Read Imbabura Highland Quichua PROVERBIOS 7 Bible Online

PROVERBIOS 7 - Imbabura Highland Quichua bible

PROVERBIOS 7

¹Ñuca huahualla, ñuca yachachishca yuyaicunataca, aliguta huacaichingui. Imapash ninan valishcatashna alichingui.

²Ñuca mandashcacunatapash, aliguta huacaichingui. Chaita rurashpami causangui. Ñuca mandashca shimitapash, ricujuj cambaj ñavitashna cuidangui.

³Caicunataca, maquipi huatashcashna, tablapi escribishcashna shungupi charingui.

⁴Cai ali yachaitaca: “Canmi ñuca pani cangui” niyari. Ali yuyaitaca: “Ñuca familia purami cangui” niyari.

⁵Shujpaj huarmimanda cuidachunmi, chashna nina cangui. Na rijsishca huarmi mishquilla shimicunahuan parlashcamanda cuidachunmi, chashna nina cangui.

⁶Ashtahuangarin ñucaca, ñuca huasi ventanamanda, ventanapi churashca caspi huashamandami ricujurcani.

⁷Na yachajushca purapi ricushpaca, chairalla viñai purata ricushpami yarijurcani. Chaipica, na yachajushca huambratami ricurcani.

⁸Chai huambrami ñanda chimbashpa, ñan tigrana ladota rishpa, chai huarmipaj huasiman rijurca.

⁹Paica, ña chishashpa amsayajujpimi rijurca. Ña yanayashcapi, yana yana tutapimi rijurca.

¹⁰Chai huarmica, culquimanda huainayaj huarmishnallata churajushcami, umachinata alipacha yachaj shunguhuan tuparingapaj ñapash llujshirca.

¹¹Chai huarmica, imatapash nirijushpa fiñachij, shimi cacharishca cashpami, huasipi tiaitaca na ushan.

¹²Huaquimbica ñangunapi, huaquimbica plazacunapimi, ñan tigranacunapi pacalla chapajun.

¹³Chai huarmica, chai huambrata japishpami mucharca. Shinallata imatallapash na pingashpami, cashna nijurca:

¹⁴“Dioshuan ali cangapajmi, animalta huañuchishpa carashapachami nijurcani. Diosman carashapachami nishcataca, cunanmari pactachircani.

¹⁵Chaimandami, canda tuparingapaj llujshimurcani. Cambaj ñavita ricunayaimanda ucha mascaj shamushpami, cunanga tuparini.

¹⁶Ñuca camataca, Egiptomanda caupushca puchahuan juyailla bordashca fachacunahuanmi juyaillaguta alichircani.

¹⁷Ñuca puñuna ucupipash, mirra nishcata, áloe nishcata churashpa, canelatapash churashpami, mishquillagu ashnajuchun alichircani.

¹⁸Shamuilla, pacaringacaman ninandapacha juyarinajushun. Ninanda juyarishpa cushijunajungapaj shamuilla.

¹⁹Ñuca cusaca na huasipichu, caru llactatamari puringapaj rirca. Chaimandami chashna cushijushun.

²⁰Muchila culquita apashpami rirca. Pai shamusha nishca punllapimi shamunga” nijurcami.

²¹Mishquilla shimicunahuan ninandapacha parlajushpallatami misharca. Juyailla shimicunahuan parlajushpallatami, na uyajujpita ari nichirca.

²²Paica, ñapash catishpa rircallami. Huagrata huañuchingapaj apajpishnami rijurca. Shinlli shungu runata llaquichingapaj, prezu apajpishnami rijurca.

²³Alasyu animal linllipi japi tucungapaj ucha rinshnami rijurca. Paillata huañuipi yaicujushcataca, paipaj shunguta flecha chaupingacaman na yacharcachu.

²⁴Cunanga huahuacuna, uyahuaichi. Ñuca cushca yuyaicunataca, aliguta uyahuaichi.

²⁵Chai huarmi purijuj ñangunata catinataca, cambaj shungupica na yarinachu cangui. Chai huarmi purina ñangunata catishpa, na pandanachu cangui.

²⁶Paica, ashtacacunatami chugrichinshna urmachishca. Paica, ashtahuan ninan shinlli runacunatapashmi huañuchishca.

²⁷Chai huarmipaj huasica, Seolman apaj ñanmi. Chai ñanga, huañui tiaj ucucunamanmi chayachin.