Read Imbabura Highland Quichua PROVERBIOS 11 Bible Online

PROVERBIOS 11 - Imbabura Highland Quichua bible

PROVERBIOS 11

¹Nali pezaj balanzatami, Mandaj Diosca millanayachin. Ashtahuangarin ali pezashcataca cushijunmi.

²Jariyashpa jatun tucujcunaca, alicachi tucushcatapash huaglichi tucunllami. Ashtahuangarin ali yachaica, na jariyashcacunahuanmi.

³Ima nalitapash na rurashpa, aligutalla rurajcunataca, ali ñandami pushanga. Ashtahuangarin juchata rurajcunataca, paicuna jatun nalita rurashcallatami tucuchinga.

⁴Dios fiñashpa llaquichijui punllapica, imata charishcapash yangallatami canga. Ashtahuangarin imatapash cashcatapacha rurashcami, huañuimanda cacharichinga.

⁵Ima pandatapash na ruraj runa imatapash cashcatapacha rurashcami, pai purina ñandaca derechanga. Ashtahuangarin Diosta na manllaj runaca, paillata na manllashcamandami urmanga.

⁶Aliguta rurajcunataca, imatapash cashcatapacha rurashcallatami cacharichinga. Ashtahuangarin juchata rurajcunaca, paicunapaj juchapillatami japi tucunga.

⁷Diosta na manllaj runa huañujpica, pai shuyajushcapash tucurinmi. Nalita ruraj runacuna imatalla yarinajushcapashmi tucuringa.

⁸Imatapash cashcatapacha ruraj runaca, ninan llaquimandapash cacharichi tucunmi. Ashtahuangarin paipaj randica, paita na manllaj runatami llaquipi churan.

⁹Mishqui shimi jayaj shungu runaca, paipaj shimi rimashcahuanmi, cumba runaguta llaquipi churan. Ashtahuangarin imatapash cashcatapacha rurajcunaca, alipacha yachajushcahuanmi cacharichi tucun.

¹⁰Imatapash cashcatapacha rurajcuna ali cajpica, pueblopi causajcunapash cushijunmi. Ashtahuangarin Diosta na manllajcuna huañujpica, fiestatami ruranajun.

¹¹Aliguta rurajcunata bendiciajpimi, pueblopash jatunyachi tucushca canga. Ashtahuangarin Diosta na manllajcunapaj shimica, chingachi tucungami.

¹²Ali yuyaita na charij runaca, paipaj cumba runagutallata yangapi churanllami. Ashtahuangarin aligutapacha yarishpa purij runaca, jarcarishpa upalla quedanllami.

¹³Parlashpalla purij runaca, na parlanallatapash parlanllami. Ashtahuangarin ali yuyaita charij runaca, tucuita pacalla alichinllami.

¹⁴Alipacha yachajushca mandaj na tiajpica, llactapash llaquipimi urman. Ashtahuangarin ali yuyaita cujcuna taucacuna tiajpica, ima llaquipash na japinllu.

¹⁵Na rijsishca runapaj garante tucuj runaca, ninan llaquipachami tucun. Ashtahuangarin divi tucunata na ricunayachij runaca, manllai illajmi causajunga.

¹⁶Aliguta yarij huarmica, alicachi tucushcami canga. Shinllitapacha imatapash rurajcunaca, charijyangami.

¹⁷Pitapash llaquij runaca, paipaj almapajmi alita ruran. Ashtahuangarin pitapash na llaquishpa ninanda llaquichij runaca, paillatami llaquipi yaicun.

¹⁸Diosta na manllaj runaca, imapash umachinatallami ruran. Ashtahuangarin tarpunshna imatapash cashcatapacha ruraj runaca, na tucurinalla alicunatami japinga.

¹⁹Imashnami imatapash cashcatapacha ruranaca causaiman pushan, shinallatami nalita rurashpa catijpash, paillata huañuiman ringapaj chashna rurajun.

²⁰Mandaj Diosca, jatun nali shungu runacunataca millanayachinmi. Ashtahuangarin ima pandatapash na rurashpa causajcunami, paipaj ñaupajpi juyaillagu ricurin.

²¹Nalita ruraj runaca cunan cashpa, jipaman cashpapash llaquichi tucungapachami. Ashtahuangarin imatapash cashcatapacha ruraj runacunapaj miraicunaca, cacharichi tucungami.

²²Juyailla ñavi cashpapash, ali yuyaita na charij huarmica, cuchipaj singapi oro sarcillota churachishcashnami.

²³Imatapash cashcatapacha rurajcunaca, alita ruranatallami munan. Ashtahuangarin Diosta na manllajcunaca, fiñanajuitallami shuyanajun.

²⁴Imatapash na mitsashpa carajcunaca, ashtahuanmi charijyanajun. Huaquingunaca, paipajlla cachun ninandapacha mitsashpa charishpami, imapash illaj tucunajun.

²⁵Shujcunaman imagutapash carana yuyaita charij runaca, tucuipimi ali llujshin. Shujcunaman na munangacaman caraj runaca, paipashmi na munangacaman micunga.

²⁶Granocunata pacashpa ninanda alichij runataca, tucui gentecunami ima llaquipash japishpami ali canman ninajunga. Ashtahuangarin na alichishpa jatuj runapaj jahuapica, bendiciangami.

²⁷Shujcunaman alita rurangapaj munaj runaca, paitapash ayudachun munanmi. Ashtahuangarin llaquichingapaj munaj runataca, chai llaquillatami japinga.

²⁸Ima charishcacunatalla yariashpa causaj runaca urmangami. Ashtahuangarin imatapash cashcatapacha rurajcunaca, quiru malquicuna verdeyanshnami canga.

²⁹Paipaj huasi ucu puratapash na cuidaj runaca, yanga huairatalla japinshnami japinga. Shinlli shungu runaca, shungupi aliguta yachajushca runata servishpami causanga.

³⁰Imatapash cashcatapacha ruraj runa imaguta rurashcapash, causaita cuj yurashnami. Alma quishpirichun villaj runaca, alipacha yachajushcami.

³¹Imatapash cashcatapacha ruraj runapaca, cai pachapi japina tiangapachami. ¡Diosta na manllashpa juchata ruraj runacarin, llaquita japingapachami!