Read Imbabura Highland Quichua PROVERBIOS 28 Bible Online

PROVERBIOS 28 - Imbabura Highland Quichua bible

PROVERBIOS 28

¹Diosta na manllaj runaca, pipash na catijujpitami pacajungapaj calpajun. Ashtahuangarin imatapash cashcatapacha ruraj runaca, leonshna imatapash na manllanllu.

²Llactapi causajcuna na cazushcamandami, mandajcunaca shuj shuj yaicunajun. Ashtahuangarin ali yuyaita charij, alipacha yachajushca mandajca, shinlli tucushpa mandajunllami.

³Imagutapash na charij runallata, imagutapash na charij caishuj runacunapajta shuhuaj runaca, ninanda tamiashpa ima micunapash illajta saquinshnami.

⁴Mandashcata saquijcunaca, Diosta na manllajcunatarami alicachinajun. Ashtahuangarin mandashcata pactachijcunaca, paicunahuan fiñanajushpa rimarinshnami causanajun.

⁵Nali runacunaca, Dios aliguta ricushpa llaquichinataca na yachanllu. Ashtahuangarin Mandaj Diosta mascajcunaca, tucuitami yachan.

⁶Charij cashpapash, jatun nalita rurashpa causangapaj randica, imaguta na charishpapash, ima nalitapash na rurashpa causanami ashtahuan ali.

⁷Mandashcata huacaichij runaca, aligutapacha yarishpa purij churimi. Ashtahuangarin micushpalla causaj runacunahuan tandanajuj churica, taitapaj pingaimi.

⁸Culquita mañachishpa mama culqui mirashcamanda yalishpa japishpa, ninanda mirachishpa charijyaj runaca, imagutapash na charij runacunata llaquij runa japichunllami alichijun.

⁹Mandashcata na uyanayachij runataca, pai mañajujtapash Diosca millanayachinmi.

¹⁰Aligutalla rurajcunata pandachishpa nali ñambi churaj runaca, paillata allashca utujupimi urmanga. Ashtahuangarin ima pandatapash na rurajcunaca, alitallami japinga.

¹¹Charij runaca, paipaj yuyaipica, ninanda yachajushcami cani yajunmi. Ashtahuangarin imagutapash na charij cashpapash, ali yachajushca cashpaca, imatapash aligutapachami ricujun.

¹²Imatapash cashcatapacha rurajcuna cushijujpica, jatun cushijuimi tian. Ashtahuangarin Diosta na manllajcuna jatarijpica, runacunaca pacajunatami charin.

¹³Maijan cashpapash paipaj juchacunata pacaj runaca, ali causaitaca na ushangachu. Ashtahuangarin juchacunata villashpa, tucuita saquij runataca, Diosmi llaquinga.

¹⁴Tucui causaipi Taita Diosta manllashpa causaj runaca, ninandami cushijun. Ashtahuangarin paipaj shunguta shinlliyachij runaca, ninan llaquipimi urmanga.

¹⁵Imagutapash na charij gentecunata, Diosta na manllaj runa mandajushpaca, manllanayaita huacajuj leonshna, ninanda yarjachijuj ososhnami.

¹⁶Na yachajushca mandajca, ashtahuan ashtahuanmi llaquichishpa charin. Ashtahuangarin charijyanata na munaj mandajca, unaitami mandajunga.

¹⁷Pitapash huañuchishpa yahuarta jichaj runaca, huañuna punllacamanmi pacajushpa purijun. Pai huañunataca, pipash na jarcangachu.

¹⁸Ima nalitapash na ruraj runaca, ima llaquimandapash quishpiringami. Ashtahuangarin jatun nalita rurashpa causaj runaca, ima llaquipipash urmangallatami.

¹⁹Paipaj alpata allashpa tarpunshna causaj runaca, na munangacamanmi micunga. Ashtahuangarin yanga yanga causaj runacunata catij runaca, imagupash illajpachami causanga.

²⁰Na llullaj runaguca, ninandami bendiciai tucunga. Ashtahuangarin ucha charijyangapaj munaj runaca, llaquichi tucungapachami.

²¹Ñavita ricushpalla chasquinaca nalichu. Ashtahuangarin runaca, asha micunamandalla yachashpata na cazunllami.

²²Mitsa runaca, ucha charijyangapajllami munashpa causan. Ashtahuangarin imagupash illaj tucuna punlla shamunataca, na yachanllu.

²³Pandata rurajujpi jarcashpa rimaj runaca, uyanayaita llullashpa parlaj runatapash ashtahuan yalimi, jipamanga alicachi tucunga.

²⁴Taita mamapajta imata shuhuashpapash: “Ima nalipash na canllu” nij churica, imatapash tucuchij runapaj cumballatami.

²⁵Shungupi ninanda jariyashpa purij runaca, fiñanajuitallami jatarichin. Ashtahuangarin Mandaj Diosta yariashpa causaj runaca, imapipash alimi llujshinga.

²⁶Paipaj shungupi yarijushcatalla yariashpa causaj runaca, shinlli shungu runami. Ashtahuangarin alipacha yachajushpa causaj runaca, ima llaquimandapash cachari tucungami.

²⁷Imagutapash na charij runaman imagutapash caraj runaca, imagutapash charingami. Ashtahuangarin ñavita shujman churaj runaca, ninandami nalicachi tucunga.

²⁸Diosta na manllajcuna mandangapaj jatarijpica, gentecunaca pacajunmi. Ashtahuangarin paicuna ña tucurijpica, imatapash cashcatapacha rurajcunami miran.