Read Imbabura Highland Quichua PROVERBIOS 4 Bible Online

PROVERBIOS 4 - Imbabura Highland Quichua bible

PROVERBIOS 4

¹Huahuacuna, taita yachachishcata uyaichi. Aliguta yarishpa causanata rijsingapajmi, aligutapacha uyana canguichi.

²Ñucaca, alitami cangunaman yachachijuni. Ñuca mandashcataca, na jichushpa saquinachu canguichi.

³Ñucapash, ñuca taitapaj juyashca churillatami carcani. Ñuca mamapaca, shujlla huahuashna, ninanda juyai tucushcami carcani.

⁴Ñuca taitaca, cashna nishpami yachachin carca: “Ñuca cushca yuyaicunataca, cambaj shungupi charingui. Ñuca mandashcacunata cazushpaca causanguimi.

⁵Ali yachaita japingui, ali yuyaitapash japingui. Ñuca shimihuan yachachishca yuyaicunataca, ama cunganguichu, ama saquinguichu.

⁶Can na saquijpica, cai ali yachaimi candapash huacaichinga. Can juyajpica, candapash cuidangami.

⁷Tucuimanda yalica, ali yachaimi ashtahuan ali. Ali yachaitami japina cangui. Tucui ima charinacunamanda yalica, ali yuyaitami japina cangui.

⁸Cai ali yachaita can jatunyachijpica, candapash jatunyachingami. Paita can ugllarijpica, candapash alicachingami.

⁹Cambaj umapipash, juyaillagu ricurijujtami churachinga. Juyailla ricurijuj coronatami caranga” nishpami yachachin carca.

¹⁰Ñuca huahualla, ñuca yachachishca yuyaicunata uyashpa chasquiyari. Shina causajpimi, can causana huatacunapash ashtahuan miranga.

¹¹Candaca, aliguta yachajuna ñambimi pushashcani. Alitalla rurashpa purina ñangunapimi pushashcani.

¹²Chai ñambi can purijujpica, imapash na jarcangachu. Calpashpa rijushpapash, na nitijanguichu.

¹³Ali yuyaita ñuca cushcataca, chaririashpa ama saquinguichu. Chai yachaitaca alichingui. Chaimari cambaj causai canga.

¹⁴Diosta na manllajcuna purina ñambica, ama yaicunguichu. Nalicunapaj ñandapash, ama ringuichu.

¹⁵Chai ñandaca, ama rishpa saquilla. Chaimanda anchurishpa yalinguilla.

¹⁶Paicunaca, imapash nalita na rurashpaca, na puñui ushanllu. Pitapash na urmachishpaca, puñuitapash chingachinmi.

¹⁷Nalita rurashcahuanllami micunajun, vinotapash shuhuashcatallami ufianajun.

¹⁸Ashtahuangarin imatapash cashcatapacha rurashpa causajcunapaj ñanga, yurajlla punllayamujuj michashnami. Ashtahuan ashtahuan punllayamushpa, alipacha punllayanshnami.

¹⁹Diosta na manllajcunapaj ñanga, yana tutashnami. Paicunaca, imapi nitijarijtapash na yachanajunllu.

²⁰Ñuca huahualla, ñuca yachachishca shimicunataca aligutapacha uyahuangui. Ñuca cushca yuyaicunataca, aliguta uyahuangui.

²¹Cai yachachishcacunaca, cambaj ñaupajmandapash ama anchurichun. Cambaj shungu ucupipash, alichishpa charingui.

²²Cai yachachishcacunata tarijcunapaca, causaita cuj cashcamanda, tucuilla cuerpopaj jambi cashcamanda chashna charingui.

²³Tucui imatalla alichishcamanda yalica, cambaj shungutara alichingui. Shungumandami causaica llujshijun.

²⁴Cambaj shimihuan jatun nalita rimanataca saquingui. Cambaj shimihuan nalita rimanatapash jarcaringui.

²⁵Cambaj ñavihuambash, aligutalla ricungui. Imata cashpapash, ñaupajman ricushpa catingui.

²⁶Can saruna chaqui ñandapash, imashna cajta ali ricungui. Tucui imata rurashpapash, aligutalla rurangui.

²⁷Ali ladomambash, lluqui ladomambash ama anchuringuichu. Cambaj chaquitaca, ima nalimandapash anchuchingui.