Read Imbabura Highland Quichua PROVERBIOS 22 Bible Online

PROVERBIOS 22 - Imbabura Highland Quichua bible

PROVERBIOS 22

¹Alicachi tucunaca, ninan charij canatapash ashtahuan yali alimari. Tucuicuna rijsishca canaca, culquitapash, orotapash ashtahuan yali alimari.

²Charij runapash, imaguta na charij runapashmi tuparinajun. Shina cajpipash ishcanditallatami, Mandaj Dios rurashca.

³Ali yuyaita charij runaca, ima llaqui japinata ricushpaca pacajunmi. Ashtahuangarin na yachajushca runacunaca, yangata rishpa llaquichi tucunllami.

⁴Mandaj Diosta manllashpa, na jariyashpa causashcamandaca, charijyanatapash, alicachi tucunatapash, causaitapashmi japinajun.

⁵Jatun nalita ruraj runapaj ñambica cashacunapash, lazucunapashmi tian. Paipaj almata huacaichijca, chai ñangunamanda anchuringami.

⁶Huahuataca, ali causaita yachachingui. Shina yachachijpica rucuyashpapash, napacha cungangachu.

⁷Charij runami, imagutapash na charijcunata mandajun. Culquita mañashpa japij runapash, culquita mañachij runapaj servijmi tucun.

⁸Ima nalitapash tarpunshna nalita ruraj runaca, nalitallatami tandachinga. Yapata jariyashpa, mandajushca vara caspipash faquiringami.

⁹Llaquishpa imagutapash caraj runaca, bendiciai tucungami. Imagutapash na charijcunaman micunata carashcamandami, chashna canga.

¹⁰Na cazushpa asij runata llujchishpa cachajpica, fiñanajushpa rimarinapash illangami. Fiñanajushpa rimarinapash, pingai tucunapash tucuringami.

¹¹Shungupi mapa illaj canata ninanda munaj runaca, paipaj shimihuan juyaillaguta parlashcamandami, jatun mandajpaj ali cumba tucunga.

¹²Mandaj Diosca, ali yachaita charijcunatami cuidariajun. Ashtahuangarin yachashpata na cazujcuna imata ruranajujpipash, paica pandachishpami tucuchin.

¹³Imata ruranatapash na munaj runaca: “Leonmari canllapi, chapajun, ñambi huañuchi tucushamari” nijunmi.

¹⁴Na rijsishca huarmi rimashca shimicunaca, ucu ucuta allashca utujushnami. Mandaj Dios fiñashca runaca, chaipimi urmanga.

¹⁵Chairalla viñai huambrapaj shungupica, shinlli shungu canaca huatarishcashnami. Ashtahuangarin jamzi varahuan astishpa yachachijpica, chai yuyaicunaca anchuringami.

¹⁶Ashtahuan charijyangapaj, imagutapash na charij runata llaquichishpa charishpapash, na cashpaca charijman carashpapash, imatapash na charijmi tucunga.

¹⁷Alipacha yachajushcacuna yachachishca shimicunataca, rinrira mañachishpa uyangui. Ñuca cushca ali yachaitapash, tucui shunguhuan pactachingui.

¹⁸Cai shimicunata cambaj shungupi alichijpica, mishquillagumi canga. Chashnami cambaj shimipipash, shinllitapacha charingui.

¹⁹Cai shimicunataca, Mandaj Diosta yariashpa causachunmi, cunanga canmambash yachachijurcani.

²⁰Ali yuyaita cushpapash, aliguta yachajuchumbash, ¿nachu quimsacaman escribircani?

²¹Cai na llullaj shimicunataca, chashnapacha cajta can yachashpa, na llullaj shimitaca, canda cachamujcunaman apashpa cutin tigrachunmi escribircani.

²²Imagutapash na charij runataca, imagutapash na charishcamanda, ama imagutapash shuhuanguichu. Llaquita apaj runatapash, pueblo pungupi mandajcunaman cushpa, ama llaquichinguichu.

²³Mandaj Diosmi, paicunamandaca shayaringa. Paicunata quichujcunataca, paillatami causaita quichunga.

²⁴Ñapash fiñarijlla runahuanga, ama tandanajunguichu. Fiñarijlla runahuanga, ama cumba tucunguichu.

²⁵Pactarallapash paicunashna yachajushpara, cambaj almapajllata lazuta churarinshna tucunguiman.

²⁶Ari nirinajushpa maqui japirinajuj gentecunashnaca, ama canguichu. Paicunapaj umapi culquita llujchishpa, shujcunaman mañachishpa divi tucuj gentecunashnapash, ama canguichu.

²⁷Culquita na tigrachi ushajpica, ¿imashpata can puñujuj cambaj camatara quichungayari?

²⁸Cambaj alpacunapi cambaj ñaupa taitacuna churashca mujungunataca, ama suchuchinguichu.

²⁹¿Imata ruranatapash ali yachaj runata ricushcanguichu? Paica, jatun mandajcunapaj ñaupajpimi servijunga. Yanga runacunataca, na servijungachu.