Read Imbabura Highland Quichua PROVERBIOS 20 Bible Online

PROVERBIOS 20 - Imbabura Highland Quichua bible

PROVERBIOS 20

¹Vinoca, na cazushpa asichunmi ruran. Sidrapash, ninanda caparishpa rimachunmi ruran. Chaicunahuan machashpa pandarij runaca, na alipacha yachajushcachu.

²Jatun mandaj ninanda fiñarishpaca, león huacanshnami manllachin. Ñapash fiñarishpaca, paillatami juchata ruran.

³Fiñanajunata saquij runaca, alicachi tucunmi. Ashtahuangarin juizu illajcunaca, tucuicunami chai fiñanajuipi yaicun.

⁴Imata ruranatapash na munaj runaca, tamiajunmi nishpami na yapun. Chai runaca, cozechana punllapi mañashpapash, imatapash na taringachu.

⁵Shungupi charishca yuyaicunaca, ucu ucucaman yacushnami. Ashtahuangarin ali yachajushca runallami, chaitaca taringa.

⁶Taucacunami, alitami ruranchi nirinajun. Ashtahuangarin na llullaj runataca, ¿pita taringayari?

⁷Imatapash cashcatapacha ruraj runaca, ima nalitapash na ruranllu. Paipaj jipaca, huahuacunapash cushijushcami causan.

⁸Aliguta ricushpa mandangapaj tiarinapi tiarij jatun mandajca, tucui nalita rurashcataca ñavi ricuihuanllatami llujchishpa cachanga.

⁹¿Pita: “Ñuca shungupica, mapa illajmi cani. Ñami jucha illaj cani” ni ushangayari?

¹⁰Nali pezanatapash, nali medinatapash, ishcanditallatami Mandaj Diosca millanayachin.

¹¹Alita rurajtapash, na mapata rurashpa, aligutalla rurajtapash huambrara cajpillata ricunallami.

¹²Ricuj ñavitapash, uyaj rinritapash, ishcanditallatami Mandaj Dios churashca.

¹³Ama imagupash illaj causangapaca, puñuitaca na juyanachu cangui. Puñuita saquishpa ñavita pascashpaca, na ushajtami micungui.

¹⁴Randij runaca: “Nalichu, nalichu” ninllami. Ashtahuangarin ña ricushpaca, alicachirishpami cushijun.

¹⁵Oropash, punchapamba juyailla ashtaca rumicunapashmi tian. Ashtahuangarin aligutapacha yarishpa parlajcunapaj shimica, juyaillaguta rurashca oroshnami.

¹⁶Na rijsishca runapaj garante tucuj runapaj churajunata japinguilla. Na rijsishcacunapaj garante tucuj runapajtaca, imatallapash prenda japingui.

¹⁷Umachishpalla micunata japij runapaca, mishquillagumi. Ashtahuangarin chai jipaca, cascajo rumicunata shimipi jundachishcashnami canga.

¹⁸Imata yarijushcapash, aliguta yarichishcahuanmi ali llujshin. Alipacha yachajushca yuyaihuan mandashpami, jatun macanajuitapash ruran.

¹⁹Imatapash parlajlla runaca, na parlanallatapash parlanllami. Shina jallu cacharishca runahuanga, ama tandanajunguichu.

²⁰Paipaj taitata, na cashpaca paipaj mamata, ima llaquipash japishpami ali canman nij runaca, manllanayai yana yana tutapi lámpara micha huañunshnami tucunga.

²¹Callaripi ñapash muspaita japishpa charishcacunaca, jipamanmi na bendiciai tucunga.

²²Ama: “Ñucapash llaquichishapachami” ninguichu. Ashtahuangarin Mandaj Diostalla shuyangui, paimi quishpichinga.

²³Nali pezanacunataca, Mandaj Diosca millanayachinmi. Nali pezaj balanzaca, napacha alichu.

²⁴Gentecunapaj causaica, Mandaj Diospajmi. Runaca, paipaj causaitaca, ¿imashnata yachangayari?

²⁵Diosman imagutapash carashami nishpa, ñapash ari nishca jipara aliguta yarinaca, runapaca lazupi japi tucunashnami.

²⁶Alipacha yachajushca jatun mandajca, Diosta na manllajcunataca huairachinshna, ruedacunahuan llapichinshnami llaquichin.

²⁷Runapaj espirituca, Mandaj Dios cushca lamparashnami. Chaimandami, ñucanchi shungu ucupi ima yuyai tiajtapash, callarishpa ricujun.

²⁸Jatun mandajtaca llaquij canapash, na llullaj canapashmi huacaichin. Juyaj cashpallami, pai mandangapaj tiarinataca shinllipacha charin.

²⁹Chairalla viñaicunaca, shinllicuna cashpami alicachirishpa purinajun. Rucucunaca, ña rucuyashpami juyailla ricurinajun.

³⁰Ninanda astishpa chugrichishcapash, nalita ruraj runapaca jambimi. Shinllita llaquichishcapash, shungumanda mapa yuyaita anchuchinmi.