Read Imbabura Highland Quichua PROVERBIOS 30 Bible Online

PROVERBIOS 30 - Imbabura Highland Quichua bible

PROVERBIOS 30

¹Jaqué shuti runapaj churi Agur shuti runa rimashca shimicunami. Chai runaca, Dios villashcatami Itiel shuti runaman villashca. Itiel shuti, Ucal shuti runacunamanmi, cashna nishpa villajurca:

²Ñucaca, tucuicunata yali juizu illajmi cani, runacunapaj ali yuyaitaca na charinichu.

³Ali yachaitapash, na yachajurcanichu. Jucha illaj Diosmanda yachajunatapash na rijsinichu.

⁴¿Pita jahua pachaman rishpa, cutin uriajumushcayari? ¿Pita huairata japishpa, maqui ucupi chari ushangayari? ¿Pita yacuta japishpa shuj baitapi huatashcayari? ¿Pita tucui cai alpa maicamanlla canatapash, shinllitapacha churashcayari? ¿Paica ima shutitayari? ¿Paipaj churijpaj shutitapash rijsinguichu?

⁵Mandaj Dios rimashca shimicunaca, jucha illajmi. Diosca, paita shuyajcunapaca, jarcarina escudoshnami.

⁶Canda jarcashpa ama rimachunga, Dios rimashca shimicunataca ama mirachinguichu. Pactarallapash canra llulla ricuringuiman.

⁷Taita Dioslla, ishcaigutallami mañashcani. Chaitaca ñuca causajujpillata, na mitsashpa carahuayari:

⁸Imapash yangacunata, llulla shimicunataca ñucamanda anchuchihuayari. Shinallata imagutapash na charij canatapash, ninan charij canatapash ama cuhuaichu. Micungapaj pactanagutalla carahuayari.

⁹Na ushajta micushpara, canda cungashpa: “¿Mandaj Diosca pitayari?” nijupaiman. Na cashpaca, imagutapash na charishpara shuhuashpa, ñuca Taita Diospaj shutigutara, nali shimicunata rimapaiman.

¹⁰Servij runataca, ama juchachishpa paipaj amoman villanguichu. Pactarallapash ima llaquipash japishpachari ali canman nijpira, llaquita apanguiman.

¹¹Paicunapaj taitatallata ima llaquipash japishpachari ali canman nishpa nalicachinajuj miraicunapash tianmi. Paicunaca, paipaj mamatapash na alicachinllu.

¹²Mapa illajcunami canchi nishpa causanajuj miraicunapash tianmi. Paicunapaj juchata nara maillarishca cashpapash, chashna ninllami.

¹³Jariyashpa, shujcunata fiña ñavihuan ricushpa, ñavi alsashca purinajuj miraicunapash tianmi.

¹⁴Pungu quirupipash espadatashna, juchu quirupipash cuchillotashna charij miraicunapash tianmi. Paicunaca, llactapi causaj, imagutapash na charij runacunata, runa purapi imagupash illajcunata langanshna tucuchingapajmi, chashna causanajun.

¹⁵Sanguijuela nishca juruca na sajsashpa: “¡Carahuaira, carahuaira!” nishpa mañajujlla, ishcai ushicunatami charin. Shinallata ima horapash napacha vijsa pactajcunaca, quimsami tian. Ima horallapash: “¡Chaillata!” ninata na yachajhuangarin, chuscumi tian.

¹⁶Paicunaca: Seolmi, huahuata na tarij huarmimi, mashnata tamiajpipash chaquijujlla alpami. Ninaca rupajushpapash, ima horallapash napacha: “¡Chaillata!” ninllu.

¹⁷Taitata na cazushpa ricuj churica, mama yachachishcatapash yangapimi churan. Chai ñavitaca, huaicu yacu ladopi causaj angacuna surcushpa saquichun. Paitaca, jatun angacunapaj huahuacuna micuchun.

¹⁸Ñucapaca, quimsami na ricunalla tiajun. Chuscutacarin, napacha yachai ushanichu:

¹⁹Huairapi jatun anga purijushcatapash, jaca rumi patacunapi culebra purijushcatapash, mama cucha chaupipi jatun barco huambujushcatapash, jarihuan nara tacarishca cuitsapi jari tacarishcatapash, na yachai ushanichu.

²⁰Cazarashca jahua shujcunahuan causaj huarmica, cashnami ruran: Micushpalla shimita ficharishpaca: “Ima nalitapash na rurashcanichu” nijunmi.

²¹Quimsamandami cai pachapi causajcunaca, ninanda caparinajun. Chuscupicarin, paicunapaca llaquita na apai ushanallami:

²²Servij runara llactata mandajujpipash, shinlli shungu runara na ushajta micupipashmi, chashna caparinajun.

²³Tucuicuna na ricunayachishca huarmi cazarajpipash, servishpa causaj huarmica, paita mandaj huarmi tucui charishcata quichujpipashmi, chashna caparinajun.

²⁴Cai pachapica, chuscu uchilla animalcunami tian. Chaicunaca, ninan alipacha yachajushca runacunatapash yali yachajushcacunami:

²⁵Añangucunaca, na shinllicuna cashpapash, rupai punllacunapimi micunata tandachinajun.

²⁶Conejocunaca, na shinllicuna cashpapash, jatun rumi ucucunapimi huasichishpa causanajun.

²⁷Langostacunaca, jatun mandajta na charishpapash, tucuicunami tandanajushpa llujshinajun.

²⁸Maquihuan llapinalla arañacunapash, jatun mandaj mandana ucupimi tianajun.

²⁹Aliguta purijcunaca quimsami tian. Chuscucarin, juyaillagutami purin:

³⁰Tucui animal purapica, leonmi ashtahuan shinlli. Paica imata ricushpapash, na huashaman tigranllu.

³¹Chumbilirishcashna animalpash, jari chivopash, pipash na jariyai ushanalla jatun mandajpashmi tian.

³²Shinlli shungu runashna jariyangapaj yarijushca cashpa, na cashpaca pitapash llaquichingapaj yarijushca cashpaca, shimipi maquita churashpa jarcaringui.

³³Lecheta maijambash ninanda cuyuchishpaca, leche viratapachami llujchinga. Singata shinlli jacurishpaca, yahuartami llujchinga. Pitapash ninanda fiñachishpaca, fiñanajuipimi churanga.