Read Imbabura Highland Quichua PROVERBIOS 5 Bible Online

PROVERBIOS 5 - Imbabura Highland Quichua bible

PROVERBIOS 5

¹Ñuca huahualla, ali yachaita ñuca yachachishcataca, aligutapacha uyahuangui.

²Ali yuyaita ñuca cushcata alichingapaj, cambaj shimihuambash, ali yachajushcatalla rimangapajmi, chashna uyana cangui.

³Na rijsishca huarmipaj shimimandaca, balun mishqui shutujunshnami. Pai imata rimashcapash, aceiteta yali llambullami.

⁴Ashtahuangarin pai tucurinaca, ajenjoshna jayajmi. Ishcandi ladoman ninan filo filo espadashnami.

⁵Paipaj chaquica, huañuimanmi urai rijun. Pai purijushcapash, Seolmanmi pushajun.

⁶Paipaj ñangunaca, maimambash pushajlla ñangunami. Chai ñangunataca, na rijsinguichu. Causaiman rina ñanda aliguta yariashpa na ricushcamandami, na rijsingui.

⁷Huahuacuna, cunanga ñucata uyahuaichi. Ñuca shimihuan yachachishca yuyaicunataca, na saquinachu canguichi.

⁸Chai huarmipajman rinamandaca caruyangui. Paipaj huasi pungumanllapash, ama quimiringuichu.

⁹Can alicachi tucushcataca, na rijsishcacunaman ama cungapajmi, na rina cangui. Tauca huatata can trabajashcataca, llaquitapash na llaquij runaman ama cunguichu.

¹⁰Cambaj ushaihuan trabajashcataca, na rijsishcacunara na munangacaman micunman. Can trabajashpa charishcacunaca, na rijsishca runapaj huasipira jundanman.

¹¹Na uyashpaca, jipaman cambaj cuerpo rucuyajpirami, ninanda llaquirishpa aij nijungui.

¹²Chaipira cashna nijunguiman: “Ali yuyaita cushcataca, ¿imashpata millanayachircaniyari? Jarcashpa rimashcatapash ñuca shungupica, yangapimari churarcani.

¹³Ñucata yachachijcuna yachachinajujpipash, na uyanayachircanichu. Ñucata yachachijcunataca, na aligutapacha uyanayachircanichu.

¹⁴Ñuca llactapi causajcunapaj chaupipi, tandanajushcacunapaj chaupipica, ñamari jatun llaquita japigrijurcani” nijunguiman.

¹⁵Yacuta tandachingapaj rurashca jatun utujumanda, cambaj yacutallata ufiangui. Yacuta llujchingapaj allashca jatun utujumanda llujshijuj cambaj yacutallata ufiangui.

¹⁶¿Cambaj pugyucunamanda yacuca, ñangunapi jicharijungachu? ¿Ninanda rijuj cambaj yacucunapash, plazacunapi jicharijungachu?

¹⁷Chai yacucunaca cambajlla cachun, na rijsishca runacunahuanga ama ufianguichu.

¹⁸Cambaj pugyumanda llujshijuj yacupash, bendiciai tucushca cachun. Huambrara cashpa cazarashca cambaj huarmihuanlla cushijungui.

¹⁹Paica juyashca tarugagushna, ninanda cushijuj gacela nishca juyailla animalgushnami. Pai juyachishcacunaca, cambaj tucui causaipi cushichijuchun. Paipaj juyaihuanga, tucui causaipimi ninandapacha cushijungui.

²⁰Ñuca huahualla, ¿imamandata shujpaj huarmihuan ñausashna puringuiyari? ¿Imamandata na rijsishca huarmipaj chuchupi ugllaringuiyari?

²¹Runapaj causaitaca, Mandaj Dios ricujujpimi, chaitaca na rurana cangui. Tucui imata rurashpa purijujtapash, paica ricuriajunmi.

²²Diosta na manllaj runataca, nalita pai rurashcallatami llaquipi urmachinga. Juchata pai rurashcapillatami, huascahuan huatai tucushcashna quedanga.

²³Jarcashpa rimajujpipash, na cazushcamandami huañunga. Yuyai illanshna imatapash rurashcamandami chinganga.