Read Imbabura Highland Quichua PROVERBIOS 29 Bible Online

PROVERBIOS 29 - Imbabura Highland Quichua bible

PROVERBIOS 29

¹Jarcashpa rimajujpipash, shinllipacha tucuj runataca, cungashcapi ñapash llaqui japingallami. Paipaca, jambipash na tiangachu.

²Imatapash cashcatapacha rurajcuna mandashpa charijpica, gentecunaca cushijunmi. Ashtahuangarin Diosta na manllaj runa mandashpa charijpica, gentecunaca aij ninajunmi.

³Alipacha yachajunata juyaj churica, taitatami cushichin. Ashtahuangarin culquimanda huainayaj huarmicunapajman rijujlla runaca, tucui charishcatami tucuchinga.

⁴Jatun mandajca, aliguta ricushpa mandashpami llactataca shinllita mandajun. Ashtahuangarin imatapash cuchun yapata mañashpaca, llactatami tucuchijun.

⁵Paipaj cumbamanllata uyanayaita llullashpa parlaj runaca, chai runapaj ñaupajpi linllita churanshnami.

⁶Nalita ruraj runa na cazushcapash lazushnami. Ashtahuangarin imatapash cashcatapacha ruraj runaca, cushijushpami candanga.

⁷Imatapash cashcatapacha ruraj runaca, imagutapash na charijcunatapash llaquinmi. Ashtahuangarin Diosta na manllaj runaca, ali yachai imashna cajtapash na yachanllu.

⁸Na cazushpa asijcunaca, pueblota ninahuan tucuillata japichinshnami. Ashtahuangarin alipacha yachajushcacunaca, ninanda fiñarishcatapash anchuchinllami.

⁹Alipacha yachajushca runa, shinlli shungu runahuan fiñanajushpa rimarishpaca, fiñarishpapash, asishpapash, casilla ali causaitaca na japingachu.

¹⁰Pitapash na llaquishpa huañuchijcunaca, ima pandatapash na ruraj runataca millanayachinmi. Ashtahuangarin aligutalla ruraj runacunaca, paita cushichinatami mascan.

¹¹Shinlli shungu runa fiñarishpaca, pai imata munashcata ruranllami. Ashtahuangarin alipacha yachajushca runaca jarcarinmi.

¹²Llullashpa villashca shimicunata mandajllata uyajujpica, tucuilla paita servijcunami, Diosta na manllajcuna tucunga.

¹³Imagutapash na charij runapash, culquita mañachij runapashmi tuparin. Mandaj Diosca, ishcandimanllatami punchayachaij ñavita cushca.

¹⁴Imagutapash na charijcunata aliguta ricushpa, na llullashpa mandajuj jatun mandajpaj tiarinaca, causaita causaicamanmi shinllipacha canga.

¹⁵Varahuan astishpa yachachijpimi, huahuacunaca aliguta yachajun. Ashtahuangarin imata rurachumbash saquijllapica, mamatami pingaichinga.

¹⁶Diosta na manllajcunalla ashtaca tiashpami, ashtahuan na cazunajun. Ashtahuangarin imatapash cashcatapacha rurajcunaca, paicuna llaquita apanajujtami ricunga.

¹⁷Cambaj churitaca, aliguta yachachingui. Shina yachachijpimi, candaca samachinga. Shinallata cambaj almamambash, cushijuitami cunga.

¹⁸Dios villashcata pipash na villajpica, tucuicunami cacharishcacuna tucun. Ashtahuangarin mandashca shimicunata pactachij runaca, ninandami cushijun.

¹⁹Servij runataca, na rimashpalla alichi ushanallachu. Rimajpi ali yachashpapash, na cazunllu.

²⁰¿Napash ali yarishpata ñapash rimaj runata ricushcanguichu? Paipaj randica, shinlli shungu runarapashmi, imagutallapash shuyanata charin.

²¹Uchillamandapacha amo ninanda juyashpa viñachishca runaca, jipa punllapica, amo imata charishcatapash paimi japinga.

²²Ñapash fiñarijlla runaca, fiñanajushpa rimarinatallami jatarichin. Ñapash fiñarijlla runaca, juchata rurajunllami.

²³Jariyashpa jatun tucuj runataca, chaillatami ñavita urai cumuchin. Ashtahuangarin shungupi na jariyaj runaca, ninanda alicachi tucushpami causan.

²⁴Shuhuashcata chasquij runaca, paipaj almatami fiñan. Chaimandami, imata shuhuashcata uyashpapash na villan.

²⁵Runata manllanaca, lazuta churashcashnami canga. Ashtahuangarin Mandaj Diosta yariashpa causaj runami, jatumbi churai tucunga.

²⁶Taucacunami alita rurashcanman yashpa, mandajta mascanajun. Ashtahuangarin Mandaj Diosmi, aligutapacha ricushpa tucuicunata mandajun.

²⁷Imatapash cashcatapacha rurajcunaca, nalita ruraj runataca millanayachinmi. Shinallata Diosta na manllaj runapash, aligutalla rurashpa causajcunataca millanayachinmi.