Read Imbabura Highland Quichua ECLESIASTÉS 10 Bible Online

ECLESIASTÉS 10 - Imbabura Highland Quichua bible

ECLESIASTÉS 10

¹Chuspi huañushcacunaca, mishquillagu ashnajuj jambita ruraj runa rurashca jambitaca, millanayaitami ashnayachin. Alipacha yachajushca, ninanda alicachi tucushca runa, juizu illanshna imapi ashata pandashcapash, shinallatami yapa nali ricurin.

²Alipacha yachajushca runapaj shunguca, ali ladotami yarin. Ashtahuangarin shinlli shungu runapaj shunguca, lluqui ladotami yarin.

³Shinlli shungu runaca, ñanda purijushpapash, aliguta yarishpa causaj runashnaca na purinllu. Shinami shinlli shungu cashcataca, tucuicunaman ricuchijun.

⁴Mandajpaj yuyaipi ninanda fiñashpa canda llaquichijpipash, can imata rurashpa causajushcataca, ama saquishpa llujshinguichu. Ali shunguhuan causajcunaca, ninanda llaquichinatapash cungachingami.

⁵Ñucaca, indi punllayachijuj cai pachapica, shuj panda tiajtami ricurcani: Chai pandataca, mandajllata rurashpa callarichinshnami.

⁶Shinlli shungucunarami, ashtahuan alipi tianajun. Ashtahuangarin charijcunarami, yangallacunapi tianajun.

⁷Servijcunaca, caballopi tiarishpa purinajujta mandajcunaca, servijcunashna chaquilla purinajujtami ricurcani.

⁸Utujuta ruraj runaca, chai utujupillatami urmanga. Jarcashca pircata urmachijuj runataca, culebra llujshishpami caninga.

⁹Rumicunata faquishpa alichijuj runaca, chaicunahuanllata chugrinllami. Yamdata chijtajuj runapash, chaihuanllata imapash tucunallami.

¹⁰Jirru filo tucurijpi na cutin afilashca cajpica, imata cashpapash ashtahuan shinlli tucushpami rurana tucun. Ashtahuangarin ali yachaica, aliguta pushangapajmi ali.

¹¹Nara muspayachijpillata culebra canijpica, muspayachij yumbupash yangami.

¹²Alipacha yachajushca runa rimashca shimicunaca, ali shimicunami. Ashtahuangarin shinlli shungu runa rimashca shimicunaca, paitallatami llaquipi churan.

¹³Paipaj shimihuan rimai callarishcallatami, shinlli shungu cajtaca ricuchin. Tucuchingapacarin musparishpa, ninan nalicunata rimashpami tucuchin.

¹⁴Jipa punllacuna ima tucunataca, pipash na yachajpitami, shinlli shungu runaca ninanda rimajunlla. Pai huañushca jipa ima tucunatacarin, ¿pita paiman villangayari?

¹⁵Shinlli shungu runacuna imatalla rurashcacunaca, shaijuchinllami. Puebloman maita rinatapash na yachaimandami, chashna tucun.

¹⁶Huambrara jatun mandaj mandajuj llactalla, ¡aij imachari tucungui! Can churashca mandajcunaca, tutamandallatami jatun micuihuan callarinajun.

¹⁷¡Alicachi tucushcacunapaj churi, jatun mandaj tucushpa mandajuj llactalla, ninanda cushijuyari! Can churashca mandajcunapash machangapaj randica, yarjai purinajushpa shinlli tucungapajllami micunajun.

¹⁸Imata rurangapajpash na munashpami, huasi tejacuna urmachumbash saquinlla. Chashna imata rurangapajpash na munaj cajpimi, tamiapash huasi ucuman yalin.

¹⁹Cushijuimandami, jatun micuitapash ruranajun. Causaj runacunataca, vinomi cushichin. Culquica tucuipajmi ali.

²⁰Jatun mandajtaca yuyaipillapash, ama ima nalita rimanguichu. Charij runatapash, can puñuna ucupi canlla tiajushpapash, ama nalicachinguichu. Jahuata rij, alasyu animalcunami chai rimashca shimicunataca villagringa.