Read Imbabura Highland Quichua ECLESIASTÉS 12 Bible Online

ECLESIASTÉS 12 - Imbabura Highland Quichua bible

ECLESIASTÉS 12

¹Canda Ruraj Diostaca, chairalla viñai cashpallata yaringui. Narapash llaqui punllacuna chayamujpillata, yaringui. Chai llaqui huatacuna chayamujpica: “Cai causaihuanga, na cushijushcachu cani” ninguimi.

²Tamiashca jipaca indipash, punchalla shitajujpash, lunapash, luzerocunapash, fuyupi nara huashajujpillata, Diostaca yaringui.

³Huasita cuidajcunapash chujchungami, ninan shinlli runacunapash curcuyangami. Juchu quirucunapash huaquinlla quedajpimi, ña na acui ushanajunga. Ventanacunamanda ricujcunapash, amsatallami ricunajunga.

⁴Juchu quirucunahuanga, na acui ushajpimi, shimi pungucunapash vicharinga. Alasyu animalcuna candana horaspica, tucui candaj huarmicunami ñavita urai cumuchi tucunga.

⁵Vichai rinatapash ninanda manllajpimi, ñambipash llaquicunalla tianga. Almendro yura sisanshnami tucunga. Langosta jurupash, llasha quipishnami tucunga. Micuna munaipash chingangami. Runaca, causaita causana huasipi causangapajmi ringa. Yarishpa yarishpa huacajcunami, ñan muyundita purinajunga.

⁶Culqui cadena nara fitirijpillata, oro plato nara faquirishpa ñuturijpillata, pugyu ladopi fundu nara faquirijpillata, allashca jatun utujumanda yacuta aisana poleapash nara faquirishpa ucuman urmajpillatami, Diostaca yarina cangui.

⁷Alpamanda rurashca aichaca, imashna cashcashnallata alpamanllatami tigranga. Espirituca, espirituta cuj Taita Diospajmanllatami tigranga.

⁸Villaj runaca, imapash yanga yangami cashca. Tucui imapash yangallatami nircami.

⁹Villaj runaca, ashtahuan alipacha yachajushca cashpami, gentecunamambash ashtahuan ali yachaita yachachijurca. Paica, aliguta uyashpa imashna cajta ricunajuchunmi, yarichij shimicunataca, ashtacata escribijurca.

¹⁰Villaj runaca, juyailla shimicunatami taringapaj munajurca. Shinallata na llullaj shimicunata chashna cashcatapacha escribingapajmi munajurca.

¹¹Aligutapacha yachajushca runacuna rimashca shimicunaca aujahuan tujsishcashnami. Tandanajuicunapi yachachijcuna yachachishca shimicunaca, ali tacashca clavocunashnami. Chai shimicunataca, shujlla jatun Michijmi paicunaman curca.

¹²Ñuca huahualla, cai yuyaitaca canmanmi cuni: Librocunata ruranaca, na tucuringachu. Ninanda yachajunaca, cuerpota shaijuchingapajllami.

¹³Cai tucui yachachishcata uyashcacunami, cashna tucurin: Taita Diosta manllangui, pai mandashcacunatapash pactachingui. Runacunapaca, chaita ruranami tucuita yali ashtahuan ali.

¹⁴Taita Diosca, ñucanchi tucui imatalla ruranajushcataca ricuchingami. Imatapash pacalla rurashcacunandimi ali cajpipash, nali cajpipash ricuchinga.