Read Imbabura Highland Quichua PROVERBIOS 2 Bible Online

PROVERBIOS 2 - Imbabura Highland Quichua bible

PROVERBIOS 2

¹Ñuca huahualla, ñuca yachachishca shimicunataca chasquilla. Ñuca mandashcacunatapash, cambaj shungupi alichingui.

²Ali yachaitaca, aliguta uyangui. Aliguta yarishpa purinatapash, tucui shunguhuan munangui.

³Ali yachaitaca, caparishpa mañangui. Aliguta yarishpa purinataca, shinlli mañangui.

⁴Culquita mascanshna mascangui. Imapash ninan valishcacunata ninanda mascanshna mascangui.

⁵Shina rurashpami, Mandaj Diosta manllanataca yachajungui. Taita Diospaj ali yachaitapashmi taringui.

⁶Mandaj Diosmi, ali yachaitaca caramujun. Paipaj shimimandami ali yachajushca canapash, ali yuyaita charinapash shamun.

⁷Paimi, alita rurajcunamambash, na pandachij ali yachaita caramujun. Aligutalla rurashpa causajcunapaca, jarcarina escudoshnami.

⁸Alita rurashpa purina ñangunataca cuidanmi. Paipajlla causajcunapaj ñandapash cuidanmi.

⁹Shina cuidajpimi, imatapash cashcatapacha ruranata, ali yuyaita charinata, tucuipaj ali cachun ruranata, tucuipi ali causanatapash yachangui.

¹⁰Cai ali yachaicuna cambaj shunguman chayajpi, cambaj yachaipash, cambaj almapaj aligu cajpica,

¹¹cai ali shimicunaca, canda alichingami. Cai ali yuyaicunaca, imamandapash cuidangami.

¹²Nali causanamandapash, jatun nalita rimaj runacunamandapash cacharichingapajmi, chashna cuidanga.

¹³Chai runacunaca, amsa ñangunata puringapajmi, ali ñangunataca saquinajun.

¹⁴Paicunaca, nalita rurashpami cushijunajun. Paicuna yacharishca jatun nalicunatalla rurashpami, ninanda asinajun.

¹⁵Paicuna purina ñangunaca, quingu ñangunami. Paicunapaj ñangunaca, quingu ñangunami.

¹⁶Na rijsishca huarmimandaca, cacharichi tucunguimi. Juyailla rimashpa, shujpaj huarmi urmachinamandapash cacharichi tucunguimi.

¹⁷Chai huarmica, chairalla viñai cashpa cazarashca cusata jichushpami, paipaj Taita Dioshuan ari ninajushcatapash cungan.

¹⁸Chaimandami chai huarmipaj huasica, huañuiman ashtahuan apajun. Pai purina ñangunaca, huañushcacunapajmanmi chayachijun.

¹⁹Chai huarmipi tucui chayajcunaca, na tigrangachu. Causaiman rina ñandaca, cutinga na catingachu.

²⁰Shinami canga, alitalla rurajcunapaj ñanda purina cangui. Imatapash cashcatapacha rurajcuna purina ñangunatami, catina cangui.

²¹Aligutalla rurajcunallami, llactapica causanajunga. Ima pandatapash na rurajcunallami, llactapica causashpa catinga.

²²Ashtahuangarin Diosta na manllajcunaca, llactamanda anchuchi tucungami. Yachashpata na cazujcunapash, sapimanda llujchinshnami shitai tucunga.