Read Imbabura Highland Quichua PROVERBIOS 24 Bible Online

PROVERBIOS 24 - Imbabura Highland Quichua bible

PROVERBIOS 24

¹Nalita rurajcunata ricushpaca, ama ñucapash chashna cashcaiman yanguichu. Paicunahuan tandanajunatapash, ama munanguichu.

²Paicunapaj shungupica, shuhuanatallami yarinajun. Shimihuambash nalitallami rimanajun.

³Alipacha yachajushcahuanmi, huasi ucu purataca huasichinshna shayachinga. Aligutapacha yarishpami, shinllitapacha shayachinga.

⁴Ali yachajushcahuanmi huasi ucucunapipash, tucui imalla munanayai, juyailla charinacunatapash jundachinga.

⁵Alipacha yachajushca runaca, ninan shinlli runami. Ali yachajushca runapaca, imapash na llashachu.

⁶Jatun macanajuitapash, ali yachajushcahuanmi rurana. Ali yachajcuna yuyaita cushcami, jatun macanajuitaca mishachin.

⁷Juizu illaj runapaca, ali yachaica na pactai ushanalla jahuamanmi tiajun. Puebloman yaicuna pungu ladopi tandanajuipica, paipaj shimita pascaitapash na pascangachu.

⁸Pitapash llaquichingapaj yariajlla causaj runataca: “Caica, nali shungu runami” ninajunmi.

⁹Shinlli shungu runaca, juchatallami yarijun. Na cazushpa asij runaca, runacunapaj ñaupajpica millanayaimi ricurin.

¹⁰Imatalla rurana punllapi imata ruranatapash na munashpaca, ushai illajmi tucungui.

¹¹Huañuchingapaj apai tucushcacunataca cacharichingui. Huañuchi tucunallapi purijcunatapash quishpichingui.

¹²Chaitaca, napacha yachashpami causashcanchi ninajujpipash, tucuicunapaj shunguta pezanshna ricujuj Diosca, ¿nachu yachanga? Cambaj causaita ricujuj Diosmi, chaitaca yachan. Shina cashcamandami, runacuna imata rurashcashnallata cunga.

¹³Ñuca huahualla, balun mishquita japishpa micuilla, aligumari. Balun mishqui shinlliyashcapash, cambaj shimipica mishquillagumi canga.

¹⁴Ali yachaita japinapash, cambaj almapaca, chashnallatami canga. Chaita tarishpaca, can japina cashcatapash japinguimi. Shinallata tucuripica, can shuyajushcapash na tucuringachu.

¹⁵Diosta na manllaj runalla. Imatapash cashcatapacha ruraj runapaj carpataca, ama pacalla chapajuichu. Paipaj huasi ucucunapi ima tiashcatapash, ama llujchishpa apaichu.

¹⁶Imatapash cashcatapacha ruraj runaca, canchiscaman urmashpapash, cutin jatarinllami. Ashtahuangarin Diosta na manllajcunaca, jatun llaquipimi urmanga.

¹⁷Canda fiñaj runa llaquipi urmajpica, ama cushijunguichu. Nitijanshna pandarijpipash, shungupillapash ama cushijunguichu.

¹⁸Mandaj Diosca, chaita ricushpara candapash nalicachinman. Paita fiñarishpa llaquichijushcatapash, paimanda anchuchinman.

¹⁹Nalita rurajcunahuanga, ama tandanajunguichu. Diosta na manllaj runacunata ricushpapash, ama ñucapash chashna cashcaiman yanguichu.

²⁰Nali runapaca, jipaman cushijuica na tiana cashcamandami, na chashna yarina cangui. Diosta na manllajcunapaj lámpara michata huañuchinshnami tucuchinga.

²¹Ñuca huahualla, Mandaj Diostapash, jatun mandajtapash cazungui. Imatapash nalicunata yarishpa purijcunahuanga, ama tandanajunguichu.

²²Paicunataca, cungashcapi llaqui japina cashcamandami, na tandanajuna cangui. Chai ishcandi llaquichinataca, ¿pita yachangayari?

²³Caicunapash, ali yachajushcacuna rimashca shimicunami: Imata alichina cajpipash, ñavita ricushpalla chasquinaca nalichu.

²⁴Nalita ruraj runatara: “Canga, imatapash cashcatapacha rurajmi cangui” nijtaca, tucui gentecunami ima llaquipash japishpami ali canman ninajunga. Shuj llactacunapi causajcunapashmi millayanachinga.

²⁵Ashtahuangarin jarcashpa rimajcunaca, cushijuita charingami. Paicunaca, ninandami bendiciai tucunga.

²⁶Ali shimicunatalla rimashpa tigrachij runapaj shimitaca muchanshnami alicachinga.

²⁷Llujshirishpa imata ruranatapash mascagringui. Cambaj pambacunapi imatallapash ruranata yaringui. Chashna rurashca jipami, cambaj huasita shayachingui.

²⁸Ama pitapash, yangata llullashpa chashnapachami nishpa villanguichu. Cambaj shimihuambash, ama uyanayaita llullashpa parlanguichu.

²⁹Ama: “Paitapash shinallatami rurasha, pai imashna llaquichishcashnallatami paimambash tigrachisha” ninguichu.

³⁰Imata ruranatapash na munaj runapaj alpa ladotami yalijurcani. Shinallata na yachajushca runapaj uvas chagratapashmi yalijurcani.

³¹Ricui, tucui chai pambapimi, cashacuna viñashca carca. Shinallata tucui chai pambapimi, tsinicuna jundashca carca. Chai pamba muyundipi jarcashcacunapash, urmashpa tucurishcami carca.

³²Chaita ricushpami, ñuca shungupi yarijurcani. Chaita ricushpaca, cashnami yarijurcani:

³³Ashata puñushpa, umata caiman chaiman cuyuchishpa, ashata puñungapaj maquita cruzashpami sirijushcangui.

³⁴Chashna sirijujpillatami, imapash illaj tucunaca, yanga purij runashna chayamun. Imatapash na charij canaca, macanajunacunahuan alichirishca runashnami chayamunga yajurcanimi.