Read Imbabura Highland Quichua PROVERBIOS 25 Bible Online

PROVERBIOS 25 - Imbabura Highland Quichua bible

PROVERBIOS 25

¹Caicunapash, Salomón rurashca, yarichij shimicunami. Cai shimicunataca, Judá llactata jatun mandaj Ezequiaspaj escribijcunami cutin escribinajurca.

²Imata pacalla charinaca, Taita Diospaca cushijuimi. Shina cajpipash aligutapacha callarishpa ricunaca, jatun mandajpaca aligupachami.

³Jahua pacha maicaman cajtapash, cai pacha maicaman ucu cajtapash, jatun mandajcunapaj shungupi imata yarinajujtapash, pipash na yachai ushanllu.

⁴Culquita yacuyachishpa, mapata anchuchingui. Chashna rurajpimi, culquita yacuyachishpa imata ruranata yachaj, imata rurashcapash juyaillagu llujshinga.

⁵Diosta na manllaj runataca, jatun mandajpaj ñaupajmanda anchuchingui. Shina anchuchijpimi, mandangapaj tiarinapipash imatapash cashcatapacha rurashpa shinllitapacha mandajunga.

⁶Jatun mandajpaj ñaupajpica, ama canllata alicachiringuichu. Jatungunalla tiarina pushtupipash, ama tiaringuichu.

⁷Can ricushca mandajpaj ñaupajpi pingai tucushpa urai cumuringapaj randica: “Caiman vichai shamui” ningacaman shuyanami ashtahuan ali.

⁸Ama imamandapash ñapash fiñanajuipi yaicunguichu. Caishuj runa canda pingaichijpira, imata ruraitapash na ushanguiman.

⁹Canda pi imata nijpipash, chaitaca paihuanlla alichingui. Imatapash canlla yachashcataca, ama pimambash villanguichu.

¹⁰Pactarallapash can parlajujta maijambash uyashpara, can alicachi tucushcata huaglichinman. Canda juchachishpa pingaichishcapash, na alichi ushanallara tucunman.

¹¹Aliguta yarishpa rimashca shimicunaca, oro manzanapi culquita churashpa, juyaillaguta rurashcashnami.

¹²Aliguta uyaj, alipacha yachajushca runata jarcashpa rimaj runaca, oro zarcilloshna, ashtahuan ali oromanda rurashca juyailla huatarinacunashnami.

¹³Imata villachun cachajpipash, ali pactachij runaca, chai cachaj runacunapaca, cozechai punllacunapi chirilla rasu yacuta caranshnami. Chai runaca, paipaj amopaj almatami samachijun.

¹⁴Imagutapash carashapachami nishpa jariyashpapash, na pactachij runaca, huairahuan fuyu shamushpapash, na tamianshnami.

¹⁵Mandaj fiñarishca cajpica, na ñapash fiñarishpami alichin. Amujlla shimicunaca, tulluta faquinshnami amujyachin.

¹⁶¿Balun mishquitachu tarircangui? Tarishpaca, usharishcagutalla micungui. Yapata micushpara millanayachishpa, shunguta tigrachinguiman.

¹⁷Cambaj ladollapi causajpajmambash, ama yapa chayanguichu, pactarallapash canda na ricunayachishpa millanayachinman.

¹⁸Pitapash yanga juchachishpa villagrij runaca, martilloshna, cuchilloshna, filo filo flechashnami.

¹⁹Ninan llaqui punllacunapi cashpa, yachashpata na cazuj runa ayudachun shuyanaca, quiru faquirishcashna, chaqui quivishcashnami.

²⁰Llaquilla shunguhuan tiajujpi candajuj runaca, chiri punllacunapi churajunata quichunshnami. Na cashpaca, jabón jahuapi vinagreta talinshnami.

²¹Canda na ricunayachij runa yarjachijujpica, micunata carangui. Yacunayachijujpipash, yacuta ufiachun carangui.

²²Shina rurajpica, nina carbonda umapi churajpishnami, pingai tucunga. Mandaj Diospash, alicunatami canman caranga.

²³Janaj ladota huaira shamushpaca, tamiata calpachinllami. Fiña ñavihuan ricushpaca, llullashpa parlaj runapash shinallatami calpachin.

²⁴Jatun huasi ucupi causashpapash, imatapash nirishpa fiñachijujlla huarmihuan causanapaj randica, huasi jahua uchilla ucugupi causanami ashtahuan ali.

²⁵Caru llactamanda ali villaita villaj shamushpaca, ninanda yacunayachijuj shungupi chirilla yacu chayanshnami.

²⁶Imatapash cashcatapacha ruraj runa, Diosta na manllaj runapaj ñaupajpi urmashpaca, pugyu yacu turuyashcashna, llujshijuj yacu mapayashcashnami.

²⁷Balun mishquita yapata micunaca nalichu. Quiquinllata juyailla tucunata mascanapash, na juyaillata ruranllu.

²⁸Ñapash fiñarina yuyaita na jarcarij runaca, muyundi pirca urmashca jatun pirca illaj puebloshnami.