Read Imbabura Highland Quichua ECLESIASTÉS 1 Bible Online

ECLESIASTÉS 1 - Imbabura Highland Quichua bible

ECLESIASTÉS 1

¹Villaj villashca shimicunami. Davidbaj churica, Jerusalenbi jatun mandajmi carca.

²Yanga yangapachami nircami chai villaj runaca. Yanga yangapachami. Tucui imapash yanga yangami.

³Indi punllayachijuj cai pachapi tucui imatapash ninandapacha rurashpa trabajaj runaca, ¿ima alitata japin?

⁴Shuj miraicunaca chinganmi, shuj miraicunami huacharin. Ashtahuangarin cai pachaca, causaita causaicaman tiajunllami.

⁵Indi llujshimushpaca, cutin huashajunllami. Llujshimushca pushtumanllatami, ucha tigran.

⁶Huairapash uraiman huairajushpata, vichaiman muyushpa rinllami. Chashna muyushpa muyushpa rijushpallatami, chai pushtumanllata chayan.

⁷Tucui jatun yacucunami, mama cuchaman chayan. Shina cashpapash mama cuchaca, na jundanllu. Jatun yacucunaca, maimanda llujshishpa shamushcamanllatami, cutin shamungapaj tigran.

⁸Runa parlai ushashcatalla parlashcatapash yalimi, tucui imapash shaijuchin. Ñavica ricunataca, ima horapash na shaijunllu. Rinripash, uyanataca na shaijunllu.

⁹¿Imata pundaca tiarca? Jipaman imapash tianallatami tiarca. ¿Imatata rurashca cashca? Jipaman imata ruranatallatami rurashca. Indi punllayachijuj cai pachapica, imapash na mushuj tianllu.

¹⁰“Ricui, caica mushujmi” ningapaca, ¿imapash tianllu? Cunambi tucui ima tiashcapash, punda huatacunallatami ña tiashca.

¹¹Punda ima tiashcata yarinaca, na tianllu. Jipaman ima tucunataca, chai jipaman causajcunapash na yaringachu.

¹²Villaj ñucami, Israel llactapaj jatun mandaj cashpaca, Jerusalenbi mandajurcani.

¹³Cai pachapi tucui imatalla ruranajushcata yachangapaca, tucui shunguhuan, alipacha yachaihuanmi callarishpa ricujurcani. Chai shinlli ruranata rurashpa causachunga, Taita Diosmi huañuna aichayu runacunaman curca.

¹⁴Indi punllayachijuj cai pachapi imatalla ruranajujtaca, tucuitami ricurcani. Ricuichi, tucui chaicunapash yangallami, yuyaita shaijuchingapajllami.

¹⁵Vishtuyashcataca, na alichi usharinllu, ashalla illajtapash na cuentai usharinllu.

¹⁶Ñuca shungupica, cashnami yajurcani: “Ricui, ñucaca Jerusalenbi punda mandajcunata yalimi jatunyachi tucushcani, ashtahuan yachajushcapashmi tucushcani. Ñuca shungupipash alipacha yachajuita japishpami yachajushcani.

¹⁷Ali yachaita rijsingapajmi, tucui shunguhuan chaitalla yariajurcani. Shinallata juizu illaj canatapash, imapash yangacunata ruraj canatapashmi yachajurcani. Tucui chaicunapash yuyaita shaijuchingapajllami” yajurcanimi.

¹⁸Ninandapacha yachajushca cajpica, imapash ashtahuanmi fiñachin. Pipash ashtahuan yachajushpa catijushpaca, llaquitami mirachin.