Read Imbabura Highland Quichua PROVERBIOS 23 Bible Online

PROVERBIOS 23 - Imbabura Highland Quichua bible

PROVERBIOS 23

¹Maijan amohuan micungapaj tiarishpapash, pipaj ñaupajpi tiajushcatapash aliguta yaringui.

²Ninanda micunayachijushpapash, cuchillota cungapi churanshna jarcaringui.

³Chai munanayai micunacunataca, ama ninandapacha munanguichu. Chaicunaca, umachina micunami.

⁴Ama charij tucunatalla ninanda munashpa puringuichu. Chai munaita saquishpa, aligutapacha yarishpa puringui.

⁵¿Charij tucunaca yangallata cajpitachu, chaita ricuriajlla causagringui? Chaicunaca, alas viñajpi jatun anga jatarishpa, jahuata rinshna ñapash chingangallami.

⁶Mitsa runahuanga, ama micungapaj tiaringuichu. Paipaj munanayai micunatapash, ama ninandapacha munanguichu.

⁷Paipaj shungupi imashna yarijushpapash, paipash chashnallata: “Micuilla, ufiailla” nijushpapash, tucui shungumandaca na ningachu.

⁸Chai micushcataca, shungu tigrachinguimi. Can aliguta pashi nishcapash, yangami canga.

⁹Shinlli shungu runa uyajtaca, ama imatapash ninguichu. Aligutapacha yarishpa ali yuyaita can cushcataca, yangapimi churanga.

¹⁰Cambaj ñaupa taitacuna churashca mujundaca, ama suchuchinguichu. Taita mama illaj huahuacunapaj alpacunamambash, ama suchuchishpa yaicunguichu.

¹¹Paicunamanda shayarishpa mitsaj Diosca, ninan shinllipachami. Paimi, paicunamanda shayarishpa candaca llaquichinga.

¹²Yachachishca shimicunataca, tucui shunguhuan pactachingui. Ali yachajta ruraj cai shimicunataca, rinrita mañachishpa uyangui.

¹³Huahuata llaquichinataca, ama saquinguichu. Jamzi varahuan astijllapica, na huañungachu.

¹⁴Jamzi varahuan llaquichishpami paipaj alma, Seolman rinamandaca cacharichingui.

¹⁵Ñuca huahualla, cambaj shungupi alipacha yachajushca cajpica, ñuca shungupash cushijungami.

¹⁶Cambaj shimihuanga, imatapash aligutalla rimajpica, ñuca shungupash cushijungami.

¹⁷Juchasapacunata ricushpaca, ama ñucapash chashna cashcaiman yanguichu. Ashtahuangarin tucui cambaj causaipi, Mandaj Diostalla manllashpa causangui.

¹⁸Tucurimui punlla tianapacha cashcamandami, chashna causana cangui. Shinallata can shuyajushca punllacunaca, na tucuringachu.

¹⁹Ñuca huahualla, ñucata uyashpa ali yachajushpaca alimi canguiman. Ali ñanda catingapaj, cambaj shunguta alichiringui.

²⁰Vinota ufiajcunahuanga, ama tandanajunguichu. Aichatalla micujcunahuambash, ama tandanajunguichu.

²¹Machaj runapash, yapata micuj runapash, imatapash na charijmi tucunga. Yapata puñuj runaca, liqui churajunatami churajunga.

²²Cambaj huachaj taitataca, ali uyangui. Cambaj mama ña payayajpipash, ama yangapi churanguichu.

²³Na llullaj shimita, ali yachaita, ali yuyaita yachachishcatapash randishpaca, ama cutinga jatunguichu.

²⁴Imatapash cashcatapacha ruraj runapaj taitaca ninandami cushijunga. Alipacha yachajushca churipaj huachaj taitapash, paihuanga cushijungami.

²⁵Cambaj taitapash, cambaj mamapash cushijushca cachun. Canda unguj mamaca, ninanda cushijuchun.

²⁶Ñuca huahualla, cambaj shungutaca ñucaman cuhuayari. Cambaj ñavihuanga, ñuca imashna causajujta ricuhuayari.

²⁷Culquimanda huainayaj huarmica, manllanayai ucu ucu yacushnami. Na rijsishca huarmipash, yacuta llujchingapaj allashca quichiji quichiji jatun utujushnami.

²⁸Chai huarmipash, shuhua runashnami pacalla chapajun. Paimandami, yachashpata na cazuj runacunapash, ashtaca miranajun.

²⁹¿Aij nishpa purinaca pipajta? ¿Nanaihuan purinaca pipajta? ¿Fiñanajushpa purinaca pipajta? ¿Aij nishpa huacanaca pipajta? ¿Yangamanda chugrichi tucushpa purinaca pipajta? ¿Ñavi verdeyashca purinaca pipajta?

³⁰Chai llaquicunaca, yapata machashpa purijcunapaj, chapushca ufianacunata mascashpa purijcunapajmi.

³¹Copapi punchapamba pucalla vino tiajujpipash, ama ricunguichu. Cungataca mishquillami langaringa.

³²Ashtahuangarin chai jipaca, culebrashnami caninga. Millai culebra canishcashnami nanachinga.

³³Cambaj ñavipica, na ricushcacunami ricuringa. Cambaj shungumandapash, jatun nali shimicunami llujshinga.

³⁴Mama cucha chaupipi sirijunshnami cangui. Jatun barco chaupipi shayajuj caspi pundapi tiajunshnapashmi cangui.

³⁵Cashnapashmi ningui: “Chugrichi tucushpapash, napacha nanarcachu. Macai tucushcatapash na yarinichu. Rijcharishpaca, ufianata mascagrisharami” ninguimi.