Read Imbabura Highland Quichua PROVERBIOS 13 Bible Online

PROVERBIOS 13 - Imbabura Highland Quichua bible

PROVERBIOS 13

¹Alipacha yachajushca churica, ali yuyaita taita cushcataca chasquinmi. Ashtahuangarin asishpa ricuj churica, jarcashpa rimashcacunataca napacha uyanllu.

²Runacunaca alita rimashpaca, alitallatami japinga. Ashtahuangarin yachashpata na cazujcunapaj almaca, llaquitami japinga.

³Cacharishcata rimanata jarcarij runaca, paipaj almatami huacaichin. Ashtahuangarin shimi cacharishca runataca, ninan llaquimi japinga.

⁴Imata rurangapajpash na munaj runapaj shungupi imata munashpapash, napacha japinllu. Ashtahuangarin imata cashpapash ucha rurajcunapaj shungupi imata munashcapash, tucuimi ali llujshinga.

⁵Imatapash cashcatapacha ruraj runaca, llulla shimitaca fiñanmi. Ashtahuangarin Diosta na manllaj runaca, paillatami fiñai tucushpa pingaichi tucunga.

⁶Ima pandatapash na rurashpa causaj runataca, imatapash cashcatapacha rurashcami huacaichin. Ashtahuangarin juchata ruraj runataca, Diosta na manllashcallatami urmachinga.

⁷Huaquingunaca imata na charishpapash, charij runashnalla tucunllami. Huaquingunaca charij cashpapash, imagupash illaj runashnallami purin.

⁸Charij runaca, imamanda huañuchingapaj munajpipash, culquihuanmi quishpirin. Ashtahuangarin imagutapash na charij runaca, huañuchisha nishpa manllachijpipash, na manllanllu.

⁹Imatapash cashcatapacha rurajcunaca, micha rupajunshnami cushijuita charinga. Ashtahuangarin Diosta na manllajcunaca, lámpara micha huañunshnami tucunga.

¹⁰Jariyashpa jatun tucujcunaca, fiñanajuitami jatarichinga. Ashtahuangarin ali yachaica, ali yuyaita cushcata chasquijcunahuanmi.

¹¹Yangalla charishcacunaca, tucurishpa catingallami. Ashtahuangarin imagutapash ucha ruraj runaca, ashtahuanmi mirachin.

¹²Imata shuyajushcapash na ucha pactajpica, shungupimi ninanda llaquirin. Ashtahuangarin imata munajushcapash pactajpica, causaita cuj yurashnami.

¹³Imata rurachun mandashcata yangapi churaj runaca, chaimandallatami jatun llaquita apanga. Ashtahuangarin mandashcata manllashpa cazuj runaca, alitami japinga.

¹⁴Alipacha yachajushca runa mandashca shimicunaca, causaita cuj yacu llujshijunshnami. Chai shimicunaca, huañuna lazucunapi urmanamanda caruyachingapajmi ali.

¹⁵Ali yuyaitacunaca, cushijuipimi churan. Ashtahuangarin na cazujcunapaj causaica, llaquilla causaimi.

¹⁶Aligutapacha yarishpa purij tucui runacunaca, ali yachaihuanmi imatapash ruranajun. Ashtahuangarin shinlli shungu runaca, shinlli shungu cashcatallatami ricuchinga.

¹⁷Imata villachun cachajpipash, nali villaj runaca llaquitami apamun. Ashtahuangarin cashcatapacha villaj runaca, jambishna cushichinatami apamun.

¹⁸Ali yuyaita cushcata yangapi churaj runaca, pingai tucunata, imagupash illaj canatallami japinga. Ashtahuangarin ali tucuchun rimashcata chasquij runaca, alicachi tucungami.

¹⁹Imaguta munashcapash pactajpica, shungupash cushijunmi. Ashtahuangarin shinlli shungu runacunaca, jatun nalita ruranata saquingapaca millanayachinmi.

²⁰Alipacha yachajushca runacunahuan tandanajuj runaca, alipacha yachajushcami canga. Ashtahuangarin shinlli shungu runacunahuan tandanajuj runaca, ninandami llaquichi tucunga.

²¹Juchata rurajcunataca, llaquicunallami catiriajun. Ashtahuangarin imatapash cashcatapacha rurajcunaca, imapash alicunatami japinajunga.

²²Alita ruraj runaca, imata charishcatapash, paipaj huahuacunapaj huahuacunamanmi saquinga. Ashtahuangarin juchata ruraj runa imata charishcapash, imatapash cashcatapacha ruraj runapajmi alichishca tiajun.

²³Imagutapash na charijcunapaj pambapica, ashtacatapachami fucun. Ashtahuangarin aliguta ricushpa mandajcuna illajpimi, imaguta tandachinatapash na charin.

²⁴Na llaquichishpa charij taitaca, paipaj churitallatami millanayachin. Ashtahuangarin juyashpaca, uchillamandapachami llaquichishpa yachachijun.

²⁵Imatapash cashcatapacha ruraj runaca, paipaj shungupash cushijujtami micun. Ashtahuangarin Diosta na manllajcunaca, yarjaimi purin.