapi causaj gentecunami canchi. Paipaj maquihuan cuidajpi causaj llamagucunashnami canchi. Cunan, pai rimashcata uyashpaca,

⁸Meriba shuti pambapishnallataca, na shinlli shungu tucunachu canguichi. Masah shuti jichushca pambapi purinajushca punllapishnallataca, na tucunachu canguichi.

⁹Chaipimi, cangunapaj ñaupa taitacunaca, paicuna munashcata rurachun mañashpa fiñachihuarca. Shinallata imata rurajta ricungapaj munashpami, ñuca imata rurashcacunatapash ricunajurca.

¹⁰Chaimandami chuscu chunga huatacunata, paicunahuanga fiñarishca carcani. Shinamandami paicunataca, cashna nircani: “Cai gentecunaca, paicunapaj shungupi pandarishpami anchurinajun. Ñuca mandashcacunatapash, na rijsinllu” nircanimi.

¹¹Chaimandami ninanda fiñarishpa, cashna nishpa juramenturcani: “Ñuca samachina llactapica, napacha yaicungachu” nircanimi.