Read Imbabura Highland Quichua PROVERBIOS 14 Bible Online

PROVERBIOS 14 - Imbabura Highland Quichua bible

PROVERBIOS 14

¹Alipacha yachajushca huarmica, paipaj huasi ucu purataca, aliguta huasichinshnami charin. Ashtahuangarin shinlli shungu huarmica, paipaj maquihuan urmachinshnami charin.

²Aligutalla rurashpa causaj runaca, Mandaj Diosta manllanmi. Ashtahuangarin jatun nalita ruraj runaca, yangapimi churan.

³Shinlli shungu runapaj shimimandaca, jariyashpa jatun tucunami, varahuan llaquichinshna llujshin. Ashtahuangarin alipacha yachajushcacunapaj shimica, imamandapash huacaichingami.

⁴Yapungapaj huagracuna illajpica, granota alichinapash chushajmi. Ashtahuangarin shinlli huagracuna tiajpimi, granocunataca llashajta tandachin.

⁵Shinapacha cashcata villaj runaca, na llullangachu. Ashtahuangarin llulla runaca, llullacunatallami villanga.

⁶Na cazushpa asij runaca, ali yachaita mascashpapash, napacha tarinllu. Ashtahuangarin ali yachajushca runapaca, ali yachaita yachajunaca fangallami.

⁷Shinlli shungu runapaj ñaupajmandaca anchuringuilla. Paipica, ali yachajuchun rimashcataca na taringuichu.

⁸Aligutapacha yarishpa purij runapaj yachajushcahuanga, pai imashna causajushcatami aliguta yarijun. Ashtahuangarin shinlli shungu runacunaca, nalicuna cashpami umachishpalla causanajun.

⁹Shinlli shungu runacunaca, ima juchata rurashpapash asinllami. Ashtahuangarin aliguta ruraj purapica, alita ruranatami munan.

¹⁰Alma llaquilla cajpipash, paipaj shungupillami yachan. Cushijui tiajpipash, na rijsishcacunaca na yachai ushangachu.

¹¹Diosta na manllajcunapaj huasica, llaquinayaitami tucuchi tucunga. Ashtahuangarin aliguta rurajcunapaj carpaca, sisajunshnami ricuringa.

¹²Runapaj causaipica, ali ñanshnallami ricurin. Ashtahuangarin tucuripica, huañuiman apaj ñanmi.

¹³Asijushpapash shungupica, llaquitallatami charinga. Cushijushca jipaca, llaquillami quedanga.

¹⁴Shinlli shungu runaca, paipaj nali causaitallatami millanayachinga. Ashtahuangarin ali runaguca, paipaj causaimandaca cushijungami.

¹⁵Na yachajushca runaca, imata nijpipash tucuita crinllami. Ashtahuangarin ali yachajushca runaca, imata rurangapajpash aliguta yarinrami.

¹⁶Alipacha yachajushca runaca, nalita ruranata manllashpa caruyanmi. Ashtahuangarin juizu illaj runaca, yapata jariyashpami purin.

¹⁷Ñapash fiñarij runaca, juizu illaj runashna imapash cachun rurangallami. Jatun nalita ruraj runaca, millanayachi tucungami.

¹⁸Na yachajushcacunaca, shinlli shungu canatallami japinga. Ashtahuangarin aligutapacha yarishpa purijcunaca, ali yachaitami coronata churajunshna japinga.

¹⁹Nalita ruraj runacunaca, ali shungu runacunapaj ñaupajpimi cumurinajunga. Diosta na manllajcunaca, imatapash cashcatapacha rurajpaj huasi pungupimi cumurinajunga.

²⁰Imagutapash na charij runagutaca, paipaj cumbapashmi na ricunayachin. Ashtahuangarin charij runataca, taucacunami juyan.

²¹Paipaj cumba runaguta yangapi churashpaca, juchatami ruran. Ashtahuangarin imagutapash na charijcunata llaquij runaca, ninandami cushijun.

²²Nalita yarijcunaca, ¿nachu pandarinajun? Alita yarijcunaca, juyai tucunata, na llullaj canatami japinga.

²³Tucui imata rurashcamandapash, japina tianmi. Ashtahuangarin yanga parlotalla parlashpa causajcunaca, imapash illajmi tucunajun.

²⁴Alipacha yachajushca runacunapaca, imata charishcapash coronashnami. Ashtahuangarin juizu illaj runacunaca, shinlli shungu cashpami muspayanajun.

²⁵Na llullashpa villaj runaca, almata quishpichinmi. Ashtahuangarin umachij runaca, llullacunatami villajun.

²⁶Mandaj Diosta manllajcunaca, paita ninandapacha yariashpami causanajun. Paicunapaj churicunapash, imaguta shuyanatapash charingami.

²⁷Mandaj Diosta manllanaca, causaita cuj yacu llujshijunshnami. Shina manllanaca, huañuchij lazucunamanda caruyachingapajmi ali.

²⁸Jatun mandajca, ashtaca gentecunata mandajushpami cushijun. Ashtahuangarin huaquinlla gentecuna tiajpica, mandajca ushaita na charinllu.

²⁹Na ñapash fiñarij runaca, ali yuyaitapachami charin. Ashtahuangarin shungupi ñapash fiñarij runaca, shinlli shungu cajtami ñapash ricuchijun.

³⁰Cushilla shunguca, cuerpomambash causaita cunmi. Ashtahuangarin imatapash ñucapaj cashcanman yashpa ricunaca, tullucunata ismuchinshnami.

³¹Imagutapash na charijcunata llaquichishpa charij runaca, paita Ruraj Diostami llaquichijun. Ashtahuangarin imagutapash na charijcunata llaquij runaca, Diostami alicachijun.

³²Diosta na manllaj runaca, paillata jatun nalita rurashcamandami, llaquiman shitai tucunga. Ashtahuangarin imatapash cashcatapacha ruraj runaca, huañushpapash alita japinatami shuyan.

³³Ali yachaica, aligutapacha yarishpa purij runapaj shungupimi tian. Ashtahuangarin shinlli shungu runacunaca, na rijsinllu.

³⁴Imatapash cashcatapacha rurajcunami, llactataca jatunyachin. Ashtahuangarin juchaca, llactacunataca pingaipimi churan.

³⁵Jatun mandajca, paita servij runa ali yuyaita charijpica juyanmi. Ashtahuangarin paita pingaichij runataca fiñashpami llaquichin.