Read Imbabura Highland Quichua PROVERBIOS 1 Bible Online

PROVERBIOS 1 - Imbabura Highland Quichua bible

PROVERBIOS 1

¹Yarichij cai shimicunataca, Davidpaj churi, israelcunata jatun mandaj Salomón escribishcami.

²Cai shimicunaca ali yachaitapash, yachachishcatapash yachangapajmi. Aligutapacha yarishpa purina ali yuyaicunata rijsingapajmi.

³Aligutapacha yarishpa puringapaj, ali yuyaita cushcata chasquingapajmi. Imatapash cashcatapacha ruranata, ali yuyaita charinata, tucuipaj ali cachun ruranata yachachingapajmi.

⁴Nara yachajushcacunaman ali yachaita cungapajmi. Shinallata chairalla viñaicunamambash, ali yuyaita, aliguta yarishpa causanata yachachingapajmi.

⁵Alipacha yachajushca runa uyashpaca, ashtahuanmi yachajunga. Shinallata ali yuyaita charij runapash, ali yuyaita cushcataca chasquingami.

⁶Yarichij shimicunata yachachishca shimicunata yachangapajmi. Alipacha yachajushcacuna yachachishca shimicunata, na yachai ushanalla shimicunata yachangapajmi.

⁷Alipacha yachajushpa callarinaca, Mandaj Diostami manllashpa causana. Ashtahuangarin juizu illajcunaca, ali yachaita yachachishcatapash yangapimi churan.

⁸Ñuca huahualla, ali causachun cambaj taita yachachishcataca, aliguta uyangui. Ali causachun cambaj mama yachachishcatapash, ama yangapi churanguichu.

⁹Cai yachachishcacunaca, juyailla coronata cambaj umapi churachishcashnami canga. Juyaillaguta cungapi huatachishcashnami canga.

¹⁰Ñuca huahualla, juchata rurajcuna umachingapaj munajpica, ama uyanguichu.

¹¹Candaca cashna ninajungapashchari: “Jacu ñucanchihuan. Huañuchishpa yahuarta jichangapaj, pacalla chapagrishun. Ima nalitapash na ruraj runata pacalla japishpaca, yangamanda huañuchishunllami.

¹²Seolshnami causajta langashun. Manllanayai ucu ucu yacucunapi huashajuchinshnami, tucuillata langashun.

¹³Tucui ima tiashcacunatami tarishun. Ima charishcacunata quichushpami, ñucanchi huasicunapipash jundachishun.

¹⁴Cambash ñucanchipura tucushpa ricuilla. Ñucanchica, shuj muchilapillami tucuillata tandachishun” ninajungapashchari.

¹⁵Ñuca huahualla, paicunahuanga na purinachu cangui. Paicuna purina ñanmandaca, anchurinami cangui.

¹⁶Nalita rurangapaca, calpashpami rinajun. Huañuchishpa yahuarta jichangapajpash, uchami rinajun.

¹⁷Alasyu tucui animalcuna ricujtaca, yangallatami linllita churanga.

¹⁸Ashtahuangarin chai runacunaca, paicunapaj llaquipajllatami, pacalla chapariashpa llaquichinajun. Paicunapaj llaquipajllatami lazuta churanajun.

¹⁹Ñapash charijyangapaj ninandapacha munajcunapaj causaica, chashnami tucujun. Chai charishcallatami, chai charijcunataca causaita quichun.

²⁰Ali yachaica, ñangunapi caparishpami cayajun. Plazacunapimi ninanda caparijun.

²¹Jatun tandanajuicunapimi, caparishpa villajun. Puebloman yaicuna pungucunapimi, paipaj yuyaicunataca cashna nishpa villajun:

²²“Nara yachajushcacuna, ¿ima horascamanda na yachajushpa causangapaj munanguichi? Asishpa ricujcuna, ¿ima horascamanda asishpa ricunajungapajlla munanguichi? Juizu illajcuna, ¿ima horascamanda ali yachaitaca fiñajunalla canguichi?

²³Ñuca jarcashpa rimashcata uyashpa tigrarimuichiyari. Ricuichi, cangunapaj jahuapica, ñuca Espiritutami talinshna cachamusha. Ñuca shimicunatapash yachachunmi villajusha.

²⁴Cangunaca mashnata cayajpipash, na uyangapaj munashpami causarcanguichi. Maquita chutashpa cayajpipash, pipash na uyangapaj munarcachu.

²⁵Ashtahuangarin ali yuyaita ñuca cujpipash, yangapimi churarcanguichi. Jarcashpa ñuca rimashcatapash na uyangapaj munashpami causarcanguichi.

²⁶Cangunata jatun llaqui japijpica, ñucapash asishami. Canguna manllashca llaquicuna japijpipash, asishpami ricusha.

²⁷Canguna manllashca llaquicunaca, tucuchinashnami shamunga. Jatun llaquicunaca, jatun acapanashnami chayamunga. Ninanda llaquichi tucuna, ninan llaquicunami cangunataca japinga.

²⁸Chai llaquicuna japijpimi, ñucata cayanajunga. Shina cayanajujpica, ñucapash na tigrachishachu. Ñucataca, tutamandatami mascanajunga. Shina mascashpapash, ñucataca na tarihuangachu.

²⁹Ali yachaita millanayachishpami, Mandaj Diosta manllanataca na munanajurca.

³⁰Ali yuyaita ñuca cushcata uyangapajpash, na munanajurcachu. Jarcashpa rimajpipash, yangapimi churanajurca.

³¹Paicunapaj causaipi ima nalita rurashpa, tarpushcatallatami micunshna causanajunga. Paicuna yarishcata ruranajushpallatami millanayachinajunga.

³²Imatapash na yachajcunataca, paicunapaj panda causaillatami huañuchinga. Shinlli shungucuna cushijushpa causashcapash, chingaimanmi apanga.

³³Ashtahuangarin ñucata uyashpaca, imatallapash na manllashpami causanga. Ima llaqui japinatapash na manllashpa, aligutami causanga” nishpami villajun.