Read Imbabura Highland Quichua Psalms 99 Bible Online

Psalms 99 - Imbabura Highland Quichua bible

Psalms 99

¹Mandaj Diosmi mandajun, gentecunaca chujchunajungami. Paica, querubín nishcacunapaj jahuapimi tiajun. Tucui cai pachami cuyuringa.

²Mandaj Diosca, Sion pueblopica jatunmari. Tucui gentecunata yali jatunyachi tucushcamari.

³Manllana cambaj jatun shutitaca alicachinajuchun. Paica jucha illajmi.

⁴Punchapamba tiajuj Jatun Mandajca, aliguta ricushpa mandanatami juyan. Canmi, aliguta ruranataca shinllitapacha churangui. Canmi Jacobopaj miraipica, aliguta ricushpa mandashpa, imatapash cashcatapacha rurarcangui.

⁵Ñucanchita Mandaj Taita Diostami, jatumbi churana canguichi. Pai tiajuj chaqui ñaupajpi cungurichi. Paica jucha illajmi.

⁶Moiseshuan, Aaronhuanga, paipaj cura purami carca. Samuelca, paipaj shutipi mañaj puracunami carca. Mandaj Diosta mañajpica, paica tigrachinllami carca.

⁷Pilarshna shayajuj fuyumandami, paicunahuanga parlajurca. Paicunaca, imashna causanata pai yachachishcatapash pactachinajuchun cushca shimicunatapash, pactachishpami causanajurca.

⁸Ñucanchita Mandaj Taita Dioslla, canmi paicuna mañashcataca tigrachinlla carcangui. Paicuna nalita rurashcata cungajlla Taita Diosmi carcangui. Shinallata paicuna imatalla rurashcacunamandaca, chashnallata cujllami carcangui.

⁹Ñucanchita Mandaj Taita Diosta jatumbi churaichiyari. Ñucanchita Mandaj Diosca, jucha illaj Taita Dios cashcamanda, paipajlla urcu ñaupajpi cungurichiyari.