Read Imbabura Highland Quichua PROVERBIOS 15 Bible Online

PROVERBIOS 15 - Imbabura Highland Quichua bible

PROVERBIOS 15

¹Aliguta parlashpa tigrachij shimica, ninanda fiñarishcatapash anchuchinmi. Ashtahuangarin shinllita rimashca shimica, ñapashmi ashtahuan fiñachin.

²Alipacha yachajushcacunapaj jalluca, ali yachaitaca juyaillaguta alicachishpami rimanga. Ashtahuangarin shinlli shungu runacunaca, napash rimanacunatami rimanga.

³Mandaj Diospaj ñavihuanga, tucui maipipashmi ricujun. Alicunatapash, nalicunatapashmi ricujun.

⁴Fiñarishcatapash alichij jalluca, causaita cuj yurashnami. Ashtahuangarin jatun nali jalluca, shunguta llaquichingapajllami.

⁵Shinlli shungu churica, ali yuyaita taita cushcatapash yangapimi churan. Ashtahuangarin jarcashpa rimajta cazuj churica, aligutapacha yarishpami causanga.

⁶Imatapash cashcatapacha ruraj runapaj huasipica, ima cashpapash ashtacapachami tian. Ashtahuangarin Diosta na manllaj runa imata charishcapash, chaillatami pandachijun.

⁷Alipacha yachajushcacunapaj shimica, ali muyuta jichanshnami, ali yachaita rimanajun. Ashtahuangarin shinlli shungu runacunapaj shunguca, na chashnachu.

⁸Mandaj Diosca, nalita rurajcuna animalta carashpa huañuchishcataca millanayachinmi. Ashtahuangarin alita rurajcuna mañajpica cushijunmi.

⁹Mandaj Diosca, paita na manllaj runa imatalla rurashcataca millanayachinmi. Ashtahuangarin imatapash cashcatapacha rurashpa causajtaca, paica juyanmi.

¹⁰Ali ñanda saquij runata, ali tucuchun rimashcapash, paipica llaquichishcami ricurin. Ali tucuchun rimashcata millanayachij runaca, huañungami.

¹¹Seolpash, Abadonbash, Mandaj Diospaj ñaupajpimi. Runacunapaj shungutacarin, ¿imashpata na yachangayari?

¹²Na cazushpa asij runaca, paita jarcashpa rimajtaca fiñanmi. Alipacha yachajushca runacunahuambash, na tandanajunllu.

¹³Cushilla shunguta charij runaca, ñavipash cushillami. Ashtahuangarin shungupi llaquilla cajpimi, yuyaipash llaquilla.

¹⁴Shungupi ali yuyaita charij runami, ali yachaita mascan. Ashtahuangarin shinlli shungu runacunapaj shimica, shinlli shungu canatallami micunshna causan.

¹⁵Llaquilla causajuj runapaj causaipica, punllandimi ashtahuan llaqui shamun. Ashtahuangarin cushilla causajuj runapaj shungupica, punllandi jatun micuita ruranshnami causanajun.

¹⁶Ashtaca charishcacunahuan pandarijungapaj randica, ashagutalla charishpapash, Mandaj Diosta manllashpa causanami ashtahuan ali.

¹⁷Virayashca huagra aichata micushpapash, fiñanajushpalla causangapaj randica, aicha illaj caldogutalla micushpapash, juyarishpa causanami ashtahuan ali.

¹⁸Ñapash ninanda fiñarij runaca, fiñanajushpa rimaringapajllami jatarin. Ashtahuangarin na ñapash fiñarij runaca, fiñanajuitapash alichinmi.

¹⁹Imata rurangapajpash na munaj runapaj ñanga, cashahuan jarcashcashnami. Ashtahuangarin aligutalla rurajcuna purina ñanga, rumihuan llambullaguta rurashcashnami.

²⁰Alipacha yachajushca churica, paipaj taitatami cushichin. Ashtahuangarin shinlli shungu runaca, paipaj mamatami yangapi churan.

²¹Ali yuyaita na charij runapaca, shinlli shungu causanaca cushijuimi. Ashtahuangarin ali yuyaita charij runaca, paipaj causaitami alichirin.

²²Ali yuyaita pipash na cujpica, yuyaicunaca llaquimi tucun. Ashtahuangarin ali yuyaita taucacuna cujpimi, shinllipacha tucun.

²³Runaca, ali shimicunata tigrachishpami cushijun. ¡Ali shimicunata parlachun munashca horaspi parlashpacarin alipachamari!

²⁴Ali yuyaita charij runapaj ñanga, causaiman apajuj vichaiman rina ñanmi. Seolman urai apajuj ñanmanda anchuringapajmi, chashna rijun.

²⁵Jariyashca runacunapaj huasitaca, Mandaj Diosmi llaquinayaita tucuchinga. Ashtahuangarin sapalla mamagu charishca alpataca, paillatami shinllitapacha cuidanga.

²⁶Nali runa yarijushcacunaca, Mandaj Diospaca millanayaimi. Ashtahuangarin ima nali yuyaitapash na charijcuna rimashcacunaca, mapa illajmi.

²⁷Imatapash ninandapacha munaj runaca, paipaj huasi ucu puramanllatami llaquita apamun. Ashtahuangarin culquita pacalla cujpi japingapaj na munaj runaca causangami.

²⁸Imatapash cashcatapacha ruraj runaca, imata tigrachingapajpash, shungupi aliguta yarinrami. Ashtahuangarin Diosta na manllajcunaca, shimi cacharishcata ninanda rimanllami.

²⁹Mandaj Diosca, paita na manllajcunamandaca carupimi. Ashtahuangarin imatapash cashcatapacha rurajcuna mañajtaca uyanmi.

³⁰Cushilla ñavihuan ricujpica, shungupash cushijunmi. Ali villaicunata villashcacunaca, tullucunatapash shinllichinmi.

³¹Causanata yachajuchun shinlli tacurishcata chasquij runaca, alipacha yachajushca runacunahuanmi causanga.

³²Cazuchun rimashcata yangapi churaj runaca, quiquin almatallatami yangapi churan. Ashtahuangarin ali tucuchun rimashcata cazuj runaca, ali yuyaitami charin.

³³Mandaj Diosta manllashpa causanaca, ali yachaitami yachachijun. Alicachi tucushpa causangapaca, na jariyashpa causanachu.