Read Imbabura Highland Quichua ECLESIASTÉS 11 Bible Online

ECLESIASTÉS 11 - Imbabura Highland Quichua bible

ECLESIASTÉS 11

¹Cambaj tandataca, yacupi cacharilla. Tauca punllacuna yalijpica, cutin japinguillami.

²Canchis puraman cashpa, pusaj puraman cashpapash caranguilla. Llactapaj ima llaqui shamunataca, na yachanguichu.

³Fuyuca, yacuhuan junda cashpaca, alpapi jichamungallami. Quirupash, urai ladoman urmashca cashpa, janaj ladoman urmashca cashpapash, urmashca pushtupillata quedangallami.

⁴Huairata chapaj runaca, na tarpungachu. Fuyuta ricuriajlla causaj runapash, na cozechangachu.

⁵Huaira maiman rijujtapash, vijsayu huarmipaj vijsapi huahuapaj tullucuna imashna viñajtapash, canga na yachanguichu. Shinallatami tucuita ruraj Taita Dios, tucui caicunata imashna rurashcatapash na yachangui.

⁶Tutamanda muyuta tarpushpaca, chishimambash na samashpa tarpunguilla. Punda tarpushca, jipa tarpushca, maijan ali canatapash na yachanguichu. Na cashpaca, ishcandillata alimi canman.

⁷Punchapamba michaguca juyaillagumari, indita ricunapash aligupachami.

⁸Maijan runacunapash, unai huatata causashpa, chai tucuilla huatacunapi cushijushca cashpapash, yana yana tutapica ashtahuan unai huatacunata causanata yarinajuchun. Jipaman tucui ima tucunapash, yangallami canga.

⁹Chairalla viñai cashpallata cushijuilla. Chairalla viñai cashpallata, cambaj shungu cushijuchun saquilla. Cambaj shungu munashcata rurailla, cambaj ñavi ricushcata rurailla. Ashtahuangarin tucui chaicunataca, Taita Dios ricuchinatami yachana cangui.

¹⁰Cambaj shungumandaca, fiñarina yuyaita anchuchingui, cambaj cuerpohuan ima nalita ruranamandapash anchuringui. Chaira viñaicuna chairalla cashpa cushijuna punllacunaca, ñapash tucurinalla yangapachami.