Read Imbabura Highland Quichua PROVERBIOS 9 Bible Online

PROVERBIOS 9 - Imbabura Highland Quichua bible

PROVERBIOS 9

¹Ali yachaica paipaj huasitaca, pai labrashca canchis pilarcunahuanmi shayachirca.

²Jatun micuipaca, animalcunata huañuchishpami, vinotapash chapurca. Chai jipami, mezatapash aliguta alichirca.

³Chai jipaca, paita servij huarmicunatami cacharca. Paicunami, pueblo muyundi ashtahuan jahuamanda caparinajurca.

⁴Maijan nara yachajushcacunataca: “Caiman shamuichi” nijunmi. Na aliguta yarishpa causajcunataca, cashnami nijun:

⁵“Ñuca micunata micuj shamuichi. Ñuca chapushca ali vinota ufiaj shamuichi.

⁶Na yachajushca causanata saquishpaca, causanguichimi. Ali yuyaihuan purina ñambi purichi” nijunmi.

⁷Na cazushpa asij runata ali tucuchun rimajca, rimashpa pingaichi tucunatallami japin. Diosta na manllaj runata jarcashpa rimajca, nalicachi tucungapajllami riman.

⁸Canda ama millanayachishpa ricuchunga, na cazushpa asij runataca, na jarcashpa rimanachu cangui. Ashtahuangarin alipacha yachajushca runata, ali tucuchun rimangui. Paica canda juyangami.

⁹Alipacha yachajushca runaman yuyaita cungui, paica ashtahuan yachajushcami tucunga. Imatapash cashcatapacha ruraj runaman yachachingui, paica ashtahuanmi yachajunga.

¹⁰Alipacha yachajushpa callaringapaca, Mandaj Diostami manllashpa causana. Ima juchapash illaj Diosta rijsinaca, ali yuyaita charinami.

¹¹Ñucamandami, can causana punllacunaca ashtahuan miranga. Can causana huatacunapash, ashtahuanmi miranga.

¹²Can, alipacha yachajushca cashpaca, cambajllatami ali canga. Na cazushpa asijuj cashpapash, canllatami llaquichi tucungui.

¹³Juizu illaj huarmica, shimi cacharishca huarmimi. Paica imatapash na yachaj, yangalla huarmimi.

¹⁴Paipaj huasica, pueblopi tiaj ashtahuan jahuapimi shayajun. Chai huasi pungupimi, shuj tiarinapi tiajun.

¹⁵Paica, ñanda yalijcunata cayangapajmi, chashna tiajun. Paica, ali ñanda yalijcunatami cayajun.

¹⁶Maijambash nara yachajushcataca: “Caiman shamui” nijunmi. Na aliguta yarishpa causajcunatapash, cashnami nijurca:

¹⁷“Shuhuashca yacuca mishquimari, tandata pacalla micunaca gushtumari” nijurcami.

¹⁸Ashtahuangarin huañushcacuna chaipi tiajtaca na yachanllu. Pai cayashcacuna Seol ucu ucupi cajtapash, na yachanllu.