Read Imbabura Highland Quichua PROVERBIOS 10 Bible Online

PROVERBIOS 10 - Imbabura Highland Quichua bible

PROVERBIOS 10

¹Salomón yarichishca shimicunami. Alipacha yachajushca churica, taitata cushichinmi. Ashtahuangarin shinlli shungu churica, mamata llaquichinmi.

²Nalita rurashpa imatalla charishcacunaca, ima alipajpash na cangachu. Ashtahuangarin imatapash cashcatapacha ruranaca, huañuimanda cacharichinmi.

³Mandaj Diosca, imatapash cashcatapacha rurajtaca, yarjaimanda llaquita apachunga na saquingachu. Ashtahuangarin Diosta na manllajcunataca, nalita rurashcallatami llaquichinga.

⁴Imata ruranatapash na munajcunapaj maquica, imagutapash na charijta ruranllami. Ashtahuangarin imata cashpapash ucha rurajcunapaj maquica, charijyachinmi.

⁵Rupai punllacunapi granota tandachij runaca, alipacha yachajushcami. Ashtahuangarin cozechana punllacunapash puñujujlla churica, pingaichij churimi.

⁶Imatapash cashcatapacha ruraj runaca, ninadami bendiciai tucunga. Ashtahuangarin Diosta na manllajcunataca, paicuna ninanda llaquichishcallatami, shimita quilpanga.

⁷Imatapash cashcatapacha rurajtaca, ali cashcamandami, yariashpa alicachinajunga. Ashtahuangarin Diosta na manllajcunapaj shutica, ismunshnami chinganga.

⁸Alipacha yachajushcapaj shungupillami, mandashcacunataca chasquin. Ashtahuangarin nali shimicunata rimaj, shinlli shungu runaca urmangallami.

⁹Ima nalitapash na ruraj runaca, imatapash na manllanllu. Ashtahuangarin nalita rurashpa purij runaca, ninandami llaquichi tucunga.

¹⁰Nalita rurangapaj ñavita capitsij runaca, llaquitami apamun. Nali shimicunata rimaj, shinlli shungu runaca llaquichi tucungami.

¹¹Imatapash cashcatapacha ruraj runapaj shimica, causaita cuj yacu llujshijunshnami. Ashtahuangarin Diosta na manllajcunataca, paicuna ninanda llaquichishcashnallatami shimita quilpanga.

¹²Na ricunayachishpalla purinaca, fiñanajuitami jatarichin. Ashtahuangarin juyaica tucui nalitapash, quilpanshnami cungachin.

¹³Aligutapacha yarishpa purij runapaj shimipica, ali yachaimi tian. Ashtahuangarin vara caspica, na aliguta yarishpa causajcunapaj huashapi astingapajmi.

¹⁴Alipacha yachajushcacunaca, ali yachaita alichinmi. Ashtahuangarin shinlli shungu runapaj shimica, ñapash llaquipi churanllami.

¹⁵Charij runapaca, ashtacata charishcapash jatun pircahuan muyundi jarcashca puebloshnami. Imagutapash na charijcunaca, imagupash illashcamandami, shaijushcashna causanajun.

¹⁶Imatapash cashcatapacha ruraj runaca, causaipajmi imatapash ruran. Ashtahuangarin Diosta na manllaj runaca, imata rurashpapash juchatallami mirachin.

¹⁷Yachachishcata cazunaca, causaiman pushaj ñanmi. Ashtahuangarin jarcashpa rimashcata yangapi churaj runaca, pandarinllami.

¹⁸Shungu ucupilla fiñaj runaca, llullashpallami parlajun. Pitapash yanga juchachishpa parlashpa purij runaca, shinlli shungu runami.

¹⁹Imatapash ninandapacha parlanajujpica, juchapash na illanllu. Ashtahuangarin ima parlotapash jarcarij runaca, aligutapacha yarishpami purinajun.

²⁰Imatapash cashcatapacha ruraj runapaj shimica, ali culquita agllashcashnami. Ashtahuangarin Diosta na manllajcunapaj shunguca, imapash illanshnallatami.

²¹Imatapash cashcatapacha rurajcunapaj shimihuanga, ashtacunata michinshnami yachachijun. Ashtahuangarin shinlli shungu runacunaca, yuyaita na japimandami huañunajun.

²²Mandaj Dios bendiciamushcami charijyachin. Chaihuanga, ima llaquitapash na mirachinllu.

²³Juizu illaj runapaca nalita ruranaca, pugllashpa cushijunashnami. Ashtahuangarin yuyaita charij runataca, ali yachaimi cushichijun.

²⁴Diosta na manllaj runa imata manllashcapash, chaillatami shamunga. Ashtahuangarin imatapash cashcatapacha rurajcunamanmi, paicuna munashcata caramunga.

²⁵Nalita ruraj runaca, jatun acapana yalinshna ñapash chinganllami. Ashtahuangarin imatapash cashcatapacha ruraj runaca, causaita causajunllami.

²⁶Imata rurangapajpash na munaj runata imata rurachun cachajcunapaca, quirupi vinagre chayanshna, ñavipi cushni yaicunshnami.

²⁷Mandaj Diosta manllanami, causana punllacunata mirachimunga. Ashtahuangarin paita na manllajcuna causana huatacunaca, ñapashmi tucurimunga.

²⁸Imatapash cashcatapacha ruraj runacuna shuyanaca, cushijunami. Ashtahuangarin Diosta na manllajcuna shuyanaca, chingangallami.

²⁹Mandaj Diospaj ñanga, ima pandatapash na rurajcunataca, shinlli torreshnami jarcan. Ashtahuangarin nalita rurajcunapaca, chingaiman apana ñanmi.

³⁰Imatapash cashcatapacha ruraj runaca, ima horapash na cuyuchi tucungachu. Ashtahuangarin Diosta na manllajcunaca, cai pachapica na causanajungallachu.

³¹Imatapash cashcatapacha ruraj runapaj shimica, ali yachaitami mirachinga. Ashtahuangarin jatun nalita rimaj runataca, jallutami fitinga.

³²Imatapash cashcatapacha ruraj runaca, cushijunatami parlanata yachan. Ashtahuangarin Diosta na manllajcunapaj shimica, jatun nalitallami riman.