Read Imbabura Highland Quichua PROVERBIOS 19 Bible Online

PROVERBIOS 19 - Imbabura Highland Quichua bible

PROVERBIOS 19

¹Muspa runashna, jatun nalita rimashpa llaquichij runapaj randica, imaguta na charishpapash ima nalitapash na rurashpa causanami ashtahuan ali.

²Ali yachaita na charij runapaj shunguca nalichu. Maimambash ucha calpaj runaca, juchata ruranllami.

³Juizu illaj runaca, paipaj causaipimi pandarijun. Chai jipaca, paipaj shungupica, Mandaj Diostami ninanda fiñan.

⁴Charij cajpica, cumbacunapash ashtacami tian. Ashtahuangarin imagutapash na charij runataca, paipaj cumbapash cunganllami.

⁵Yangamanda juchachishpa villagrij runaca, llaquichi tucungapachami. Llullacunata parlaj runaca, napacha pacajui ushangachu.

⁶Imatapash na mitsashpa caraj runagu ayudachunga, taucacunami mascan. Shina caraj runahuanga, cumba tucunllami.

⁷Imagutapash na charij runagutaca, tucui paipaj huauquicunapashmi millanayachin. ¡Paipaj cumbacunacarin, paimandaca caruyangallami! Paica parlangapaj mascashpapash, na taringachu.

⁸Ali yuyaita charij runaca, paipaj almata juyanmi. Ali yuyaita huacaichij runaca, alita taringami.

⁹Yangamanda juchachishpa villagrij runaca, llaquichi tucungapachami. Llullacunata parlaj runaca huañungapachami.

¹⁰Shinlli shungu runa juyailla charishcacunaca nalichu. ¡Shinallata servij runara, mandajcunapaj mandaj tucunacarin napacha alichu!

¹¹Aliguta yarishpa causaj runaca, ñapash fiñarishpapash jarcarinmi. Fiñachijpipash upalla yalij runami, alicachi tucun.

¹²Jatun mandaj fiñarishpaca, león huacanshnami manllachin. Pai ali rurashcapash, jihua jahuapi jamzi paramu urmashcashnami.

¹³Shinlli shungu churica, taitata llaquichishpallami causan. Fiñarishpa rimajujlla huarmipash, cati cati tamia yacu shutujunshnami.

¹⁴Taitamandaca huasita, imatalla charinacunatami chasquinchi. Ashtahuangarin Mandaj Diosca, aligutapacha yarishpa causaj huarmigutami caran.

¹⁵Imata ruranatapash na munaj runaca, huañushcashna puñujunllami. Imatapash na ucha rurangapaj munaj runapaj causaica, yarjaimi causanga.

¹⁶Mandashcata pactachij runaca, paipaj almatami huacaichin. Ashtahuangarin paipaj causaita yangapi churaj runaca, huañungami.

¹⁷Imagutapash na charij runaguman imagutapash caraj runaca, Mandaj Diosman mañachishcashnami charin. Chashna alita rurashcamandaca, paimambash tigrachingami.

¹⁸Cambaj churitaca uchilla cajpillatami, llaquichina cangui. Ashtahuangarin cambaj shungupica, ama huañuchina yuyaihuan llaquichinguichu.

¹⁹Yapata fiñarij runaca, llaquichi tucungami. Ninandapacha llaquichij runaca, ashtahuan nalicunatami mirachijunga.

²⁰Rucuyashpapash alipacha yachajushca cangapaca, ali yuyaita cushcatapash uyangui, ali tucuchun rimashcatapash chasquingui.

²¹Runapaj shungupica, caita chaitami yarijun. Ashtahuangarin Mandaj Dios ali yuyaita cushcami pactanga.

²²Llaquishpa imagutapash ruraj runacunaca cushijunmi. Ashtahuangarin llulla runapaj randica, imagutapash na charij runagumi ashtahuan ali.

²³Mandaj Diosta manllanaca, causaita charingapajmi. Paita manllashpaca, ninanda cushijushpa samashpami causanga. Shina causajujpica, ima llaquipash na japingachu.

²⁴Imata ruranatapash na munaj runaca, micuna platopi maquita satijushpapash, paipaj shimimanllapash na churangachu.

²⁵Na cazushpa asij runata chugrichijta ricushpaca, na yachajushca runapash cazunata yachajungami. Ali yuyaita charij runacarin ali tucuchun rimajpillata, ali yachaita japingallami.

²⁶Taitapajta imata shuhuajpash, mamata huasimanda llujchishpa cachajpash, pingaichi tucunata, nalicachishpa rimai tucunatalla apamuj churimi.

²⁷Ñuca huahualla, nali yuyaicunata yachachishcata uyanataca saqui. Chai yuyaicunami, alipacha yachajushca cachun yachachij yuyaicunataca jarcan.

²⁸Yangamanda juchachij jatun nalita ruraj runaca, llaquichinajujpipash asishpami ricunga. Diosta na manllajcunaca, nalita rurashcata pacashpa na villanllu.

²⁹Na cazushpa asijcunata ninanda llaquichinaca, alichishcami tiajun. Shinlli shungu runacunapaj huashapi, astinacunapash alichishcami tiajun.