Read Imbabura Highland Quichua PROVERBIOS 27 Bible Online

PROVERBIOS 27 - Imbabura Highland Quichua bible

PROVERBIOS 27

¹Caya punlla caita chaita rurashami nishpaca, ama jariyanguichu. Caya ima tucunatapash na yachashcamandami, na chashna jariyana cangui.

²Ama cambaj shimihuanllata alicachiringuichu, na rijsishcacuna alicachinajuchun shuyangui. Quiquin shimihuan alicachirinapaj randica, shujcuna canda alicachinajuchun shuyangui.

³Rumipash llashami, t'iyu alpapash llashallatami. Shinlli shungu runa ninanda fiñarishcacarin, chai ishcanditapash ashtahuan yali llashami.

⁴Ninandapacha fiñarishca runaca, llaquitapash na llaquinllu. Ñapash fiñarinacarin, yacu ninanda jatarinshnami. Imatapash ñucapajlla cashcanman yashpa ricuj runapaj ñaupajpicarin, ¿pita shayari ushangayari?

⁵Juyaimandalla na imatapash ningapaj randica, imata jarcana cashpapash rimashpa jarcanami ashtahuan ali.

⁶Juyaj runa rimashpa chugrichinshna saquishcacunami ashtahuan ali. Ashtahuangarin na ricunayachishpata muchashcacunaca, nalichu.

⁷Na munangacaman micushca runaca, balun mishqui shinlliyashcatapash na micunayachinllu. Ashtahuangarin yarjachijuj runapaca, ima jayajpash mishquillagumi.

⁸Quiquin huasita saquishpa rijuj runaca, tazinda shitashpa rijuj urpishnami.

⁹Aceitepash, mishquillagu ashnajuj jambipash, shungutami cushichin. Ali cumbagu ali yuyaita cushcacarin, caishuj cumba runagutami cushichin.

¹⁰Cambaj cumbatapash, cambaj taitapaj cumbatapash ama cunganguichu. Cambaj llaqui punllapipash, ama cambaj huauquipaj huasiman ringuichu. Carupi causaj huauquipaj randica, cambaj ladollapi causajcunami ashtahuan ali.

¹¹Ñuca huahualla, aliguta yachajushca cashpa, ñuca shungupi cushichihuayari. Shina cashpami, ñucata fiñashpa rimaj runamambash tigrachi ushasha.

¹²Ali yuyaita charij runaca, ima llaqui japinata ricushpaca anchurinmi. Ashtahuangarin nara yachajushca runacunaca, yangata rishpa llaquichi tucunllami.

¹³Na rijsishca runapaj, na cashpaca na rijsishca huarmipaj garante tucujtaca, culquita cungacaman churajunatapash, ashtahuan imatapash quichushpa saquichingui.

¹⁴Punllayajujpi tutamandata paipaj cumbata caparishpa alillachu cangui nishcapash, ima llaquipash japishpami ali canman nishcashnallatami.

¹⁵Tamia punllacunapi yacu shutujujlla huasipi causanapash, imatapash nirijushpa fiñachijujlla huarmihuan causanapash, chashnallatami llaquichin.

¹⁶Shina huarmita jarcangapaj munanaca, huairata jarcangapaj munashcashnami. Na cashpaca, aceiteta ali lado maquihuan japishpa, maqui ucupi charingapaj munashcashnami.

¹⁷Jirrutaca, jirruhuanllatami filoyachirin. Shinallatami runapash, paipaj cumbaman ali yuyaita cun.

¹⁸Jigos yurata ali cuidashpa causaj runaca, chai yurapi fucushcatami micunga. Amopaj ali cachun imagutapash ricuriaj runaca, alicachi tucungami.

¹⁹Imashnami yacupi ñucanchi ñavi ricurin, shinallatami shuj runapaj shungupash, caishuj runapaj shungupi ricurijun.

²⁰Seolpash, Abadonbash napacha shaijunllu. Shinallata runacunapaj ñavipash, napacha shaijunllu.

²¹Culquitaca pailapi churashpa, orotaca jornopi rupachishpami, ali cajta ricun. Runa ali cajtaca, shujcuna alicachijpimi yacharin.

²²Shinlli shungu runaca, cutana rumipi trigota cutanshna, cutin cutin cutajpipash, shinlli shungu canataca na saquingachu.

²³Cambaj llamacuna imashnalla purinajujta ricuriangui. Cambaj ashtaca llamacunataca, aliguta ricuriashpa michingui.

²⁴Imatalla charishcacunaca, na causaita causaicaman cashcamandami, chashna ricuna cangui. ¿Coronapash, mirai mirai jipa huahuacunapajchu canga?

²⁵Pambacunapica llullu jihuacuna, ashtahuan shuj jihuacunami jundanga. Urcu jihuacunatami tandachinga.

²⁶Maltun llamacunaca, cambaj churajunata randingapajmi canga. Cambaj maltun chivocunaca, alpata randingapajmi canga.

²⁷Huarmi chivocunapash, can micuchunga ashtaca lechetami cunga. Cambaj huasi ucu purapajpash, canda servij huarmicunapajpash pactanami tianga.