Read Imbabura Highland Quichua PROVERBIOS 16 Bible Online

PROVERBIOS 16 - Imbabura Highland Quichua bible

PROVERBIOS 16

¹Imatalla ruranataca, gentecunami shungupi yarinajun. Shina cajpipash, Mandaj Diosmi imata rimachumbash mandajun.

²Runaca, paipaj tucui causaipi imata rurashpapash, aligutallami rurajuni yajunmi. Ashtahuangarin Mandaj Diosmi yuyaicunataca, pezanshna ricujun.

³Can imatalla ruranatapash, Mandaj Diospaj maquipi mingangui. Chashnami, can imata yarijushcapash ali llujshinga.

⁴Mandaj Diosca, tucuitami paipajllata cachun rurashca. Diosta na manllaj runatapashmi, llaqui punllapaj charijun.

⁵Mandaj Diosca, jariyashca shunguta charijcunataca, tucuicunatami millanayachin. Paicunataca llaquichingapachami.

⁶Juchata rurajtaca llaquishpa, na llullashpami jarcashpa rimana. Runacunaca, Mandaj Diosta manllashpami, nalita ruranamanda anchurin.

⁷Mandaj Diosta cushichishpa causaj runataca, paita fiñajcunamambashmi, paihuan casilla ali causaita charina yuyaita cun.

⁸Ashtahuangarin imatapash cashcatapacha na rurashpata, imatapash ashtacata charingapaj randica, imatapash cashcatapacha rurashpa ashagutalla japinami ashtahuan ali.

⁹Imatalla ruranataca, gentecunami shungupi yarinajun. Shina cajpipash Mandaj Diosmi, paicunapaj ñandaca alichijun.

¹⁰Jatun mandajca, Dios yarichishcatami riman. Fiñanajuita alichinapipash, yachashpata na cazuj runashnaca na rimajungachu.

¹¹Pezanapash, balanzapash, na umashpa pezanaca, Mandaj Diospajmi. Muchilapi alichina pezana rumicunatapash, paillatami rurashca.

¹²Jatun mandajcuna, jatun nalita ruranaca millanayaimi. Ashtahuangarin imatapash cashcatapacha rurashpami mandangapaj tiarinapica, shinllitapacha tianajunga.

¹³Imatapash cashcatapacha rimashca shimicunaca, jatun mandajcunapaca cushijuimi. Paicunami, aligutapacha rimajtaca juyan.

¹⁴Jatun mandaj ninanda fiñarishcapash, huañuchinatami villajun. Ashtahuangarin aliguta yachajushca runaca, huañuchinata jarcangami.

¹⁵Jatun mandaj cushilla ñavihuan cajpica, causaimi tian. Pai ali cashcapash, jipa tamia fuyushnami.

¹⁶Ali yachaita japinaca, ashtahuan ali orotapash yalimi. Ali yuyaita japinaca, culquitapash yali ashtahuan alimi.

¹⁷Aligutalla rurajcunaca, nalimanda anchurinmi. Nalita ruranamanda jarcarijcunami, quiquin causaita alichinajun.

¹⁸Nara llaqui japijpillami, jariyashpa causanajun. Nara urmashpallami, yuyaipi jariyashpa causanajun.

¹⁹Macanajushpa quichushcacunata jariyashcacunahuan chaupirinajunapaj randica, na jariyashcacunahuan tandanajushpa, na jariyashca shunguta charinami ashtahuan ali.

²⁰Yachachishca shimicunata ali yachajushca runami, alita taringa. Mandaj Diosta yariashpa causaj runaca, ninandami cushijun.

²¹Paipaj shungupi aliguta yachajushca runataca, aligutapacha yarishpami purin ninajunmi. Mishqui shimicunata rimashcacunaca, ali yachaitami ashtahuan mirachin.

²²Ali yuyaita japij runapaca, causaita cuj yacu llujshijunshnami. Ashtahuangarin shinlli shungu runacuna yachajushpaca, shinlli shungu canatallami yachajun.

²³Aliguta yachajushca runapaj shunguca, aligutapacha yarichishpami rimachin. Ashtahuan ali shimicunatallami rimachin.

²⁴Juyailla rimashcacunaca, balun mishquishnami. Almatapash cushichinmi, tullucunapajpash jambimi.

²⁵Runapaj causaipica, ali ñanshnallami ricurin. Ashtahuangarin tucurimuipica, huañuiman apaj ñanmi.

²⁶Imatalla rurangapaj ninanda munaj runaca, paipajllatami ruran. Pai micungapaj munashpallatami, imatallapash ruran.

²⁷Jatun nalita ruraj runaca, nalita ruranataca allanshnami mascan. Paipaj shimipipash, nina rupajunshnami tian.

²⁸Jatun nalita ruraj runaca, fiñanajuitami callarichin. Imatapash parlajlla runaca, ali cumbacunatapash shicanyachinllami.

²⁹Nalita ruraj runaca, paipaj cumbamanllatami uyanayaita llullashpa parlan. Shina llullashpami, nali ñambi churan.

³⁰Ñavita vichashpami, jatun nalita ruranataca yarijun. Shimihuan rimashpallata, nalita ruranllami.

³¹Imatapash cashcatapacha rurashpa causajcunaca, rucu cashpapash ali cajta ricuchijuj coronata churajushcashnami.

³²Ninan shinlli runapaj randica, na ñapash fiñarij runami ashtahuan ali. Paipaj munaita jarcarij runaca, shuj pueblota japij runatapash ashtahuan yali alimi.

³³Migllapimi suertetaca ruranajun. Ashtahuangarin Mandaj Diosmi, imata ruranataca ricuchijun.