Read Imbabura Highland Quichua PROVERBIOS 31 Bible Online

PROVERBIOS 31 - Imbabura Highland Quichua bible

PROVERBIOS 31

¹Jatun mandaj Lemuel shuti runa rimashca shimicunami. Dios villashcata paipaj mama paiman yachachishca shimicunami.

²Ñuca huahualla, ñuca vijsamanda llujshishca ñuca huahualla. Ñuca ninanda munashca huahualla, ¿imatata rurajungui?

³Ama cambaj ushaita, huarmicunahuan tucuchinguichu. Jatun mandajcunata tucuchij ñambica, ama causanguichu.

⁴Lemuel, machanaca na jatun mandajcunapajchu. Vinoca, na jatun mandajcunapajchu. Mandajcunaca, sidrataca na ufianllu.

⁵Chaicunata ufiashpara, mandashca shimicunata cunganajunman. Llaquichi tucushpa causajcunaman alita ruranatara huaglichinajunman.

⁶Sidrataca, ña huañugrijunshna causaj runa ufiachun cuichilla. Vinotapash, llaquirishpalla causajcuna ufiachun cuichilla.

⁷Chaita ufiashpami imagupash illaj cashcatapash, llaquita apanajushcatapash na ashtahuan yaringa.

⁸Na rimai ushajcunamandapash rimapairi. Imatapash na rurai ushajcunata juchachishpa llaquichigrinajujpipash mitsapairi.

⁹Cambaj shimihuanga, imatapash cashcatapacha rimashpa mandapairi. Imagutapash na charij, imagupash illaj runacunamanda shayarishpa mitsapairi.

¹⁰Tucuipi ali huarmigutaca, ¿pita tari ushangayari? Shina ali huarmiguca, punchapamba juyailla rumicunatapash yalipachami.

¹¹Paipaj cusapash, tucui shungumi paita yariashpa causan. Paihuanga, imagupash na illaj causanllu.

¹²Chai huarmiguca, llaquichingapaj randica, alitallami paipaj tucui causaipi rurashpa causan.

¹³Milmata, linota mascashpa randishpami, paipaj maquihuanga tucui munaihuan imagutapash ruran.

¹⁴Jatun barco jatunahuan shamunshnami, micunaguta apamushpa carumanda chayamun.

¹⁵Narapash pacarijpillata ucha jatarishpami, paipaj tucuilla familiaman micunaguta caran. Shinallata paita servij huarmicuna micuchumbashmi caran.

¹⁶Ali alpaguta ricushpa randishpami, chai alpapica paipaj maquihuambacha uvasta tarpushpa, ali chagraguta ruran.

¹⁷Paica, shinlli chumbilishcami purijun. Paipaj rigrahuambash, shinllipachami imagutapash ruran.

¹⁸Randishcapash, jatunapash ali llujshichunmi ricuriajun. Paipaj lamparapash, tutacaman rupajunllami.

¹⁹Shuj maquihuanga puchata, caishuj maquihuanga tornota muyuchishpa puchajunllami.

²⁰Imagutapash na charij, imagupash illajcunamambash, maquita chutashpami, imagutapash caran.

²¹Rasujujpi, paipaj familiacuna chirichinatapash na manllanllu. Paipaj tucui familiacunapash, racu churajunata churajushca purinajujpimi na manllan.

²²Jatanacunatapash, paillatami ahuan. Paipaj churajunapash, ashtahuan ali linota ahuashca, yana puca churajunami.

²³Llactata mandaj rucucunahuan, pueblo pungupi tandanajushpa paipaj cusa tiarijpica, tucuicunami rijsin.

²⁴Baitacunata ahuashpami jatujun. Jatushpa randishpa purijcunamambash, chumbicunatami jatujun.

²⁵Paipaca ushaita charinapash, alicachi tucunapash juyailla churajunaguta churajushcashnami. Jipa punlla ima tucunatapash, asinshna na manllanllu.

²⁶Paica, alipacha yachajushca cashpami, imagutapash riman. Llaquishpa causanatami yachachishpa mandan.

²⁷Huasipica, imagupash ali cachunmi ricuriajun. Paica, na yanga micushpalla causanllu.

²⁸Paipaj huahuacuna jatarishpapash, cushijushcami cangui ninajunmi. Cusapash, cashna nishpami alicachijun:

²⁹“Tauca huarmicunami, alita ruranajun. Ashtahuangarin canmi, tucui paicunata yali cangui” nijunmi.

³⁰Juyailla ñavi cashpapash umachinllami. Juyaillagu cashpapash yangallami. Ashtahuangarin Mandaj Diosta manllaj huarmimari, alicachi tucunga.

³¹Paipaj maquihuan imatalla rurashcamandaca, paimambash ima aligutapash cunguichiyari. Pai imatalla rurashcamandaca, pueblo pungupipash alicachinguichiyari.