Read Imbabura Highland Quichua PROVERBIOS 8 Bible Online

PROVERBIOS 8 - Imbabura Highland Quichua bible

PROVERBIOS 8

¹¿Nachu ali yachaica caparijun? ¿Nachu ali yuyaipash, shinllita caparijun?

²Ñan lado pata jahuacunapi, purina ñan cruzarijuj esquinacunapimi shayarin.

³Pungu ladocunapi, puebloman yaicunacunapi pungu yaicunacunapimi, cashna nishpa shinllita caparijun:

⁴“Gentecuna, cangunatami caparijuni. Huañuna aichayu runacunamanmi, shinllitapacha villajuni.

⁵Nara yachajushcacuna, aliguta yarishpa purinata yachajuichi. Shinlli shungucuna cangunapash, aliguta yarishpa causaichi.

⁶Uyahuaichi, juyailla ali shimicunatami rimagrini. Ñuca shimihuanga, aligutallami yachachigrini.

⁷Ñuca shimihuanga, na llullashpami yachachigrini. Diosta na manllashpa, ñuca shimihuan rimanataca millanayachinimi.

⁸Ñuca shimihuan yachachishca tucui yuyaicunaca chashnapachami. Cai shimicunapica, ima nalipash, ima pandapash na tianllu.

⁹Tucui cai shimicunaca, entendij runapaca, aligutalla ruranami. Ali yachaita tarishcacunapaca, yuyaita japinalla shimicunami.

¹⁰Culquipaj randica, ñuca yachachishcata chasquichi. Ashtahuan ali oropaj randica, yachajunata japichi.

¹¹Ali yachaica, ninan valishca juyailla rumicunatapash yalimi. Chaitaca, tucui imatalla munashcahuambash, na chimbapurai ushanallachu.

¹²Ali yachai ñucaca, aliguta yarishpa purijcunahuanmi causajuni. Chaimandami, ali yuyaicunata cushca ali yachaita tarini.

¹³Mandaj Diosta manllanaca, nalita ruranata millanayachinami. Jariyashpa jatun tucunapash, ninanda jariyanapash, nalita ruranaman apajuj ñanmi. Jatun nalita rimanajujtaca millanayachinimi.

¹⁴Aliguta yarichinapash, aligutapacha ricushpa mandanapash ñucahuanmi. Ñucami ali yachai cani. Ninan ushaipash ñucapajmi.

¹⁵Ñucamandami, jatun mandajcunapash mandanajun. Ñucamandami mandajcunapash, imatapash cashcatapacha rurachun mandanajun.

¹⁶Ñucamandami, mandajcunaca mandashpa charin. Tucui mandajcunapashmi, aliguta ricushpa llactata mandanajun.

¹⁷Ñucata juyajcunataca, ñucapash juyanimi. Tutamandata ñucata mascajcunaca tarihuanmi.

¹⁸Charijyanapash, alicachi tucunapash ñucahuanmi. Na tucurinalla charinacunapash, imatapash cashcatapacha ruranapash ñucahuanmi.

¹⁹Ñuca yachachishcapash, orota yali ashtahuan alimi. Mapata anchuchishpa punchayachishca orotapash yali alimi. Ñuca caranacunaca, ashtahuan ali culquitapash yalimi.

²⁰Imatapash cashcatapacha rurana ñandami pushasha. Aligutapacha ricushpa mandanamanmi, chaqui ñan chaupita pushasha.

²¹Ñucata juyajcunataca, paicuna japinatallata japinajuchunmi, chashna pushasha. Juyailla alicunatapashmi, alichinacunapi jundachisha.

²²Mandaj Diosca callarimandapachami, imata ruraitapash nara callarishpallata, punda huatacunamandapacha ña charihuarca.

²³Callarimandapacha causaita causaicamanmi, cai pacha nara tiajpillata, mandanataca ña charircani.

²⁴Manllanayai ucu ucu yacucunapash nara tiajpillatami, ña churahuarca. Ashtaca yacucuna tugyajuj pugyucunapash nara tiajpillatami, ña churahuarca.

²⁵Urcucunatapash, lomacunatapash nara rurashpallatami, ñucataca ña churahuarca.

²⁶Cai pachatapash, pambacunatapash nara rurashcachu carca. Cai pachapi ñutu alpatapash nara rurai callarishcachu carca.

²⁷Jahua pachata rurajujpica, ñucapash chaipimi carcani. Manllanayai ucu ucu yacucunata, jahua muyundita señalajujpipash, chaipimi carcani.

²⁸Jahuapi, jahua pachata shinllita churajujpipash, manllanayai ucu ucumanda yacu tugyajuj pugyucunata shinllita churajpipash, chaipimi carcani.

²⁹Pai mandashpa saquishcamanda, mama cucha yacu maimambash ama llujshichun mandajujpi, cai pacha callari rumicunata churajujpi chaipimi carcani.

³⁰Tucui chaicunatami, Dioshuan alichijurcani. Maimambash na anchurishpami, paitaca punllandi cushichijurcani. Paipaj ñaupajpimi, cushijushca causajurcani.

³¹Gentecuna causana cai pachata rurashcamandami cushijuni. Huañuna aichayu runacunahuanmi cushijuni.

³²Cunanga huahuacuna, uyahuaichi. Ñuca yachachishcacunata catijcunaca, ninandami cushijun.

³³Ali yuyaita ñuca cushcata ali uyashpa, yachajushcacuna caichi. Chaitaca, na yangapi churanachu canguichi.

³⁴Ñuca yachachishcata uyangapaj, ñuca huasi pungupi punllandi shuyajuj runaca, ninandami cushijun. Paica, ñuca huasi pilar ladocunapimi shuyajun.

³⁵Ñucata tarijca, causaita taringami. Mandaj Diospaj juyaitapashmi taringa.

³⁶Ashtahuangarin juchata rurashpa ñucata fiñachijca, paipaj almatami llaquipi churan. Ñucata tucui fiñajcunaca, huañuitami juyanajun” nishpami caparijun.