Read Imbabura Highland Quichua PROVERBIOS 6 Bible Online

PROVERBIOS 6 - Imbabura Highland Quichua bible

PROVERBIOS 6

¹Ñuca huahualla, cambaj cumba runagupaj cashpa, na rijsishca runapaj cashpapash, garante tucurcanguichari.

²Chaita ari nishca cashpaca, cambaj shimi rimashcahuanllatami, lazupishna japi tucushcangui. Cambaj shimi rimashcahuanllatami, prezu japi tucushcashna quedashcangui.

³Ñuca huahualla, cunanga cashna rurashpa cachariri: Chashna rurashpa cambaj cumba runagupaj maquipi urmashcallata cashpaca, cambaj cumbapajman rishpa, paipaj ñaupajpi cumurishpa, chaitaca paillata alichijuchun parlajuilla.

⁴Ashatallapash ama puñuichu. Cambaj ñavi puñunayachijpipash, ama saquichu.

⁵Huañuchij runapaj maquimanda taruga cacharirinshna, lazumanda urpi llujshishpa calpanshna ucha cachaririyari.

⁶Imata ruranatapash na munaj runalla, añangucunata ricuyari. Paicuna imata ruranajujta ricushpa yachajuyari.

⁷Paicunaca ñaupashpa pushajtapash, mandajtapash, amotapash na charinllu.

⁸Paicuna micushpa causangapaca, cozechana rupai punllacunapimi micunata tandachishpa alichinajun.

⁹Imata ruranatapash na munaj runalla, ¿ima horascamanda puñujugringuilla? ¿Ima horasta rijcharishpa jatarigringui?

¹⁰Ashata samashpa, ashata puñushpa, ashata samangapaj maquita cruzashpami sirijungui.

¹¹Chashna sirijujpillatami, imapash illaj tucunaca, purij runashna chayamunga. Imagutapash na charij canaca, macanajunacunahuan alichirishca runashnami chayamunga.

¹²Nali shungu, huagli runaca, jatun nalitalla parlashpami purin.

¹³Ñavita capitsishpa, chaquita cuyuchishpa, maqui dedohuan ricuchishpami, señasta ruran.

¹⁴Paipaj shungupica, jatun nalitallami yarijun. Tucui causaipimi, ima llaquitapash ruranatalla yariashpa purijun. Fiñanajuicunapi churashpami purijun.

¹⁵Chashna nalita ruraj runataca, cungashcapimi ninan llaqui japinga. Ñapash chingachi tucujpimi, pipash na ayudai ushanga.

¹⁶Mandaj Diosca nalita rurashcataca, cai suctatami ninanda fiñan, canchistacarin paipaj shungupica ninandapachami millanayachin:

¹⁷Jariyashpa purijta, llullashpa parlaj jalluta, ima nalitapash na ruraj runata huañuchishpa yahuarta jichajtami ninanda millanayachin.

¹⁸Nalita ruranatalla yarishpa purijta, nalita rurangapaj calpajta,

¹⁹ricurcanimi nishpa llullashpa villajta, huauqui puratallata fiñanajuipi churajtapashmi, ninanda millanayachin.

²⁰Ñuca huahualla, cambaj taita mandashcataca cazungui. Cambaj mama yachachishcatapash, ama cunganguichu.

²¹Chaicunataca, cambaj shungupi huatashcashna tucui causaipi charingui. Cungapi huatarishcashna puringui.

²²Chaicunaca, can maita purijpipash, aligutami pushanga. Can puñujujpipash huacaichingami. Ña rijcharijpipash, cambaj yuyaipimi rimanajunga.

²³Mandashcapash micha lamparashna cashcamanda, yachachishcapash michashna cashcamandami, chashna canga. Jarcashpa rimashpa yachachishcacunapash, causaiman apaj ñanmi canga.

²⁴Nalita ruraj huarmimanda jarcangapajmi ali canga. Na rijsishca huarmi, mishquilla shimicunahuan rimashcamandapash jarcangami.

²⁵Chai huarmitaca juyailla cajpilla, pactara shungupillapash munanguiman. Paipaj ñavihuan ricunman quedashpa, prezunshna canda japichumbash ama saquinguichu.

²⁶Culquimanda huainayaj huarmihuan purij runaca, faqui tandashnami quedan. Cusayu huarmicarin, jaripaj ninan valishca almagutapash huañuiman chayachinllami.

²⁷Runaca, ninata migllashpaca, ¿pai churajushca na rupajpi charijunmanllachu?

²⁸Runaca, carbón ninayashca jahuataca, ¿chaquita na rupachishpa purinmanllachu?

²⁹Cumba runagujpaj huarmipi chayashpaca, chashnallatami tucun. Maijambash chashna chayashpaca, llaquita apangapachami.

³⁰Maijambash yarjachijushpa micunata shuhuashpa micujpica, na fiñanllu.

³¹Ashtahuangarin shuhuajushpa japi tucushpaca, canchiscaman mirachishpami tigrachinga. Paipaj huasipi tucui charishcatapashmi cuna tucunga.

³²Ashtahuangarin cazarashca jahua shujcunahuan causajcunaca, ali yuyaita na charinllu. Chaita rurashpaca, paipaj almatamari chingachin.

³³Chugrichi tucunata, pingai tucunatallami taringa. Rimashpa pingaichi tucushcapash, napacha chingangachu.

³⁴Cusaca, huarmita juyaimandami ñapash fiñaringa. Paita llaquichishcashnallata llaquichijui punllapica, napacha cungashpa saquingachu.

³⁵Ali tucungapaj munashpa imata cujujpipash, napacha japingachu. Caranacunata ashtahuan mirachijpipash, napacha cungashpa saquingachu.